උතුරු ඇල්ජීරියාවේ මගී බස් රථයක් මාර්ගයෙන් ඉවතට පැන ප්‍රපාතයකට පෙරළීමෙන් සිදුවූ අනතුරකින් පුද්ගලයින් 25 දෙනෙකු ජීවිතක්ෂයට පත්ව තිබෙනවා. විදෙස් මාධ්‍ය වාර්තා කළේ තවත් පුද්ගලයින් 44 දෙනෙකු තුවාල ලබා ඇති බවයි. අගනුවර වන ඇල්ජියර්ස් සිට කිලෝමීටර 50ක් පමණ නැගෙනහිරින් පිහිටි බුමර්ඩෙස් පළාතේ එල් කර්මා ප්‍රදේශයේදී මෙම අනතුර සිදුව තිබෙනවා.
ඇල්ජීරියානු සිවිල් ආරක්ෂක බලකායට අනුව, සෙටිෆ් ප්‍රදේශයේ සිට ධාවනය වූ මෙම බස් රථයේ රියදුරුට වේගය පාලනය කරගත නොහැකි වීමෙන් රථය මහා මාර්ගයෙන් ඉවතට පැන මෙලෙස ප්‍රපාතයට පෙරළී ඇති බවයි අනාවරණය වී ඇත්තේ. අනතුර සිදුවූ වහාම හදිසි මුදාගැනීමේ කණ්ඩායම් එම ස්ථානයට ළඟා වී ඇති අතර, පැය ගණනාවක් පුරා ක්‍රියාත්මක වූ මෙහෙයුම් මගින් තුවාලකරුවන් අසල රෝහල් වෙත ඇතුළත් කිරීමට පියවර ගෙන තිබනවා. පසුගිය 2025 වසරේදී ද එරට මාර්ග අනතුරු හේතුවෙන් පුද්ගලයින් 3,838 දෙනෙකු මියගොස් 37,000කට වැඩි පිරිසක් තුවාල ලබා තිබුණා
