තලාතුඔය සහ හම්බේගමුව පොලිස් වසම්වල සිදුකළ ඝාතන දෙකකින් පුද්ගලයින් දෙදෙනෙකු මියගොස් තිබෙනවා.
ඊයේ එම ඝාතන සිදුකර ඇති බව පොලීසිය පවසනවා.
තලාතුඔය, අංකෙලිපිටිය හන්දිය ප්රදේශයේ පුද්ගලයෙකුට පහරදීම හේතුවෙන් තුවාල ලබා තලාතුඔය රෝහලට ඇතුළත් කිරීමෙන් පසු මියගොස් තිබෙනවා.
එලෙස මියගොස් ඇත්තේ, තලාතුඔය ප්රදේශයේ පදිංචිව සිටි 75 හැවිරිදි පුද්ගලයෙක්.
ඉඩම් ආරවුලක් හේතුවෙන් ඇති වූ බහින්බස්වීමක් දුරදිග යාමෙන් පුද්ගලයෙකු විසින් ගලකින් හිස ප්රදේශයට පහරදී මෙම ඝාතනය සිදුකර ඇති බවට දැනට සිදුකරන ලද විමර්ශනයේදී අනාවරණය වී ඇතැයි පොලීසිය පවසනවා.
වයස අවුරුදු 42ක් වන සැකකරු අත්අඩංගුවට ගෙන ඇති අතර තලාතුඔය පොලීසිය වැඩිදුර විමර්ශන සිදු කරනු ලබනවා.
මේ අතර හම්බේගමුව, අලුත්වැව ප්රදේශයේදී පුද්ගලයින් දෙදෙනෙකුට පහරදී එක් පුද්ගලයෙකු ඝාතනය කර තිබෙනවා.
එලෙස මියගොස් ඇත්තේ, කල්තොට, බලංගොඩ ප්රදේශයේ පදිංචිව සිටි 51 හැවිරිදි පුද්ගලයෙක්.
මරණකරු තවත් කිහිපදෙනෙකු සමඟ මත්පැන් පානය කර ත්රීරෝද රථයකින් ගමන් කරමින් සිටයදී ඇති වූ ආරවුලක් හේතුවෙන් ත්රීරෝද රථය මඟ නවතා ඇති බවත්, එම අවස්ථාවේ ත්රීරෝද රථයේ සිටි පුද්ගලයෙකු විසින් මරණකරුට හා එහි සිටි තවත් පුද්ගලයෙකුට මාර්ගයේ තිබූ ගලකින් පහරදී ඇති බවත්, විමර්ශනයේදී අනාවරණය වී තිබෙනවා.
තුවාලකරුවන් දෙදෙනා හම්බේගමුව රෝහලට ඇතුළත් කිරීමෙන් පසු එක් පුද්ගලයෙකු මියගොස් තිබෙනවා.
තුවාලකරු වැඩිදුර ප්රතිකාර සඳහා ඇඹිලිපිටිය රෝහලට මාරුකර යවා ඇති බව පොලීසිය පවසනවා.
සැකකරු අත්අඩංගුවට ගැනීම සඳහා හම්බෙගමුව පොලිසිය වැඩිදුර විමර්ශන සිදු කරනු ලබනවා.
