Author: Kesara Athipola

හිටපු අමාත්‍ය විමල් විරවංශ මහතා හට මේ දිනවල උණ, වමනය හා පාචනය රෝගී තත්ත්වයන් ඇති වී ඇති බව ඒ මහතාගේ නීතිඥවරුන් අද (01) කොළඹ මහාධිකරණයට දැනුම්දී ඇත. ඒ, රුපියල් මිලියන 75කට අධික වත්කම් සහ මුදල් උපයාගත් ආකාරය හෙළිදරව් කිරීමට අපහාසත් වී ඇති බවට චෝදනා එල්ලවී ඇති නඩුවක් අද කොළඹ මහාධිකරණ විනිසුරු නවරත්න මාරසිංහ මහතා ඉදිරියේ කැඳවූ අවස්ථාවේදීය. කෙසේවෙතත් එම අවස්ථාවේදී විත්තිකාර විමල් වීරවංශ මහතා අධිකරණය හමුවේ පෙනී නොසිටි අතර, ඔහුගේ නීතිඥවරයා අධිකරණය හමුවේ කරුණු දක්වමින් කියා සිටියේ විත්තිකරු ඉහත සඳහන් රෝගී තත්වයන්ගෙන් පසුවන බවත් ඒ බව සහතික කෙරෙන වෛද්‍ය වාර්තාවක් ඉදිරිපත් කරන බවත්ය.

ලොව ප්‍රධානතම ආර්ථිකයන් හිමි රටවල් අතරින් වේගයෙන්ම වර්ධනය වන ආර්ථිකය හිමි රට බවට ඉන්දියාව පත්ව තිබේ. ඉන්දීය ආර්ථිකය 2023 වසරේ අවසාන කාර්තුවේදී 8.4%කින් වර්ධනය තිබෙන බව නවතම දත්ත සඳහන් කරයි. ජපානය සහ ජර්මනිය අභිබවා යමින් ලොව තෙවැනි විශාලතම ආර්ථිකය බවට ඉන්දියාව නුදුරේදීම පත්වෙතැයි අපේක්ෂා කෙරේ. කෙසේවෙතත් මෙම ආර්ථික වර්ධනය පිළිබඳ තොරතුරු, 2024 වසරේ ඉන්දීය මහ මැතිවරණය හේතුවෙන් නරේන්ද්‍ර මෝදී ගේ පවතින රජයට වාසිදායක වන අයුරින් නිර්මාණය කරන බවටද වාර්තා වේ.

පානදුර උතුර සමගි මාවත ප්‍රදේශයේ පිහිටි තීන්ත නිෂ්පාදන කර්මාන්ත ශාලාවක ඊයේ (29) රාත්‍රියේ ගින්නක් හටගෙන ඇත. ගින්නෙන් එය සම්පූර්ණයෙන්ම විනාශ වී තිබේ. මොරටුව මහනගර සභාවේ ගිනි නිවීම් ඒකකය මගින් ගින්න මැඩපවත්වූ අතර ගින්නෙන් කිසිඳු පුද්ගල හානියක් සිදුවී නොමැත. ගින්නට හේතුව සොයා විමර්ශන ක්‍රියාත්මකයි.

මාර්තු මාසයෙදී ලිට්‍රෝ ගෑස් මිල වෙනස් නොවන පරිදි පත්වාගෙන යෑමට එම සමාගම තීරණය කර ඇත. ලිට්‍රෝ ගෑස් සමාගමේ සභාපති මුදිත පීරිස් මහතා මේ බව සඳහන් කෙරීය.

ලොව ප්‍රමුඛ පෙළේ ධනවතෙකු වන මයික්‍රොසොෆ්ට් නිර්මාතෘ බිල් ගේට්ස් ඉන්දියාවට පැමිණ තිබේ. එහිදී බිල් ගේට්ස් ඉන්දීය අග්‍රාමාත්‍ය නරේන්ද්‍ර මෝදි හමුවූ බවද වාර්තා වෙයි. ලෝක ජනතාවගේ අභිවෘද්ධිය උදෙසා කෘතිම බුද්ධියේ බලය භාවිත කිරීම සම්බන්ධයෙන් එම හමුවේදී වැඩි අවධානයක් යොමුව ඇති බවද තවදුරටත් වාර්තා වෙයි. ලොව පුරා මිලියන සංඛ්‍යාත ජනතාවක් සවිබල ගන්වන අංශ පිළිබඳව සාකච්ඡා කිරීම සැමවිටම සතුටට කරුණක් බව, හමුව සම්බන්ධයෙන් සිය X ගිණුමේ සටහනක් තබමින් ඉන්දීය අග්‍රාමාත්‍ය නරේන්ද්‍ර මෝදි පවසා ඇත.

ඊයේ (29) රාත්‍රී කාලයේදී ඇල්ල දුම්රියපොළ ආසන්නයේදී දුම්රියක ගැටී තරුණයෙකු ජීවිතක්ෂයට පත්ව ඇත. මෙසේ මියගොස් ඇත්තේ 23 හැවිරිදි තරුණයෙකු බව පොලීසිය පවසයි. බදුල්ල සිට කොළඹ බලා ධාවනය වූ රාත්‍රී තැපැල් දුම්රියේ ගැටීමෙන් මෙම මරණය සිදුවී ඇත.

ඊයේ (29) උදෑසන කාලයේදී කටුනායක වල්පොල ප්‍රදේශයේ පාළු නිවසක් අසල තිබී කාන්තා මළසිරුරක් තිබී පොලීසිය විසින් සොයාගෙන ඇත. මෙලෙස මියගොස් ඇත්තේ කටියල දෙමංහන්දිය ප්‍රදේශයේ පදිංචි වයස අවුරුදු 46ක කාන්තාවකි. මරණයට හේතුව මෙතෙක් හෙළිවී නොමැති අතර කටුනායක පොලීසිය වැඩිදුර විමර්ශන සිදුකරයි.

මාසික ඉන්ධන මිල සංශෝධනයට අනුව ඊයේ (29) මධ්‍යම රාත්‍රීයේ සිට අදාළ මිල ගණන් සංශෝධනය විය යුතුව තිබියද මාර්තු මාසය තුළ පවතින ඉන්ධන මිල ගණන් සංශෝධනයකින් තොරව පවත්වාගෙන යාමට රජය තීරණය කර ඇත. ඒ අනුව මාර්තු මාසය තුළ මිල ගණන් සංශෝධනයකින් තොරව, දැනට පවතින මිල ගණන් යටතේම ඉන්ධන අලෙවිය සිදුකිරීමට ලංකා ඛනිජ තෙල් නීතිගත සංස්ථාව තීරණය කර තිබේ. කෙසේවෙතත් මාසික මිල සංශෝධනයක් සිදුකිරිම සම්බන්ධයෙන් ලංකා IOC සමාගම සහ සයිනොපෙක් සමාගම ද මෙතෙක් නිසි දැනුම්දීමක් සිදුකර නොමැත.

බංග්ලාදේශයේ ඩකා අගනුවර මහල් ගොඩනැගිල්ලක ඇතිවූ ගින්නකින් පුද්ගලයින් 43 දෙනෙකු පමණ ජීවිතක්ෂයට පත්වී ඇති බව බංගලාදේශ සෞඛ්‍ය අමාත්‍යවරයා පවසනවා. ඊයේ අවන්හලක ගින්න ආරම්භ වී ඇති බව විදෙස් මාධ්‍ය පවසනවා. ගින්න ගොඩනැගිල්ල හරහා වේගයෙන් පැතිර ගිය අතර,  මිනිසුන් විශාල ප්‍රමාණයක් ඊට මැදිවූ බව පැවසෙයි.

දිවයිනේ ප්‍රදේශ කිහිපයක අද (01) දිනයේ වැසි ස්වල්පයක් අපේක්ෂා කළ හැකි බව කාලගුණ විද්‍යා දෙපාර්තමේන්තුව සඳහන් කරනවා. නැගෙනහිර සහ ඌව පළාත්වල මෙන්ම පොළොන්නරුව සහ මාතලේ දිස්ත්‍රික්කවල අද දිනයේ වැසි ස්වල්පයක් අපේක්ෂා කළ හැකි බවයි සඳන් වන්නේ. බස්නාහිර සහ සබරගමුව පළාත්වල සහ ගාල්ල, මාතර සහ නුවරඑළිය දිස්ත්‍රික්කවලත් සවස් කාලයේදී හෝ රාත්‍රී කාලයේදී ස්ථාන ස්වල්පයක වැසි හෝ ගිගුරුම් සහිත වැසි ඇතිවිය හැකිය.