Author: VNews

රුපියල් මිලියන විස්සකට අධික වටිනා දේශීය ගංජා තොගයක් අත්අඩංගුවට ගෙන තිබෙනවා. නාවික හමුදාව, වෙරළාරක්ෂක දෙපාර්තමේන්තුව සහ කිරින්ද පොලිසිය එක්ව සිදුකල ඒකාබද්ධ සෝදිසි මෙහෙයුමකදී මෙම අත්අඩංගුවට ගැනීම සිදුකළා.

මඩකලපුව දිස්ත්‍රික්කයේ ප්‍රදේශීය ලේකම් කොට්ඨාස 13ක සුදුසුකම් ලැබු පවුල් 27,595න් 192 දෙනෙකු සඳහා ජනාධිපතිවරයා විසින් සංකේතාත්මකව ඔප්පු ලබාදීම සිදුකර තිබේ.

චීනය සැමවිටම ශ්‍රී ලංකාවේ සමාජ ආර්ථික සංවර්ධනයට උපකාර කරන ආකාරයෙන්ම මෙරට ණය තිරසාරත්වය ළඟා කර ගැනීමට ශ්‍රී ලංකාවට අඛණ්ඩව සහාය දෙන බව චීන විදේශ අමාත්‍යාංශය සඳහන් කරනවා. චීන විදේශ අමාත්‍යාංශයේ පැවැති මාධ්‍ය හමුවකට එක්වෙමින් එහි ප්‍රකාශකයෙකු මේ බව සඳහන් කළා.

පළාත් සභා යටතේ පවතින පාසල්වල ගුරුවරුන් 8139 දෙනෙකුගේ හිඟයක් මේ වන විට පවතින බව අධ්‍යාපන අමාත්‍ය සුසිල් ප්‍රේමජයන්ත පවසනවා. ඔහු කියා සිටියේ පවතින ඉංග්‍රීසි ගුරු හිඟයට විසඳුමක් ලෙස විශ්‍රාමික ඉංග්‍රීසි ගුරුවරුන් බඳවා ගන්නා බවයි. ඒ අනුව දැනට බඳවාගෙන තිබෙන සහ ඉදිරියේදී බඳවා ගැනීමට නියමිත ගුරුවරු සංඛ්‍යාව දැක්වෙන්නේ 11,048ක් ලෙසයි.

පානදුර මුහුදේ දියනාමින් සිටි 10 දෙනෙකු රෝහල්ගත කර තිබෙනවා. ඒ ජෙලිෆිෂ් මත්ස්‍ය විශේෂය ශරීරයේ ගෑවීමෙන් සමෙහි ඇති වූ ආසාත්මිකතාවයක් හේතුවෙන්. මෙම මත්ස්‍ය විශේෂය ශරීරයේ ගැවුණු ස්ථානයන්හි රතුපැහැ ගැන්වීම, කැසීම් සහ වේදනාවක් දැනීම එහි සාමාන්‍ය රෝග ලක්ෂණ වෙනවා.

රාජ්‍ය අනුග්‍රහයකින් තොරව සාර්ථකව පොසොන් උළෙල පැවැත්වීමට හැකිවු බව මිහින්තලා රජමහා විහාරාධිපති පුජ්‍ය වලවා හැංගුනවැවේ ධම්මරතන හිමියන් පවසනවා. මින්තලා පුද බිමේ පැවති පොසොන් දින සැමරුමේ අනුශාසනාව සිදුකරමින් උන්වහන්සේ මේ බව ප්‍රකාශ කළා. ලබන වසරේ නව රජයක් යටතේ පොසොන් උළෙල පවත්වන බවයි වලවා හැංගුනවැවේ ධම්මරතන හිමියන් සදහන් කළේ.

කුමන විවේචන එල්ල කළ ද පාසල් දරුවන්ගේ අධ්‍යාපනය වෙනුවෙන් සිදුකරන වැසටහන් අඛණ්ඩව සිදුකරන බව විපක්ෂ නායක සජිත් ප්‍රේමදාස මහතා පවසනවා. ඊයේ පැවති සක්වල වැඩසටහනකට එක්වෙමින් විපක්ෂ නායක සජිත් ප්‍රේමදාස මහතා මේ බව ප්‍රකාශ කළා. රටේ දරුවන්ගේ අධ්‍යාපනය වෙනුවෙන් සිදුකරන වැඩපිළිවෙල නවතා දැමීමට කිසිවෙකු නොහැකි බවයි සජිත් ප්‍රේමදාස මහතා සදහන් කළේ.

රටේ ස්වාධීනත්වය සහ ස්වේරීභාවය ආරක්ෂා කරගනිමින් ජාත්‍යන්තරය සමග කටයුතු කළ යුතු බව අගරදගුරු මැල්කම් රංජිත් කාදිනල් හිමියන් පවසනවා. ඊයේ පැවති මාධ්‍ය හමුවකට එක්වෙමින් කාදිනල් හිමියන් මේ බව ප්‍රකාශ කළා. ඇතැම් රටවල්වලට අවශ්‍ය පරිදි රට තුළ තීන්දු තීරණ ගැනිම සිදු නොකළ යුතු බවයි කාදිනල් හිමියන් සදහන් කළේ.

රාජ්‍ය ආයතනවලින් අයකර ගත යුතු හිඟ බදු ප්‍රමාණයක් තවදුරටත් පවතින බව මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා. රාජ්‍ය අමාත්‍යවරයා කියා සිටියේ , එම හිඟ බදු අයකර ගැනීමට අවශ්‍ය සෑම පියවරක්ම ඉදිරියේ දී ගන්නා බවයි.

දුම්රියෙන් කෘෂි භාණ්ඩ ප්‍රවාහනය කිරීමේ විශේෂ වැඩසටහනක් ආරම්භ කිරීමට දුම්රිය දෙපාර්තමේන්තුව සැලසුම් කර තිබෙනවා. ඒ අනුව බෙලිඅත්ත සිට මරදාන දක්වා දුම්රියෙන් කෘෂි භාණ්ඩ ප්‍රවාහනය කිරීමේ නියමු ව්‍යාපෘතියක් ආරම්භ කිරීමට නියමිතයි. ජුනි 29 වනදා අදාළ නියමු ව්‍යාපෘතිය ක්‍රියාත්මක කිරීමට සැලසුම් කර ඇති බවයි දුම්රිය දෙපාර්තමේන්තුව සදහන් කළේ. ලෝක බැංකුවේ ආධාර යටතේ මෙම වැඩසටහන ක්‍රියාත්මක කිරීමට නියමිතව තිබෙනවා.