ප්‍රංශ ජාතික දිනය වෙනුවෙන් එරට පැවැත්වෙන හමුදා පෙළපාලියට සහභාගී වීම සඳහා ප්‍රහාරක ගුවන් යානා ඇතුළු හමුදා කණ්ඩායමක් යැවීමට ඉන්දියාව සූදානම් වනවා.
මෙවර ප්‍රංශ ජාතික දිනයේදී විශේෂ ආරාධිතයා ලෙස සහභාගී වීමට නියමිතව සිටින්නේ ද ඉන්දීය අග්‍රාමාත්‍ය නරේන්ද්‍ර මෝදි.
ඒ අනුව ඉන්දීය හමුදා කණ්ඩායක් ද ප්‍රංශ ජාතික දින උත්සවය වෙනුවෙන් සහභාගී වනු ඇති.
මෙම සංචාරය ප්‍රංශය සහ ඉන්දියාව අතර පවතින උපායමාර්ගික හවුල්කාරිත්වයේ 25 වැනි සංවත්සරය ද සනිටුහන් කරමින් සිදුවන්නක් බවයි විදෙස් මාධ්‍ය වාර්තා කළා.
බැස්ටිල් දිනය ලෙස හැඳින්වෙන ප්‍රංශයේ ජාතික දිනය යෙදී තිබෙන්නේ ජූලි මස 14 වනදාටයි.
2016 වසරේ ඉන්දීය ජනරජ දින උත්සවය සඳහා ප්‍රංශයේ එවක ජනාධිපති ෆ්‍රැන්කොයිස් හෝලන්ඩ් සහභාගී වුණා.
එම අවස්ථාවේ පැවැති ඉන්දීය හමුදා පෙළපාලිය සඳහා ප්‍රංශ හමුදා කණ්ඩායමක් ද ඉන්දියාව වෙත පැමිණ තිබෙනවා.
