මැගසින් බන්ධනාගාරයේ සිටින රැඳවියන්ට මත්ද්‍රව්‍ය ලබා දීමට ගිය සැකකරුවන් දෙදෙනෙකු පොලීසිය අත්අඩංගුවට ගෙන තිබෙනවා.
ඊයේ දහවල් මෙම සැකකරුවන් දෙදෙනා අත්අඩංගුවට ගෙන ඇත්තේ බේස්ලයින් පාර මැගසින් බන්ධනාගාරයේ පැති බැම්ම අසල සිදුකළ වැටලීමකදීයි. ඔවුන් විසින් එම ස්ථානයේදී බන්ධනාගාරයට පාර්සල් 02ක් විසි කිරීමට උත්සාහ කර තිබෙනවා. එහිදී සැකකරුවන් දෙදෙනා පොලීසිය විසින් අත්අඩංගුවට ගෙන ඇති බවයි වාර්ත් වන්නේ. සැකකරුවන් සන්තකයේ තිබූ පාර්සල් 02ක පරීක්ෂා කිරීමේදී අයිස් මත්ද්‍රව්‍ය ග්‍රෑම් 22 මිලිග්‍රෑම් 250ක්, ඈෂ් මත්ද්‍රව්‍ය මිලිග්‍රෑම් 02ක්, දුරකථන චාජර් 02ක් කරාඹු ජෝඩු 02ක්, ලයිටර් 10ක් කුඩා ජංගම දුරකථන 02ක්ද පොලිස් භාරයට ගෙන තිබෙනවා. අත්අඩංගුවට ගත් සැකකරුවන් දෙදෙනා අවුරුදු 29 වයසේ පසුවන කොඹ 14 ප්‍රදේශයේ පදිංචිකරුවන් බවද පොලීසිය පවසනවා. අත්අඩංගුවට ගත් සැකකරුවන් අද දින මාලිගාකන්ද මහේස්ත්‍රාත් අධිකරණයට ඉදිරිපත් කිරීමට නියමිත අතර බොරැල්ල පොලීසිය විසින් වැඩිදුර විමර්ශන සිදුකරනු ලබනවා. මේ අතර ශ්‍රී ලංකා නිදහස් පක්ෂ මැදිරිගිරිය ආසන බල මණ්ඩලයේ සභාපති චින්තක ටෙරන්ස් විජේරත්න මහතා මත්කුඩු ප්‍රවාහනය කරමින් සිටිය දී අත්අඩංගුවට ගෙන තිබෙනවා. ඒත් සමග ඔහුගේ බිරිඳ ද ගමන් කරමින් සිට ඇති බවයි සඳහන් වන්නේ. හිඟුරක්ගොඩ දී මොවුන් අත්අඩංගුවට ගෙන ඇති බවයි පොලීසිය පවසනවා.
