පාර්ලිමේන්තු මන්ත්‍රී දයාසිරි ජයසේකර මහතාගේ ශ්‍රී ලංකා නිදහස් පක්ෂ සාමාජිකත්වය තහනම් කර තිබෙනවා.
ශ්‍රී ලංකා නිදහස් පක්ෂය දැරූ සියලු තනතුරුවලින් තමා ඉවත් කර ඇති බවට මෛත්‍රීපාල සිරිසේන මහතා විසින් දැනුම් දී ඇති බව දයාසිරි ජයසේකර මහතා ටුවිටර් පණිවුඩයක් නිකුත් කරමින් සඳහන් කර තිබෙනවා.
කෙසේ වෙතත් තමන් තවදුරටත් පක්ෂපාතිව කටයුතු කරන බවද දයාසිරි ජයසේකර මහතා එම ටුවිටර් පණිවුඩයෙන් දන්වා තිබෙනවා.
එමෙන්ම දයාසිරි ජයසේකර මහතා පැවසුවේ පක්ෂ සභාපතිවරයාගේ තීරණය අභියෝගයට ලක් කරමින් නීතිඥවරයෙකු මාර්ගයෙන් අද පස්වරුවේ අධිකරණයට පෙත්සමක් ඉදිරිපත් කරන බවයි.
පක්ෂයේ සභාපති හිටපු ජනාධිපති මෛත්‍රීපාල සිරිසේන මහතාගේ අත්සනින් යුත් ලිපියක් දයාසිරි ජයසේකර මහතා වෙත යොමු කරමින් අදාළ තහනම් කිරීම සම්බන්ධයෙන් දැනුවත් කර තිබෙනවා.
ඒ් අනුව ශ්‍රී ලංකා නිදහස් පක්ෂයේ මහලේකම් ධුරයෙන්ද දයාසිරි ජයසේකර මහතා ඉවත් කර තිබෙනවා.
මේ සම්බන්ධයෙන් දයාසිරි ජයසේකර මහතාගෙන් කළ විමසීමකදී කියා සිටියේ ඉවත් කිරීමට අදාළ ලිපිය ඊයේ(05) දින තමා වෙත ලැබුණු බවයි.
ජයසේකර මහතාට එරෙහිව විනය පරීක්ෂණයක් පැවැත්වෙන බවත් ඉදිරි දින 14 ඇතුළත විනය කඩ කිරීම සම්බන්ධයෙන් වන චෝදනා පත්‍රය එවීමට කටයුතු කරන බවත් පක්ෂ සභාපති මෛත්‍රීපාල සිරිසේන මහතාගේ අත්සනින් යුතුව නිකුත් කර ඇති ලපියේ දැක්වෙනවා.
ශ්‍රී ලංකා නිදහස් පක්ෂයේ ව්‍යවස්ථාව අනුව එහි 15 වන වගන්තියේ පක්ෂ සභාපතිවරයා වෙත පැවරි ඇති බලතල ප්‍රකාරව මෙම තීරණය ගත් බවටයි මෛත්‍රීපාල සිරිසේන මහතා විසින් අදාළ නිවේදනයේ දක්වා ඇත්තේ.
ඒ අනුව නිදහස් පක්ෂයේ නව මහලේකම්වරයා ලෙස පක්ෂයේ වැඩබලන ලේකම්වරයා ලෙස කටයුතු කළ සරත් ඒ්කානායක මහතා පත් කිරීමට නියමිතව තිබෙනවා.
මෛත්‍රීපාල සිරිසේන මහතා විසින් තමාට කැදවීමක් කර ඇති බවද සරත් ඒ්කනායක මහතා කියා සිටියා.
මේ අතර ශ්‍රී ලංකා නිදහස් පක්ෂ ප්‍රධාන කාර්යාලය වසා දමා ඇති බව වාර්තා වනවා.
ශ්‍රී ලංකා නිදහස් පක්ෂයේ සභාපති මෛත්‍රීපාල සිරිසේන මහතා විසින් පාර්ලිමේන්තු මන්ත්‍රී දයාසිරි ජයසේකර මහතාගේ පක්ෂ සාමාජිකත්වය තහනම් කරමින් යැවූ ලිපිය පහතින් දැක්වේ.
