රජයේ නව බදු ප්රතිපත්තියට විරෝධය දක්වමින් ක්ෂේත්ර රැසක වෘත්තීය සමිති ගණනාවක් අද දිනයේදී වෘත්තීය සමිති ක්රියාමාර්ගයක නිරත වනවා.
සෞඛ්ය, වරාය, තෙල්, විදුලි සහ බැංකු ඇතුළු ක්ෂේත්ර රැසක් මේ සදහා එක්වීමට නියමිතයි .
එමෙන්ම අද පැවැත්වෙන වෘත්තීය සමිති ක්රියාමාර්ගය සඳහා සිය සහයෝගය දැක්වීමට තීරණය කළ බව රජයේ වෛද්ය නිලධාරින්ගේ සංගමය නිවේදනය කළා.
රෝගී සත්කාරක සේවාවට බරපතල ලෙස හානි නොවන අයුරින් විරෝධතාවය පල කරන බවයි සෞඛ්ය වෘත්තීයවේදීන්ගේ සංගමයේ සභාපති රවී කුමුදේශ් මහතා සදහන් කලේ .
එමෙන්ම අද දිනයේදී ගුරු -විදුහල්පති වෘත්තීය සමිති කිහිපයක්ද කළු විරෝධතාවක් ප්රකාශ කර තිබෙනවා.
ලංකා ගුරු සංගමය සඳහන් කළේ ගුරුවරුන් සහ විදුහල්පතිවරුන් කළු ඇදුමෙන් සැරසී අද පාසල් වෙත පැමිණෙන බවයි.
මේ අතර අද දිනයේදී දිවයින පුරා සියලු විශ්වවිද්යාලවල අධ්යයන කටයුතුවලින් ඉවත්වී සිය විරෝධය පළකරන බව විශ්වවිද්යාල ආචාර්යවරුන්ගේ සමිති සම්මේලනය ප්රකාශ කළා.
එමෙන්ම ලෙඩ නිවාඩු වාර්තා කරමින් තෙල්, විදුලි, ජල ක්ෂේත්රවල වෘත්තීය සමිති ද අද දිනයේදී සිය විරෝධතාව පළකිරීමට නියමිතයි .
වරාය වෘත්තීය සමිති විසින් අකුරට වැඩ කිරීමේ වෘත්තීය ක්රියාමාර්ගයක් ආරම්භ කිරීමට නියමිත අතර ඒ හරහා භාණ්ඩ ගොඩබෑම්, නැව් පැමිණීම් සහ පිටවීම් සම්පූර්ණයෙන් අඩාල වනු ඇති බවයි ඔවුන් කියා සිටියේ.
මේ අතර රජයේ නව බදු ප්රතිපත්තියට විරෝධය දක්වමින් මහබැංකු සේවකයින්, රජයේ සහ පෞද්ගලික බැංකුද වෘත්තීය ක්රියාමාර්ගවල නිරත වනවා.
ඒ හේතුවෙන් අද රාජ්ය සහ පෞද්ගලික බැංකු බොහොමයක කටයුතු අඩාල වනු ඇති බවයි වෘත්තීය සමිති පැවසූවේ .කෙසේ වෙතත් මහ ජන බැංකුවේ සහ ලංකා බැංකුවේ සභාපතිවරුන් ඊයේ සදහන් කලේ උපරිම සේවාවක් සැලසීම සඳහා තම බැංකු සූදානම් බවයි.
දුම්රිය වෘත්තීය සමිති සන්ධානය, දුම්රිය රියදුරු සංගමය ඇතුළු දුම්රිය වෘත්තීය සමිති ගණනාවක්ම වර්ජනයේ නිරත වීමට නියමිත වනවා.
කෙසේ නමුත් සාමාන්ය පරිදි දුම්රිය ධාවන කටයුතු අද දිනයේදී සිදුවන බව දුම්රිය නියෝජ්ය සාමාන්යාධිකාරි වී.එස්. පොල්වත්තගේ මහතා ප්රකාශ කළා.
මිට අමතරව මෙම වෘත්තීය සමිති ක්රියාමාර්ගයට සිය සහය පළනොකරන බවයි ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා කියා සිටියේ.
මේ අතර වරාය, ගුවන් තොටුපොළ සහ මගී ප්රවාහන සේවා හා ආශ්රිත සේවාවන් අත්යවශ්ය සේවාවන් බවට පත් කරමින් ජනාධිපති රනිල් වික්රමසිංහ මහතා විසින් ගැසට් නිවේදනයක් නිකුත් කරනු ලැබුවා.
වෘත්තීය සමිති විසින් වැඩවර්ජනයක් අද වැඩවර්ජනයක් ප්රකාශයට පත් කර ඇති පසුබිමකයි මෙම නිවේදනය නිකුත් කර ඇත්තේ.
එමෙන්ම මිට පෙර විදුලිය ඉන්ධන සහ සෞඛ්ය යන සේවා අත්යවශ්ය සේවා ලෙස නම් කරමින් ජනාධිපතිවරයා විසින් ගැසට් නිවේදනයක් ද නිකුත් කර තිබුණා .
