ඉතාලියේ ශ්‍රී ලංකා තානාපති ආචාර්ය ජගත් වැල්ලවත්ත මහතා විසින් රචිත ‘කරඬු ඇත්තු’ නවකතාව ඉතාලියේ රෝම නගරයේ ට්‍රිසියානෝ සිනමා ශාලාවේ දී ජනගත කෙරිණි. එහි පැවති ‘වස්තු’ නමැති සාහිත්‍ය කලා උත්සවයේ දී මෙම කෘතියේ දොරට වැඩුම සිදු වූ අතර මෙම නවකතාවෙන් කාන්තාවක සිය පෙම්වතාට, සැමියාට දක්වන අසීමිත ආදරයක් ගැන හා එහි දී ඇය රැවටීමකට ලක් ව ඇති බව දැනගැනීමෙන් පසු ඇය මුහුණ දෙන සංකීර්ණතාවයන් පිළිබඳ වත් විවරණයක් සිදු කර ඇති අතර කතාවේ යටිපෙළින් දිවෙන්නේ දේශපාලන විමසුමකි.
ලොව පුරා වෙසෙන ශ්‍රී ලාංකික පාඨකයන්ට අන්තර්ජාලය හරහා ‘අන්තර්ජාල යෙදුමක්’ මගින් මිල දී ගැනීමට හැකි වන මුල් ම කෘතිය ලෙසින් ද සරසවි ප්‍රකාශනයක් ලෙස එළි දුටු මෙම ‘කරඬු ඇත්තු’ නවකතාව, සරසවි ප්‍රකාශන අධිපති එච්. ඩී. ප්‍රේමසිරි මහතා සහ කර්තෘවර ආචාර්ය ජගත් වැල්ලවත්ත මහතා විසින් මෙම අවස්ථාවේ දී හඳුන්වා දෙනු ලැබිණ. මෙම අවස්ථාවට ඉතාලියේ ඉන්දියානු තානාපතිනි ආචාර්ය නීනා මල්හෝත්‍රා මහත්මිය ප්‍රධාන ආරාධිතයා ලෙස එක්විය.
මහා සංඝරත්නය, ඉතාලියේ චීන තානාපති ග්වාන්ග් ඩේෆු, ඉතාලියේ මියන්මාර් තානාපතිනී චෙම්වේ කයින් සහ රාජ්‍ය තාන්ත්‍රික නිලධාරීන් පිරිසක් ද මෙම අවස්ථාවට එක්විය. තව ද ශ්‍රී ලාංකික ප්‍රවීණ ලේඛකයින් වන මොහාන් රාජ් මඩවල, ශ්‍යාම් ප්‍රනාන්දු, සරත් කොතලාවල, මංජුල සේනාරත්න යන කලාකරුවන් ඇතුළු සම්භාවනීය පිරිස් ද මේ අවස්ථාවට එක් ව සිටියහ.
