කොළඹ වරායේ ඉඩම් කැබලි කිහිපයක් ආයෝජකයකු සඳහා ලබාදීමට කටයුතු ආරම්භ කර තිබෙනවා.
නැව්වලට සහ ගුවන් යානාවලට සැපයීම සඳහා ඉන්ධන ගබඩා කිරීමට ඉඩම් කැබැලි හතරක් ආයෝජකයකුට ලබාදීමට කටයුතු කරගෙන යන බවයි වරාය, නාවික සහ ගුවන් සේවා අමාත්‍ය නිමල් සිරිපාල ද සිල්වා මහතා සඳහන් කළේ.
මින් එක් ඉඩම් කොටසක් ගුවන්යානා ඉන්ධන ගබඩා කිරීම සඳහා ලබා දෙන බවත් , මේ කටයුතු සඳහා දැනටමත් අභිලාෂ කැඳවා ඇති බවත් අමාත්‍යවරයා කියා සිටියා.
රටක් දියුණු කිරීම සඳහා මෙවැනි ආයෝජන අත්‍යවශ්‍ය බවයි ඒ මහතා අවධාරණය කරන්නේ.
පසුගිය කාලයේ පැවති අරගල හේතුවෙන් කොළඹ වරයට පැමිණීමට තිබු නැව් දාහතක් හැරී ගිය බවයි නිමල් සිරිපාල ද සිල්වා මහතා කියා සිටියේ.
වැඩිදුරටත් අදහස් දක්වමින් අමාත්‍යවරයා සඳහන් කලේ කොළඹ වරාය විකිණීම සඳහා කිසි ලෙසකින්වත් නොසිතන බවයි.
මේ අතර ත්‍රිකුණාමල වරාය වෙළෙඳ වරායක් ලෙස දියුණු කිරීමට කටයුතු කරගෙන යන බවත් අගය එකතු කරන ලද ඉල්මනයිට් ආනයනය කිරීම සඳහා ත්‍රිකුණාමල වරාය යොදාගැනීමට ඉදිරියේදී බලාපොරොත්තු වන බවත් අමාත්‍යවරයා සඳහන් කළා.
