කඩ වු දේශපාලන පොරොන්දුවෙන් ගම්මු අසරණ වෙලා

වසර ගනනාවකින් සංවර්ධනය නොවුන නොබිලිවැව මේවන විට රොන් මඩ සහ විවිධ ශාඛ බෝවීමෙන් ගොඩ වී ඇති බවත් එම වැවේ ජලයෙන් ගොවිතැන් කටයුතු සිදුකළ ගොවි ජනතාව මේවන විට වැව ගොඩවීම හේතුවෙන් ජලය ලබා ගැනීමට නොහැකිව දැඩි ලෙස අසරණවී ඇති බව වෙඩිතිබ්බගල ගම්වාසීන් පවසනවා.

මැදවච්චිය ප්‍රාදේශීය ලේකම් බල ප්‍රදේශයේ තුලාන අංක 60 හි වෙඩිතිබ්බගල ගම්මානයේ මෙම නොබිලිවැව පිහිටා ඇත.

මෙම වැව යටතේ කුඹුරු අක්කර 30 ක් පමන අස්වැද්දවන අතර දීර්ඝ කාලයක සිට මෙම වැව සංවර්ධනය නොවුන නිසාවෙන් වැව් බැම්ම පවා කැඩී ගොස් කැලෑ වැදී ඇත. මෙම ගම්මානයේ පවුල් 70ක් පමණ සිටිනවා.

ඒ අනුව දවසින් දවස ගම්මුන්ගෙන් ඈත්වෙන නොබිලිවැව පිළිබඳ ගම්මුන් අදහස් දක්වමින් මෙලෙස කියා සිටියා.

ජයසුන්දර ගොවි මහතා,

මේ වැව කැලෑ වැවිලා. වැවි බැම්ම පුපුරලා.

බැම්ම මැදින් යන කාණුවෙන් තමයි අපි වෙල් වලට වතුර ගන්නේ.

වැව ගොඩවෙලා වැවි බැමමෙත් එක්ක කැලේ වැවෙනකම් මේක අපට කවුරුත් හදලා දුන්නේ නෑ.

වත්මන් රජයේ මහජන නියෝජිතයින් මැතිවරණ කාලයට අපේ ගම්මානයට ඇවිල්ලා කට අලංකාර කර කර බොරු පොරොන්දු දුන්නේ.
ඔවුන් ගමට ඇතුල් වෙලා ප්‍රථම මැතිවරණ පොරොන්දුව ලෙස දුන්නේ මෙම නොබිලිවැව සංවර්ධනය කර දීමට කටයුතු කරනවා කියලා.

එහෙම කිවුව අය අද නොබිලිවැව තියෙන්නේ කොහෙද කියලවත් දන්නෑ පාර්ලිමේන්තුවට ගියාට පස්සේ.

මෙතෙක් පැවැති රජයන් සියල්ලටම කිවුවා.

කවුරුත් මේක හඳලා දුන්නෑ. මේ රජයත් එහෙමමයි.

ගොවීන් රවට්වනවා හොඳට. ඒකේ ප්‍රථිපලයක් ලෙස දැන් වැව හොඳටම ගොඩ වෙලා.

කුඹුරු අක්කර 30 ක් වගා කළ වැවෙන් දැන් අක්කර 05 ක් වගා කරන්න වතුර නෑ. අපි අසරණ වෙලා ඉන්නේ.

මේ ගමේ සම්පත්. මේවා රැකගක්කයි අපි මේ ලේ රහ උගුරුට දැනෙනකම් හඩක් නගන්නේ.

රජරට ජනාධිපති වරයෙක් දැන් අපට ඉන්නේ. එතුමා මේවා දන්නේ නෑ. එතුමාව දැණුවත් කරන්නයි අපි මාධ්‍යට මේ විස්තර දෙන්නේ.

මේ අපේ උපන් නූපන් දරු පරපුරේ වත්කම්. මේවා අපි රැකලා දෙන්න ඕනේ.

මේ පිළිබඳ අවධානය යොමු කරමින් මෙම නොබිලිවැව කඩිනමින් ප්‍රතිසංස්කරණය කරදෙන ලෙසට රටේ ජනාධිපතිතුමාගෙන් අපි ගම්වාසීන් විදිහට ඉල්ලා සිටිනවා.

ඩබ්ලිව්. චන්ද්‍රසේකර ගොවි මහතා,

මෙම වැව මේවන විට ගොඩවී වලකට පමනක් සීමා වෙලා තියෙන්නේ. කුඹුරු සඳහා ජලය ලබා ගැනීමට ගම්වාසීන් හට වැවි බැම්ම කැඩී ගිය ඇල මාර්ගයක් භාවිතා කිරීමට සිදුවෙලා තියෙනවා. වර්ථමානය වනවිට මෙම නොබිලි වැව ගම්වාසීන්ට අහිමිවීමේ අවධානමක පවතිනවා.

අද හදලා දෙයි හෙට හදලා දෙයි කියලා අපිත් බලන් ඉන්නවා. දැන් පාර්ලිමේන්තුවට ගිහින් අපිව අමතක වුණ වත්මන් දේශපාලකයින් ගමට ඇවිත් මුලින්ම කිවුවේ මේ වැව හදනවා කියලා.

ඒ අය ගොවීන්ගේ විස්වාසය කඩ කළා. මේක දැන් කඩ වූ පොරොන්දුවක් නිසා ගොඩ වූ වැවක් වෙලා. අපි අසරණ වෙලා ඉන්නේ.

අපි ජනාධිපතිතුමන්ව විශ්වාස කරනවා. අපට වැව හදලා දෙන්න කියලා එතුමන්ගෙන් ඉල්ලා සිටිනවා.