රජය විසින් දිළිඳුබව තුරන් කිරීම සඳහා ක්‍රියාත්මක කර ඇති ප්‍රජා ශක්ති වැඩසටහනට එක්සත් ජාතීන්ගේ සංවිධානය ප්‍රසාදය පලකර තිබෙනවා.
ඒ එක්සත් ජාතීන්ගේ සංවිධානයේ ශ්‍රී ලංකා නේවාසික සම්බන්ධීකාරක මාර්ක් ඇන්ඩෘ ෆෙන්ච් මහතා හා ග්‍රාමීය සංවර්ධන, සමාජ ආරක්ෂණ හා ප්‍රජා සවිබලගැන්වීම් අමාත්‍ය මහාචාර්ය උපාලි පන්නිල මහතා අතර පැවති හමුවකදීයි.
අමාත්‍යාංශ පරිශ්‍රයේ පැවති මෙම හමුවට එක්සත් ජාතීන්ගේ සංවිධානයේ ශ්‍රී ලංකා නිත්‍ය නියෝජිත ආයතනයේ සාමය හා සංවර්ධන උපදේශක පැට්‍රික් මැක් කාර්ති මහතා සහ සාමය සහ සංවර්ධන විශ්ලේෂක නෙත්මි මැදවල මහත්මිය ඇතුළු නියෝජිත පිරිසක් එක්ව සිටියා.
මෙහිදී රාජ්‍ය නොවන සංවිධාන සම්බන්ඳයෙන් වන ජාතික මහලේකම් කාර්යාලය , ග්‍රාමීය සංවර්ධන, සමාජ ආරක්ෂණ හා ප්‍රජා සවිබලගැන්වීම් අමාත්‍යාංශයට ඒකාබද්ධ කිරීම පිලිබඳව නියෝජිත පිරිස ප්‍රශංසාව පළ කළා.
ඉදිරියේදී රජයේ සංවර්ධන ක්‍රියාවලියට රාජ්‍ය නොවන සංවිධානවල පූර්ණ ක්‍රියාකාරිත්වය ඵලදායිව දායකකර ගැනීමට අවශ්‍ය පූර්ණ සහයෝගය ලබා ගැනීම පිළිබදවද මෙහිදී අදහස් පල වුණා.
එක්සත් ජාතීන්ගේ නිත්‍ය නියෝජිත ආයතනය විසින් ශ්‍රී ලංකාවේ ආබාධ සහිත පුද්ගලයන් සම්බඳයෙන් සිදු කරන තත්ව විශ්ලේෂණ අධ්‍යනයේ තොරතුරු සහ නිර්දේශ ක්‍රියාත්මක කිරීම පිළිබඳව සුදුසු පියවරයන් සම්බන්ධයෙන් ද සාකච්ඡා කළා .
මෙරට ආබාධ සහිත ප්‍රජාව සඳහා නව රැකියා උත්පාදන ප්‍රවේශයන් සහ අවස්ථා උත්පාදන පිළිබඳවද ඉදිරියේදී සහයෝගයෙන් කටයුතු කළ යුතු බවට ද මෙහිදී සාකච්ඡා කෙරුණා.
මෙම අවස්තවට ග්‍රාමීය සංවර්ධන, සමාජ ආරක්ෂණ හා ප්‍රජා සවිබලගැන්වීමේ අමාත්‍යාංශයේ ලේකම් සම්පත් මන්ත්‍රිනායක මහතා ඇතුළු අමාත්‍යාංශ නිළධාරීන් පිරිසක් එකව සිටියා.
