Author: accioAdmin

පතරොම් තුවක්කු නිකුත් කිරීමේ සීමාව අක්කර 05 සිට අක්කර 02 දක්වා අඩු කිරීමට කෘෂිකර්ම අමාත්‍යාංශයේ අවදානය යොමුව ඇති බව සඳහන්. වනසතුන්ගෙන් සිදුවන වගා හානි වළක්වා ගැනීම සඳහා ගොවීන් කළ ඉල්ලීම් සලකා බලමිනුයි එම තීරණය ගෙන ඇත්තේ. මේ පිළිබඳ කැබිනට් අනුමැතිය ලබා ගැනීම සදහා අමාත්‍ය මණ්ඩල පත්‍රිකාවක් සකසන්නැයි, අමාත්‍ය මහින්ද අමරවීර මහතා අමාත්‍යංශ ලේකම්වරයාට උපදෙස් ලබා දී තිබෙනවා.

දකුණු පළාත් සුහුරු පන්ති කාමර ව්‍යාපෘතිය යටතේ පාසල් ශිෂ්‍ය ශිෂ්‍යාවන් වෙත සුහුරු පංති කාමර 200ක් හා ටැබ් පරිගණක 2000ක් ලබාදීම අද සිදු කෙරුනා. ඒ ජනාධිපති රනිල් වික්‍රමසිංහ මහතාගේ ප්‍රධානත්වයෙන්. දකුණු පළාත් සුහුරු පන්ති කාමර ව්‍යාපෘතියට වැය කර ඇති මුදල රුපියල් මිලියන 300කි. කර්මාන්ත හා සෞඛ්‍ය අමාත්‍ය රමේෂ් පතිරණ මහතාගේ ඉල්ලීම මත ඉන්දීය සහයෝගිතාව ඇතිව ව්‍යාපෘතිය ක්‍රියාත්මක කෙරෙනවා.

ඓතිහාසික රුහුණු මහා කතරගම දේවාලයේ වාර්ෂික ඇසල පෙරහැර මංගල්‍යය හේතුවෙන් කතරගම පුදබිම අවට පාසල් 05ක් වසා දැමීමට තීරණය කර තිබෙනවා. කතරගම ප්‍රාදේශීය ලේකම් කාර්යාලය පවසන්නේ පෙරහැර මංගල්‍යය සඳහා සහභාගි වන ආරක්ෂක අංශයේ නිලධාරීන්ගේ සහ අනෙකුත් කණ්ඩායම් වල නවාතැන් පහසුකම් සදහා මෙම පාසල් වසා දැමීම සිදුකරන බවයි. ඒ අනුව දෙටගමුව කනිෂ්ඨ විද්‍යාලය,කතරගම ජාතික පාසල,සෙල්ල කතරගම මහා විද්‍යාලය,සශීන්ද්‍ර කුමාර ආදර්ශ ප්‍රාථමික විද්‍යාලය සහ ගෝතමී ගම කනිෂ්ඨ විද්‍යාලය එලෙස වසා තැබෙන බව සඳහන්. අදින් ඇරඹෙන කතරගම පෙරහැර මංගල්‍ය අද සිට දින 16ක් පුරාවට පෙරහැර පැවැත්වීමට නියමිත අතර, ලබන 22 වනදා අලුයම මැණික් ගඟේ දිය කැපීමෙන් පසු නිමාවට පත්වීමට නියමිතයි.

යුක්තිය මෙහෙයුමේ දෙවන අදියර යටතේ ඊයේ දිනයේ සිදු කල වැටලීම් 778 කට අදාලව සැකකරුවන් 766ක් සහ සැකකාරියන් 11 දෙනෙකු අත්අඩංගුවට ගෙන තිබෙනවා. ඉන් සැකකරුවන් 52 දෙනෙක් වැඩිදුර විමර්ශනය සඳහා රඳවා තබා ගැනීමේ නියෝග ලබා ගැනීමට නියමිතයි. තවත් සැකකරුවන් 9 දෙනෙකුගේ වත්කම් විමර්ශනය කිරීමට නියමිත අතර සැකකරුවන් 71 දෙනෙකු පුනුරුත්තාපනය සඳහා යොමු කිරීමට කටයුතු කර තිබෙනවා.

ගිනිගත්හේන මිල්ලගහමුල ප්‍රදේශයේ ඉදි කරමින් තිබු තෙමහල් ගොඩනැගිල්ලක් අද අලුයම නායගොස් තිබෙනවා. ගිනිගත්හේන ප්‍රදේශයට ඊයේ සිට ඇද හැලෙන අධික වර්ෂාවත් සමග හැටන් කොළඹ ප්‍රධාන මාර්ගයට මායිම්ව ඉදි කරමින් පැවති එම තෙමහල් ගොඩනැගිල්ල අඩි 200ක් ප්‍රපාතයට නායගොස් ඇති බව සඳහන්. ගොඩනැගිල්ල නාය යන අවස්තාවේ එහි කිසිවෙකු සිට නොමැති බවයි වාර්තාවන්නේ. නිසි ප්‍රමිතියකින් තොරව එම ගොඩනැගිල්ල ඉදි කරමින් පැවතිම හේතුවෙන් ගොඩනැගිල්ල නායගොස් ඇති බවට සැක මතුව තිබෙනවා.

අල්ලස් ලබා ගැනීමට තැත්කළ පොලිස් පරීක්ෂකවරයකු සහ පොලිස් කොස්තාපල්වරයකු අත්අඩංගුවට ගෙන තිබෙනවා. අත්අඩංගුවට ගත් පුද්ගලයකු අධිකරණයට ඉදිරිපත් නොකර සිටීම සඳහා සැකකාර නිලධාරින් දෙදෙනා මෙලෙස අල්ලස් ඉල්ලා තිබෙන අතර එහි පළමු කොටස ලෙස රුපියල් ලක්ෂ 3ක මුදලක් ලබාගෙන ඇති බව සඳහන්. එහි දෙවන කොටස ලෙස රුපියල් එක්ලක්ෂ පනස් හතරදහස් දෙසීයක මුදලක් කොළඹ අපරාධ කොට්ඨාසයේ විමර්ශන ඒකකය තුළදී ලබා ගැනීමේදී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරින් විසින් ඔවුන් අත්අඩංගුවට ගැනුනා.

රුහුණු කතරගම දේවලයේ වාර්ෂික ඇසළ උත්සවය නිමිත්තෙන්, කතරගම ප්‍රාදේශීය ලේකම් කොට්ඨාශය තුළ සියළුම මත්පැන් අලෙවිසැල් දින 17ක් වසා තැබීමට කටයුතු කර තිබෙනවා. ඒ අනුව අද සිට ලබන 22වනදා දක්වා සියළු මත්පැන් අලෙවිසැල් වසා තැබෙනු ඇති බවයි සුරාබදු දෙපාර්තමේන්තුව නිවේදනය කලේ. ඓති­හා­සික රුහුණු කත­ර­ගම මහා දේවා­ලයේ 2024 වාර්ෂික ඇසළ මංගල්‍යය අදින් ඇරඹුනා.

බැද්දේවෙල සිට බණ්ඩාරවෙල බලා ධාවනය වෙමින් තිබූ ශ්‍රී ලංගම බස්‍ රථයක් අනතුරට ලක්වීම හේතුවෙන් පුද්ගලයින් පස් දෙනෙකු රෝහල් ගත කර තිබෙනවා. බස් රථය හල්පේ ප්‍රදේශයේදී මාර්ගයෙන් ඉවතට පැන බෝක්කුවක් තුලට කඩා ගෙන යාමෙන් මෙම අනතුර සිදුව ඇති බව සඳහන්. අනතුර සිදුවන අවස්ථාවේ බස් රථය තුල මගීන් 18 දෙනෙකු පමණ සිට තිබෙනවා. ඉන් පස් දෙනෙකු තුවාල ලබා ඇති අතර ඔවුන් ප්‍රතිකාර සඳහා දෙමෝදර රෝහලට ඇතුලත් කර ඇති බව මෙම අනතුර හේතුවෙන් පස්දෙනකු තුවාල ලබා දෙමෝදර රෝහලට ඇතුළත් කළ බව‍යි ඇල්ල පොලිසිය පැවසුවේ.

මින් ඉදිරියට යලිත් වරක් තමා ශ්‍රී ලංකා නිදහස් පක්ෂයේ මහ ලේකම්වරයාගේ තනතුර හොබවන බව පවසමින් පාර්ලිමේන්තු මන්ත්‍රී දයාසිරි ජයසේකර මහතා එම ධුරයේ වැඩ භාරගෙන තිබෙනවා. අප වාර්තාකරු සඳහන් කලේ පක්ෂ මුලස්ථානය ඉදිරිපිටදී මන්ත්‍රීවරයා සිය ධුරයේ වැඩ භාරගත් බවයි. පොලීසිය විසින් මන්ත්‍රීවරයාට පක්ෂ මුලස්ථානය තුලට ඇතුළුවීමට අවසර නොදීම හේතුවෙනුයි ඔහු මෙලෙස පක්ෂ මුලස්ථානය ඉදිරිපිටදී වැඩ භාරගෙන ඇත්තේ.

ටින් අංකය ලබාගත් පුද්ගලයන්ට බදු ගෙවන ලෙස දේශී‍ය ආදායම් දෙපාර්තමේන්තුව මගින් ලිපි හෝ කෙටි පණිවිඩ ලැබුණ ද තමන් මාසික ආදායම රුපියල් ලක්ෂයේ සීමාව ඉක්මවා නොමැති නම් බදු ගෙවීමෙන් වැළකී සිටිය හැකි බව මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා. අමත්‍යවරයා සඳහන් කරන්නේ ඊට අදාලව බදු ගෙවන්නන් හඳුනාගැනීමේ අංකය නොහොත් ටින් අංකය ලබාගත් පුද්ගලයින් විසින් ලිඛිතව දැනුම් දීමක් සිදු කල යුතු බවයි. එමෙන්ම මේ සම්බන්ධයෙන් ළඟම පිහිටි දේශීය ආදායම් දෙපාර්තමේන්තු ප්‍රාදේශීය කාර්යාලයට දැනුම් දිය හැකි බවයි අමත්‍යවරයා සඳහන් කලේ. මේ වන විට ටින් අංකය ලබාගෙන ඇති පුද්ගලයින්ගේ සංඛ්‍යාව ලක්ෂ 23ක් වන අතර ජූනි මස පමණක් පුද්ගලයන් ලක්ෂ 13ක් එම අංකය ලබා…