Author: Dhanushka

අමාත්‍ය මහින්ද අමරවීර, ලසන්ත අලගියවන්න සහ පාර්ලිමේන්තු මන්ත්‍රී දුමින්ද දිසානායක යන මහත්වරුන් ශ්‍රී ලංකා නිදහස් පක්ෂයේ තනතුරුවලින් ඉවත් කිරීමට ගනු ලැබූ තීරණය ක්‍රියාත්මක වීම වළක්වාලමින් නිකුත් කර තිබෙන වාරණ නියෝගය මැයි මස 08 වනදා දක්වා දීර්ඝ කරන ලෙස කොළඹ දිසා අධිකරණය අද නියම කළා. තමන්ව ශ්‍රී ලංකා නිදහස් පක්ෂයෙන් ඉවත් කිරීමට එරෙහිව එම අමාත්‍යවරු විසින් ගොනුකළ පැමිණිලි අද කැඳවනු ලැබූ අවස්ථාවේදීයි කොළඹ දිසා අධිකරණය මෙම නියෝග නිකුත් කරනු ලැබුවේ.

පුත්තලමේ ක්වාසි අධිකරණයේ විනිසුරුවරයෙකු රුපියල් 5,000 ක අල්ලසක් ලබාගැනීමේ දී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන්ගේ අත්අඩංගුවට පත් වුණා. පසුව ඔහුව පුත්තලම මහෙස්ත්‍රාත් අධිකරණයට ඉදිරිපත් කිරීමෙන් අනතුරුව මැයි මස 6 වනදා දක්වා රක්ෂිත බන්ධනාගාරගත කර තිබෙනවා. සැකකරු මෙම අල්ලස් මුදල ඉල්ලා තිබෙන්නේ පුත්තලම ක්වාසි උසාවියෙන් ලබා දී තිබූ දික්කසාද නඩු තීන්දුවකට අදාළ වූ දික්කසාද සහතිකයක් ලබාදීම සඳහායි.

දිවයිනේ ජාතික පාසල්වල පවතින සිංහල, දෙමළ සහ ඉංග්‍රීසි මාධ්‍ය ගුරු පුරප්පාඩු සඳහා උපාධිධාරීන් බැඳවා ගැනීම සම්බන්ධයෙන් අධ්‍යාපන අමාත්‍යාංශය විශේෂ නිවේදනයක් නිකුත් කර තිබෙනවා. ඒ අනුව පසුගිය මාර්තු 2 වන දින පවත්වන ලද තරග විභාගයේ ප්‍රතිඵල අනුව බඳවා ගැනීමේ සම්මුඛ පරීක්ෂණ අප්‍රේල් මස 29 වන දින සිට මැයි මස 9 වන දින දක්වා ඉසුරුපාය අධ්‍යාපන අමාත්‍යාංශයේ දී පැවැත්වීමට නියමිතයි. සුදුසුකම් ලැබූවන්ගේ නාම ලේඛනය හා කැඳවීමේ ලිපිය අධ්‍යාපන අමාත්‍යාංශයේ වෙබ් අඩවියේ පළ කර ඇති බව ද අමාත්‍යාංශය නිවේදනය කර තිබෙනවා

ශ්‍රී ලංකා මහ බැංකුව විසින් තහනම් මූල්‍ය යෝජනා ක්‍රම පවත්වාගෙන යන තවත් ආයතන 08 ක් නම් කර තිබෙනවා. නිවේදනයක් නිකුත් කරමින් ශ්‍රී ලංකා මහ බැංකුව සඳහන් කරන්නේ එසේ හඳුනාගත් ආයතනවලට එරෙහිව නඩු පැවරීමට නීතිපතිවරයාගේ සහාය ඉල්ලා ඇති බවයි. කෙසේ නමුත් මහ බැංකුව පවසන්නේ පිරමීඩ යෝජනා ක්‍රමවලට සහභාගී වීම දඩුවම් ලැබිය හැකි වරදක් බවයි.

ජනාධිපති රනිල් වික්‍රමසිංහ මහතා සහ ශ්‍රී ලංකා පොදුජන පෙරමුණේ හිටපු ජාතික සංවිධායක බැසිල් රාජපක්ෂ මහතා අතර හමුවක් අද සිදුවනවා. දේශපාලන ආරංචි මාර්ග සදහන් කළේ අද පස්වරු 04 ට මෙම හමුව සිදුවනු ඇති බවයි. ජනාධිපතිවරයාගේ ඉල්ලීමකට අනුව අදාල හමුව සිදුවන අතර එය තීරණාමත්ක වනු ඇති බවද එම ආරංචි මාර්ග කියා සිටියා. ජනාධිපතිවරණය සම්බන්ධයෙන් මතුව ඇති ගැටලු පිලිබද මෙහිදි අවධානය යොමු කිරීමට නියමිතව ඇති බව සදහන් . මීට පෙරද ජනාධිපති රනිල් වික්‍රමසිංහ මහතා සහ බැසිල් රාජපක්ෂ මහතා අතර සාකච්ඡා වට කිහිපයක් පැවති අතර ඒවා එකගතාවයකින් තොරවයි අවසන් වුනේ .

ඉරාන ජනාධිපති ඊබ්‍රහිම් රයිසි මහතා එළඹෙන බ්‍රහස්පතින්දා දින මෙරට සංචාරය කිරීමට නියමිත බව ඉරාන මාධ්‍ය පවසනවා. ඉරාන ජනාධිපතිවරයා පාකිස්ථානයේ සිදුකරන ලද සංචාරකයකින් අනතුරුව මෙලෙස ශ්‍රී ලංකාවට පැමිණීමට නියමිත බවයි එම වාර්තාවල දැක්වෙන්නේ. මේ අනුව අනිද්දා දින ජනතා අයිතියට පත් කරන උමා ඔය බහුකාර්ය සංවර්ධන ව්‍යාපෘතිය විවෘත කිරීමේ උත්සවයට සහභාගි වීම සදහා ජනාධිපති රනිල් වික්‍රමසිංහ මහතා සිදුකරන ලද ආරාධනයකට අනුවයි ඉරාන ජනාධිපති ඊබ්‍රහිම් රයිසි මහතා ශ්‍රී ලංකාවට පැමිණීමට නියමිතව ඇත්තේ.

ෆොක්ස් හිල් සුපර් ක්‍රොස් අනතුර පිළිබඳව සොයා බැලීමට මේජර් ජෙනරාල්වරයෙකුගේ ප්‍රධානත්වයෙන් 7 දෙනෙකුගෙන් යුත් විමර්ශන මණ්ඩලයක් පත් කර ඇති බව යුද හමුදාව පවසනවා . 21 වැනිදා සිදු වූ මෙම අනතුරෙන් හත්දෙනෙකුට දිවි අහිමි වුණා. ජීවිතක්ෂයට පත් වූ පුද්ගලයින්ගේ අවසන් කටයුතු මෙම තරගාවලිය සංවිධාන කළ ශ්‍රී ලංකා ඔටෝමොබයිල් ක්‍රීඩා සංගමය සහ ශ්‍රී ලංකා යුද හමුදාවේ අනුග්‍රහය යටතේ සිදු කිරීමට නියමිත බවයි යුද හමුදාව සඳහන් කළේ. මෙම අනතුරින් තුවාල ලැබූ 21 දෙනෙකු දියතලාව සහ බදුල්ල රෝහල් වෙත ඇතුළත් කෙරුණු අතර ඉන් තිදෙනෙකු ප්‍රතිකාර ලබා පිටව ගොස් තිබෙනවා. සෙසු 18 දෙනාගෙන් 11 දෙනෙකු දියතලාව මූලික රෝහලේත් 07 දෙනෙකු බදුල්ල රෝහලේත් ප්‍රතිකාර ලබන…

අද දින හිටපු අමාත්‍ය ජොන්ස්ටන් ප්‍රනාන්දු මහතා අ`ඵ මතින් නැගී සිටින දවසක් බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී සුමිත් උඩුකුඹුර මහතා පවසනවා. රාජපක්ෂ කඳවුර ආරක්ෂා කරමින් විවිධ දේශපාලන පක්ෂ විසින් මඩ ප්‍රචාර පතුරුවා හරින විටත් ජොන්ස්ටන් ප්‍රනාන්දු මහතා නොසැලී සිටීමට කටයුතු කළ නායකයෙකු බවයි ඒ මහතා කියා සිටියේ. ආණ්ඩු පක්ෂයේ සංවිධායකවරයා ලෙස අතිදක්ෂ නායකත්වයක් සිය පක්ෂයට ලබාදෙමින් කටයුතු කරන විට බොහෝ පිරිස් හට එය ඉවසීමට නොහැකි වූ බවටයි සුමිත් උඩුකුඹුර මහතා කියා සිටියේ. කිසිදු දිනෙක ඡන්දයකින් පත්වීමට නොහැකි පුද්ගලයන් විසින් කුමන මඩ ප්‍රචාර දියත් කළද නොසැලි ඉදිරියට යාමේ හැකියාවක් ජොන්ස්නටන් ප්‍රනාන්දු මහතාට පවතින බව ඒ මහතා පවසා සිටියා. දේශපාලන…

මැලේසියාවේ හමුදා පුහුණුවීමක් අතරතුර හෙලිකොප්ටර් යානා දෙකක් අනතුරට පත්ව තිබෙනවා. එම අනතුරින් 10 දෙනෙකු මියගොස් ඇති බව විදෙස් මාධ්‍ය වාර්තා කරන්නේ. එරට නාවික හමුදාවේ සැමරුම් උත්සවයක් සඳහා පෙරහුරුවීමක් අතරතුර හෙලිකොප්ටර් යානා දෙකක් එලෙස ගුවනේදී ගැටී මෙම අනතුර සිදුව තිබෙනවා. අනතුරට පත්වන අවස්ථාවේ හෙලිකොප්ටර් යානා දෙකෙහි කාර්යමණ්ඩල සාමාජිකයින් 10 දෙනෙකු පමණ සිට ඇති බව ද සදහන්.

සංචාරක බටහිර ඉන්දීය කොදෙව් කාන්තා කණ්ඩායම සහ පාකිස්ථාන කාන්තා කණ්ඩායම අතර තෙවැනි එක්දින ක්‍රිකට් තරගය අද පැවැත්වෙනවා. මෙම තරගය මෙරට වේලාවෙන් පස්වරු 4 ට ආරම්භ වීමට නියමිතයි. දෙරට අතර පැවති පළමු තරග 2 ජයග්‍රහණය කළ බටහිර ඉන්දීය කොදෙව් කාන්තා කණ්ඩායම මේ වන විට තරගාවලිය ජයග්‍රහණය කර තිබෙනවා.