මහනුවර ඓතිහාසික ශ්‍රී දළදා මාලිගයේ වාර්ෂික ඇසළ පෙරහර මංගල්‍යයේ සිව්වන කුඹල් පෙරහර අද දින වීථි සංචාරය කිරීමට නියමිතයි. ඒ වෙනුවෙන් ශ්‍රී ලංකා පොලිසිය විසින් විශේෂ ආරක්ෂක වැඩපිළිවෙලක් සහ රථවාහන සැලැස්මක් ක්‍රියාත්මක කෙරෙනු ඇති. අගෝස්තු 18වනදා ආරම්භ වූ ඓතිහාසික ඇසළ පෙරහර මංගල්‍යය අගෝස්තු 28 වනදා දක්වා පැවැත්වෙනවා. මෙම කාලසීමාව තුළ මහජනතාවගේ සහ සංචාරකයින්ගේ ආරක්ෂාව උදෙසා මාර්ග බාධක යෙදවීම, විශේෂ ආරක්ෂක රාජකාරි, මෙන්ම විශේෂ රථවාහන සැලැස්මක් ද පොලිසිය විසින් ක්‍රියාත්මක කරනු ලබනවා. අද පස්වරු 6.40ට දළදා මාලිගාවෙන් ආරම්භ වන සිව්වන කුඹල් පෙරහර, දළදා වීදිය, කොටු ගොඩැල්ල වීදිය සහ රජ වීදිය ඔස්සේ කිලෝමීටර් 1යි මීටර් 270ක දුරක් ගමන් කර නැවත මාලිගාවට ගෙවදීමට නියමිතයි. මේ අතර, මහනුවර ඇසළ පෙරහරේ ගමන් කරන අලි ඇතුන්ට ලේසර් කිරණ එල්ල කරන පුද්ගලයන් එම මොහොතේම අත්අඩංගුවට ගන්නා බව මධ්‍යම පළාත් නියෝජ්‍ය පොලිස්පති සුදත් මාසිංහ මහතා ප්‍රකාශ කරනවා. අලි ඇතුන් බියට පත්වන ආකාරයේ අධික ශබ්ද නළා හැඬවීම මෙන්ම එවැනි භාණ්ඩ රැගෙන පෙරහර මාර්ගයට පැමිණීම ද සම්පූර්ණයෙන්ම තහනම් කර ඇති බවයි ඒ මහතා අවධාරණය කරන්නේ.
