ගිනිකොණ දිග අරාබි මුහුදු ප්රදේශයේ පවතින පීඩන අවපාතය පිළිබද අවවාදාත්මක නිවේදනයක් කාලගුණ විද්යා දෙපාර්තමේන්තුව විසින් නිවේදනය කර තිබෙනවා.
එම පීඩන අවපාතය වයඹ දෙසට ගමන් කරමින් අද මධ්යම රාත්රීයේදී සුළි කුණාටුවක් දක්වා වර්ධනය වීමට බොහෝ විට ඉඩ ඇති බව කාලගුණ විද්යා දෙපාර්තමේන්තුව නිවේදනය කළා.
මේ හේතුවෙන් උතුරු සහ නැගෙනහිර මුහුදු ප්රදේශවල යාත්රා කරන ධීවර සහ නාවික ප්රජාවන්ට වහාම ගොඩබිමට හෝ ආරක්ෂක ස්ථාන වෙත පැමිණෙන ලෙස දැනුම් දෙනවා.
මේ සම්බන්ධයෙන් අදහස් පළ කළ කාර්යයේ නියුතු කාලගුණ විද්යාඥ මලිත් ප්රනාන්දු මහතා.
මේ අතර ගාල්ල හා මාතර දිස්ත්රික්කවලට ඊයේ රාත්රී සිට ඇද හැළෙන අධික වර්ෂාවත් සමග නිල්වලා ගඟ ප්රදේශ කිහිපයකින් පිටාර මට්ටමට පැමිණ තිබෙනවා.
ඒ හේතුවෙන් පහත්බිම් රැසක් ජලයෙන් යටව ඇති බව වාර්තා වනවා.
මේ අතර, අධික වර්ෂාවත් සමග පීඩාවට පත් ජනතාවට සහන සැළසීම සඳහා නාවික හමුදා සහන කණ්ඩායම් 4ක් යොදවා ඇතැයි නාවික හමුදාව පවසනවා.
එමෙන්ම කළුතර දිස්ත්රික්කයේ මතුගම සහ පාලින්දනුවර ප්රාදේශිය ලේකම් කොට්ඨාශවලට නායයෑම් පිළිබඳ අවධානය යොමු කළ යුතු කහ නිවේදන නිකුත් කර තිබෙනවා.
ජාතික ගොඩනැගිලි පර්යේෂණ සංවිධානය පැවසුවේ බදුල්ල දිස්ත්රික්කයේ පස්සර, ගාල්ල දිස්ත්රික්කයේ නෙළුව, නාගොඩ සහ ඇල්පිටිය, කළුතර දිස්ත්රික්කයේ පාලින්දනුවර, වලල්ලාවිට, අගලවත්ත සහ බුලත්සිංහල ප්රාදේශීය ලේකම් කොට්ඨාශ සඳහා නිකුත් කළ නායයෑම් අනතුරු ඇඟවීම් තවදුරටත් ක්රියාත්මක වනු ඇති බවයි.
