2023 නව වසර රට වෙනුවෙන් ආරම්භ කල වැඩපිළිවෙල ජයග්‍රහණයෙන් නිමාවන වසරක් වේවායි ජනාධිපති රනිල් වික්‍රමසිංහ මහතා සුබ පැතුම් එක්කරනවා.
නව වසරක උදාව යනු නව සිතුම් පැතුම්, අධිෂ්ඨානයන් සමඟ ජීවිතය අලුත් කර ගැනීමට ලැබෙන මහඟු අවස්ථාවක් බවයි ජනාධිපතිවරයා පෙන්වා දෙන්නේ.
රටේ සිදූ වූ පෙර නොවූ ආර්ථික කඩාවැටීම හමුවේ සියලු දෙනා මත පැටවී ඇති විශාල බර සහ අප බහුතරයක් අත්විඳින ලද පසුබෑම පිළිබඳ මනා වැටහීමක් තමන් සතු බව ද රනිල් වික්‍රමසිංහ මහතා පවසනවා.
කෙසේ වෙතත් මෙම අයහපත් කාලය පසුකර ඇති බව ජනාධිපතිවරයාගේ විශ්වාසයයි.
2023 නව වසර මෙරට ආර්ථිකයේ නව හැරවුමක් සනිටුහන් කරන තීරණාත්මක වසරක් වනු ඇති බව අවධාරණය කරන ජනාධිපති රනිල් වික්‍රමසිංහ මහතා ස මෘද්ධිමත් ශ්‍රී ලංකාවකට දොරගුළු විවර වන ජයග්‍රාහි වසරකට සුභාශිංසන එක්කර තිබෙනවා.
සකලවිද අභියෝග රැසක් අභිමුව යහපත් රටක් ගොඩ නගන්නට එක්ව කැපවී කටයුතු කිරීම අවශ්‍ය බව අග්‍රාමාත්‍ය දිනේෂ් ගුණවර්ධන මහතා පවසනවා.
අවුරුදු සුබ පැතුම් පණිවුඩයක් නිකුත්කරමින් අග්‍රාමාත්‍යවරයා සඳහන් කලේ ජන ජීවිතය ට බලපාන හා දේශීය ආර්ථිකය ශක්තිමත් කරන උපාය මාර්ග තුල කටයුතු කරමින් නව වසරේ සුබදායි රටක් වෙනුවෙන් කැපවන බවයි.
ආහාර සුරක්ෂිතතාව හා ග්‍රාමීය ආර්ථික පුනර්ජීවනය උදෙසා ප්‍රමුඛත්වය දෙමින් රටේ සංවර්ධනය වෙනුවෙන් රජය සක්‍රීයව දායකත්වය ලබා දෙන බවද සඳහන් කර තිබෙනවා.
සැබවින්ම රට නව වසරේදී අලුත් මාවතකට ගෙන යා හැකි බව විපක්ෂ නයක සජිත් ප්‍රේමදාස මහතා අවධාරණය කළා.
නව වසරට සුභාෂින්සන පණිවුඩයක් නිකුත්කරමින් ඒ මහතා පෙන්වා දෙන්නේ රටේ අනාගතය වෙනුවෙන් ක්‍රියාත්මක කල යුතු වැඩපිළිවෙල පිලිබඳ අවධානය යොමු කල යුතු බවයි.
