Author: Dhanushka

උතුරේ ඉඩම් ගැටලුව සමාලෝචනය කර ජනතාවට එම ඉඩම් නැවත ලබා දීමට පියවර ගන්නා බව ජනාධිපති අනුර කුමාර දිසානායක මහතා පවසනවා. ජනාධිපතිවරයා මෙම අදහස් පළ කළේ යාපනය දිස්ත්‍රික් සම්බන්ධීකරණ කමිටු රැස්වීමට සහභාගී වෙමින්. එහිදී අදහස් දක්වමින් ජනාධිපතිවරයා පැවසුවේ ජනතාවගේ ඉඩම් ජනතාවට හිමිවිය යුතු බවයි. රටේ සංවර්ධන කටයුතු  වෙනුවෙන් හෝ ආරක්ෂක හේතූන් මත රටේ ඕනෑම ස්ථානයක ඉඩමක් රජයට පවරා ගත හැකි බව පෙන්වා දුන් ජනාධිපතිවරයා එම ඉඩම් වෙනුවට ජනතාවට අනිවාර්යයෙන් වෙනත්  ඉඩම් ලබා දිය යුතු බවද  සදහන් කළා.

උඩරට දුම්රිය මාර්ගයේ හැටන් සහ කොටගල අතර දුම්රිය මාර්ගයට පස් කණ්ඩියක් සමග ගසක් කඩාවැටීමෙන් දුම්රිය මාර්ගයේ ගමනාගමන කටයුතුවලට මේ වනවිට බාධා එල්ල වී තිබෙනවා. දුම්රිය මාර්ගය යථා තත්ත්වයට පත්කිරීමේ කටයුතු මේ වනවිට ආරම්භ කර ඇති බව දුම්රිය දෙපාර්තමේන්තුව සදහන් කළේ.

මැලේසියාවේ පැවැත්වෙන අවුරුදු 19න් පහළ කාන්තා විස්සයි20 ලෝක කුසලාන ක්‍රිකට් තරගාවලියේ අවසන් මහා තරගයට සුදුසුකම් ලබාගැනීමට දකුණු අප්‍රිකානු කාන්තා කණ්ඩායම අද  සමත් වුණා. තරගාවලියේ පළමු අවසන් පූර්ව තරගය ලෙසින් ක්වාලාලාම්පූර්හිදී පැවති මෙම තරගයේදී ඔස්ට්‍රේලියානු කාන්තා කණ්ඩායම කඩුලු 5කින් පරාජය කිරීමට දකුණු අප්‍රිකානු යොවුන් ක්‍රීඩිකාවන් සමත් වුණා. පළමුවෙන් පන්දුවට පහරදුන් ඔස්ට්‍රේලියානු කණ්ඩායම පන්දුවාර 20 තුළදී කඩුලු 8ක් දැවී ලකුණු 105ක් රැස්කළා. ඒ අනුව ලකුණු 106ක ඉලක්කයක් හඹා ගිය දකුණු අප්‍රිකාව කඩුලු 5ක් දැවී තිබියදී තරගයේ 19 වන පන්දුවාරයේදී එම ඉලක්කය සම්පූර්ණ කරගැනීමට සමත් වුණා. දකුණු අප්‍රිකානු යොවුන් කාන්තා කණ්ඩායමක් විස්සයි20 ලෝක කුසලාන තරගාවලියක අවසන් මහා තරගයට සුදුසුකම් ලබාගත් පළමු අවස්ථාව මෙය…

හිටපු නාවික හමුදාපති වසන්ත කරන්නාගොඩ මහතා විසින් ඉදිරිපත් කළ පෙත්සමක් විභාග කිරීම සඳහා නව පංච පුද්ගල අභියාචනාධිකරණ විනිසුරු මඩුල්ලක් පත් කර තිබෙනවා. 2008 වසරේ කොළඹ හා තදාසන්න ප්‍රදේශවල තරුණයින් 11 දෙනෙකු පැහැරගෙන ගොස් අතුරුදන් කිරීමේ සිද්ධියට අදාළව කොළඹ ත්‍රිපුද්ගල මහාධිකරණ විනිසුරු මඩුල්ල ඉදිරියේදී තමන්ව විත්තිකරුවෙකු වශයෙන් නම් කර නීතිපතිවරයා විසින් ගොනු කර තිබෙන නඩුව බල රහිත කරන ලෙස ඉල්ලා ඒ මහතා විසින් මෙම පෙත්සම ගොනුකර තිබුණා. එම පෙත්සම විභාග කරන පංච පුද්ගල විනිසුරු මඩුල්ලේ සාමාජික විනිසුරු අමල් රණරාජා මහතා ඉකුත්දා එම නඩු විභාගයෙන් ඉවත්වන බව දැනුම් දී තිබුණි.

නව අමෙරිකානු පරිපාලනය විසින් පිටුවහල් කිරීමට නියමිත නීතිවිරෝධී ලෙස රැඳී සිටින විදේශිකයන් අතර ශ්‍රී ලාංකිකයින් 3065 දෙනෙකු සිටින බව එරට සංක්‍රමණික සහ රේගු බලාධිකාරිය නිවේදනය කර තිබෙනවා. මේ ආකාරයෙන් ලොව පුරා රටවල් රැසකින් පැමිණ අමෙරිකාවේ නීතිවිරෝධී ලෙස රැඳී සිටින දාහතර ලක්ෂ 45,549ක ලැයිස්තුවක් නව අමෙරිකානු පරිපාලනය විසින් මේ වනවිට සකස් කර තිබෙනවා. ඊට ඇතුළත් කර ඇත්තේ අමෙරිකාවෙන් ඉවත් කිරීමේ අවසාන ලැයිස්තුවට අයත් විදේශිකයන් සංඛ්‍යාව බව සදහන්. එහිදී අමෙරිකානු රජයේ පියවරට සහාය නොදක්වන රටවල් ලැයිස්තුවක් ද දක්වා ඇති අතර, ඊට ශ්‍රී ලංකාව අයත්ව නොමැති බව සදහන්.

ජනාධිපති අනුර කුමාර දිසානායක මහතා අභාවප්‍රාප්ත මාවෙයි සේනාධිරාජා මහතාගේ දේහයට අවසන් ගෞරව දක්වා තිබේ. දේහය දැන්පත් කර ඇති යාපනය මාවෙට්ටපුරම් ප්‍රදේශයේ පිහිටි ඒ මහතාගේ නිවසේදී මෙලෙස අවසන් ගෞරව දක්වා ඇත.

තරග පාවාදීමේ සිද්ධියක් සම්බන්ධයෙන් සාක්ෂි ලබාදීම සඳහා අධිකරණයේ පෙනී නොසිටීම හේතුවෙන් ශ්‍රී ලංකා ක්‍රිකට් තේරීම් කමිටු සභාපති උපුල් තරංගට එරෙහිව මාතලේ මහාධිකරණයේ ක්‍රියාත්මක වන නඩුවේ තීන්දුව එළැඹෙන මාර්තු මස 10 වනදා ප්‍රකාශයට පත්කිරීමට නියමිතව තිබෙනවා. මාතලේ මහා අධිකරණ විනිසුරු රවින්ද්‍ර ප්‍රේමරත්න මහතා ඉදිරියේ මෙම නඩුව අද  කැඳවූ අවස්ථාවේදී පැමිණිල්ලේ සාක්ෂි අවසන්වීමෙන් අනතුරුව විනිසුරුවරයා මේ බව ප්‍රකාශ කර සිටියා. පල්ලෙකැලේ ක්‍රීඩාංගණයේ දී පසුගිය වසරේ පැවති ‘ලෙජන්ඩ් ලීග් -2024’ ක්‍රිකට් තරගාවලියේදී මුදලට තරග පාවාදීම සඳහා බලපෑම් කළ බවට ඔහු විසින් කළ පැමිණිල්ලකට අනුව මෙම නඩුව ක්‍රියාත්මක වනවා.

සුදු කැකුළු සහ නාඩු සහල්, පාලන මිල යටතේ අද(31) සිට වෙළෙඳ පොළට නිකුත් කරන බව, මරදගහමුල සහල් මෝල් හිමියන් පවසනවාත එහි සභාපති බී.කේ රංජිත් මහතා සඳහන් කළේ, දිස්ත්‍රික්ක තුනක වී තොග, මේ වන විට මරදගහමුලට ලැබෙමින් පවතින බවයි.

පසුගිය වසරේ මෙරටින් ලාදුරු රෝගීන් 1500 ක් පමණ සොයා ගත් බව ලාදුරු මර්දන ජාතික ව්‍යපාරය පවසනවා’ එහි අධ්‍යක්ෂ වෛද්‍ය නිරූපා පල්ලෙවත්ත මහත්මිය සඳහන් කළේ වැඩිම ලාදුරු රෝගීන්ගේ සංඛ්‍යාවක් වාර්තා වන්නේ බස්නාහිර පළාතෙන් බවයි. එය සමස්ත රෝගීන්ගෙන්  40% ක් වනවා. වෛද්‍යවරිය පැවසුවේ ලාදුරු මර්දන මාසය මේ වනවිට ක්‍රියාත්මක බවයි. ඒ අනුව රෝගීන් හඳුනා ගැනීම වැඩි කර ඇති බවද ඇය වැඩිදුරටත්  ප්‍රකාශ කළා ය.

ඊශ්‍රායලය පලස්තීන සිරකරුවන් 110 දෙනෙකු නිදහස් කර තිබෙනවා. ඒ ගාසා තීරයේ රඳවා තබා ගෙන සිටි ඊශ්‍රායල ජාතිකයින් තිදෙනෙකු සහ තායි ජාතිකයින් පස් දෙනෙකු හමාස් සටන්කාමීන් විසින් නිදහස් කිරිමත් සමගයි. කෙසේ වෙතත් හමාස් ග්‍රහනයේ සිටි ඊශ්‍රායල කාන්තාවක් නිදහස් කරන අවස්ථාවේදී අනුගමනය කළ ක්‍රියාකලාපයක් හේතුවෙන් ඊශ්‍රායලයේ සිරකරුවන් නිදහස් කිරීම ඊශ්‍රායල අගමැති විසින් පැය කිහිපයක් ප්‍රමාද කර තිබෙනවා. දින 470කට පසුව පලස්තීන සිරකරුවන් ඔවුන්ගේ පවුලේ සාමාජිකයින් සමඟ නැවත එක්වූ  බව විදෙස් මාධ්‍ය වාර්තා කළේ.