රඹුක්කන පොලිස් වසමට අයත් හුරුමළුව ප්‍රදේශයේ පාලු නිවසක් ආසන්නයේ වල දා තිබූ තවත් මළ සිරරක් අද ගොඩ ගනු ලැබුවා.
ඒ කෑගල්ල මහේස්ත්‍රාත් වාසනා නවරත්න මහත්මිය ඉදිරියේ.
ඊයේ පස්වරුවේ දී ද මෙම ස්ථානයට ආසන්නයේ මල සිරරුක් ගොඩගනු ලැබූවා.
මාවනැල්ල කිරිංගදෙනිය හා කෙරමිණිය වත්ත ප්‍රදේශයේ පදිංචිව සිටි තරුණයන් දෙදෙනකු වන මොහොමඩ් ඉක්බාල් මොහොමඩ් අසාර් සහ මොහොමඩ් අන්වර් මොහොමඩ් අර්ෂාඩ් නමැති තරුණයන් දෙදෙනා පසුගිය නොවැම්බර් 19 සහ 28 යන දිනවලදී අතුරුදන්ව ඇති බවට මාවනැල්ල පොලීසිය වෙත පැමිණිලි ලැබී තිබුණා.
කෑගල්ල කොට්ඨාස අපරාධ විමර්ශන කාර්යංශය මගින් කළ විමර්ශනවලදි රඹුක්කන හුරිමළුව ප්‍රදේශයෙ මත්ද්‍රව්‍ය ජාවාරම්කරුවෙකුගේ නිවස පිටුපස තරුණයන් දෙදෙනා ඝාතනය කර වළදමා ඇති බවටයි තොරතුරක් ලැබී තිබුණේ.
ඒ අනුව රඹුක්කන හුරීමළුව ප්‍රදේශයේ මත්ද්‍රව්‍ය ජාවාරම්කරුවකුට අයත් බව කියන නිවසක් පිටුපස වළදමා තිබූ තරුණයන් දෙදෙනාගේ බවට සැකකෙරෙන සිරුරු සොයාගෙන තිබෙනවා.
මත්ද්‍රව්‍ය ජාවාරමක් සම්බන්ධයෙන් පොලිසියට ඔත්තු ලබාදුන් බවට ඇති වූ සැකයක් මත මෙම ඝාතන සිදුකර ඇති බව සඳහන්.
ඊයේ පස්වරු 5.30ට පමණ අදාළ නිවසේ කොන්ක්‍රීට් ලෑල්ලකට යටින් පොළොවේ උරයක් තුළ බහා වළදමා තිබූ සිරුරක් පොලිසිය විසින් පළමුව සොයා ගනු ලැබුවා.
මියගිය අය මෙතෙක් හදුනා ගෙන නොමැති අතර සිද්ධිය පිලිබද කිසිවෙකු අත්තඩංගුවට ද ගෙන නැහැ.
රඹුක්කන පොලීසිය පැවසුවේ පශ්චාත් මරණ පරික්ෂණ කෑගල්ල රෝහලේ දී සිදු කෙරෙන බවයි.
(වසන්ත රෝහණ සමරවර්ධන – කෑගල්ල)
