නැගෙනහිර ජපානයට බලපා ඇති අධික වර්ෂාපතනය හේතුවෙන් සිදු වූ පුද්ගල මරණ සංඛ්‍යාව 08ක් දක්වා ඉහළ ගොස් තිබෙනවා විශේෂයෙන් එරට චිබා ප්‍රාන්තයට පෙර නොවූ විරූ වර්ෂාපතනයක් ඇද හැලී ඇති බවයි විදෙස් මාධ්‍ය වාර්තා කළේ. ඒ අනුව එම ප්‍රාන්තයට ගත වූ පැය 24ක කාලයක් තුළ මිලිමීටර් 367ක වර්ෂාපතනයක් වාර්තා වී තිබෙනවා. 2023 වසරේ ඔක්තෝබර් මාසයේ දී පැය 24ක කාලයක් තුළ වාර්තා වූ මිලිමීටර් 309ක වර්ෂාපතනය මීට පෙර එම ප්‍රාන්තයට ඉතිහාසයේ වැඩිම වර්ෂාපතනය ලැබුණු අවස්ථාව ලෙස වාර්තා වී ඇති බව සදහන්. අධික වර්ෂාවත් සමඟ ප්‍රදේශ රැසක මහාමාර්ග හා දුම්රිය මාර්ග රැසක් ජලයෙන් යටවී තිබෙනවා. මේ හේතුවෙන් ටෝකියෝහි නරීටා ජාත්‍යන්තර ගුවන්තොටුපලට පැමිණ සිටි මගීන් 7,000ක් පමණ ප්‍රවාහන පහසුකම් සලසා ගැනීමට නොහැකිව රාත්‍රී කාලය පුරා එහි රැදී සිටි බවයි විදෙස් මාධ්‍ය වාර්තා කරන්නේ. මේ අතර අධික වර්ෂාවත් සමඟ ඇතිවිය හැකි ගංවතුර අවදානම සැලකිල්ලට ගනිමින් උතුරු පිලිපීනයේ රජයේ කාර්යාල හා පාසල් වසා දැමීමට බලධාරීන් පියවර ගෙන තිබෙනවා.
