කතා නායකවරයාගේ ප්‍රධානත්වයෙන් පාර්ලිමේන්තු කටයුතු අද පෙරවරු 9.30ට ආරම්භ වුණා.
මේ අනුව අත්‍යාවශ්‍ය මහජන සේවා පනත යටතේ ජනාධිපතිවරයාගේ නියමය අද දින පාර්ලිමේන්තුවේදී විවාදයට ගැනීමට නියමිතයි.
1979 අංක 61 දරණ අත්‍යාවශ්‍ය මහජන සේවා පනත යටතේ ජනාධිපතිවරයා වෙත පැවරී ඇති බලතලවලට අනුව අදාළ නියෝගය ගැසට් කර තිබෙනවා.
ඒ අනුව විදුලි සැපයීම සම්බන්ධ සියලු සේවාවන්, ඛනිජ තෙල් නිෂ්පාදන, ඉන්ධන සැපයීම, බෙදාහැරීම සහ සෞඛ්‍ය සේවාවන්ට අදාළ කටයුතු අත්‍යාවශ්‍ය සේවාවන් බවට පත් කර ඇති බව සදහන්.
අදාල විවාදයෙන් අනතුරුව අද දිනයේ පෞද්ගලික මන්ත්‍රී පනත් කෙටුම්පත් ද්විත්වයක් වන ශ්‍රී ලංකා ගොඩනැගිලි සේවා ඉංජිනේරු සහ තාක්ෂණ ආයතනය සංස්ථාගත කිරීමේ පනත් කෙටුම්පත මෙන්ම රතන තිස්ස සාම පදනම සංස්ථාගත කිරීමේ පනත් කෙටුම්පත දෙවන වර කියවීම ද මෙහිදි සිදු කෙරෙනු ඇති.
එමෙන්ම නව වන පාර්ලිමේන්තුවේ සිවු වන සභා වාරය සදහා පොදු ව්‍යාපාර පිළිබද කාරක සභාව හෙවත් කෝප් කටමිටුව අද දින පළමු වරට රැස්වීමට නියමිතව තිබෙනවා.
එහිදි කෝප් කමිටුව සදහා සභාපතිවරයෙකු තෝරා පත් කර ගැනීමට නියමිතව ඇති බවයි වාර්තා වන්නේ.
මේ අතර ජනාධිපති රනිල් වික්‍රමසිංහ මහතා අද දින පාර්ලිමේන්තුවට පැමිණ විශේෂ ප්‍රකාශයක් සිදු කළා.
එහිදි ඔහු කියා සිටියේ මුදල් තිබුණද මැතිවරණයක් පැවැත්වීමට දිනයක් නිල වශයෙන් පත් කර නොමැති බවයි.
එමෙන්ම පක්ෂ විපක්ෂ භේදයකින් තොරව බොහෝ පිරිසක් මැතිවරණය කල් දමන ලෙසට ඉල්ලා සිටි බවටයි ජනාධිපති රනිල් වික්‍රමසිංහ මහතා අද දින සභාව ඉදිරියේ කියා සිටියේ.
මේ එහිදි වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා.
කෙසේ වෙතත් විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා කියා සිටියේ මැතිවරණය සදහා අයවැයෙන් වෙන් කර ඇති මුදලවත් මැතිවරණය සදහා මුදා හරින ලෙසයි.
මේ ඒ සදහා පිළිතුරු ලබා දුන් ජනාධිපති රනිල් වික්‍රමසිංහ මහතා.
ජනාධිපති රනිල් වික්‍රමසිංහ මහතාගේ විශේෂ ප්‍රකාශයෙන් අනතුරුව ඔහු සභා ගර්භයෙන් පිටව ගියා.
ඉන් අනතුරුව පාර්ලිමේන්තුවේ විපක්ෂයේ මන්ත්‍රීවරුන් ඡන්දය දෙන ලෙස ඉල්ලමින් විරෝධතාවයක් ආරම්භ කළා.
මෙහිදි පාර්ලිමේන්තු මන්ත්‍රී නිමල් ලංසා මහතා කියා සිටියේ රට අර්බුදයක පවතින අවස්ථාවක මැතිවරණයක් ඉල්ලීම විහිලු සහගත බවයි.
මේ අතර පාර්ලිමේන්තු මන්ත්‍රී එස්.එම්. මරික්කාර් මහතා කියා සිටියේ ජනාධිපතිවරයා විසින් ව්‍යවස්ථාව උල්ලංඝනය කිරීමේ වරදට ඔහුට සිරගත වීමට සිදු වනු ඇති බවයි.
