රාජ්‍ය අමාත්‍ය සනත් නිශාන්ත මහතා මියගොස් තිබෙනවා.
පොලිසිය කියා සිටියේ කටුනායක අධිවේගී මර්ගයේ R 11.1 කිලෝමීටර් කණුව ආසන්නයේදී අද(25) අලුයම 2ට පමණ සිදු වූ රිය අනතුරකින් අමාත්‍යවරයා මියගොස් ඇති බවයි.
එම අනතුරෙන් තවත් පුද්ගලයෙක් මියගොස් ඇති බවයි වාර්තා වන්නේ.
කටුනායක සිට කොළඹ දෙසට ධාවනය කරමින් තිබූ අමාත්‍යවරයා රැගත් රථය එම දිශාවට ගමන් කරමින් තිබූ කන්ටේනර් රථයක පසුපස ගැටීමෙන් අනතුර සිදුව ඇති බවයි පොලිසිය පවසන්නේ.
අමාත්‍යවරයා රැගත් සුඛෝපභෝගි රථය කන්ටේනර් රථයේ ගැටීමෙන් අනතුරුව අධිවේගී මාර්ගයේ ආරක්ෂිත වැටෙහි ගැටී තිබෙනවා.
අනතුරින් තුවාල ලැබූ අමාත්‍යවරයා සහ තවත් දෙදෙනකු රාගම රෝහලට ඇතුළත් කෙරුණා.
තුවාල ලැබූ සෙසු දෙදෙනා අමාත්‍යවරයාගේ රථයේ රියදුරා සහ ආරක්ෂක නිලධාරියායි.
රෝහල් ගත කිරීමෙන් අනතුරුව අමාත්‍යවරයා සහ ආරක්ෂක නිලධාරියා ජීවිතක්ෂයට පත්ව ඇති බවයි පොලිසිය පවසන්නේ.
මෙලෙස මියගොස් ඇත්තේ ජයකොඩි පොලිස් කොස්තාපල්වරයෙකි.
