රාජ්‍ය ඇමතිනි ඩයනා ගමගේ මහත්මියගේ පාර්ලිමේන්තු මන්ත්‍රී ධුරය බලරහිත කිරීමේ රිට් ආඥාවක් නිකුත්කරන ලෙස ඉල්ලා ගොනුකර ඇති පෙත්සම විභාගයට ගැනීම සඳහා දින නියම කර තිබෙනවා.
පෙත්සම ලබන මස 03 සහ 04 යන දිනවල විභාගයට ගැනීමට අභියාචනාධිකරණය අද නියෝග කළා.
ඒ, එම පෙත්සම අභියාචනාධිකරණයේ සභාපති, විනිසුරු නිශ්ශංක බන්දුල කරුණාරත්න සහ ඒ.මරික්කාර් යන විනිසුරුමඩුල්ල හමුවේ කැඳවූ අවස්ථාවේදියි.
සමාජ ක්‍රියාකාරිකයෙකු වන ඕෂල හේරත් මහතා විසින් ගොනුකර ඇති මෙම පෙත්සම පවත්වාගෙන යා නොහැකි බැවින් එය විභාගයට නොගෙන නිශ්ප්‍රභ කරන ලෙස රාජ්‍ය ඇමතිනි ඩයනා ගමගේ වෙනුවෙන් පෙනී සිටි ජනාධිපති නීතිඥ ශවීන්ද්‍ර ප්‍රනාන්දු පසුගිය නඩු දිනයේ දී මූලික විරෝධතා මතුකළා.
මීට අදාළ ලිඛිත දේශන මේ මස 27 වැනිදාට පෙර ගොනුකරන ලෙසයි අභියාචනාධිකරණය පාර්ශවකරුවන්ට අද නියෝග කළේ.
