Author: Dhanushka

විනාශ වු ඛාන් යුනිස් ප්‍රදේශයට පලස්තීනුවන් නැවතත් පැමිණෙමින් සිටිනවා. ගාසා තීරයේ දකුණු දිග නගරයක් වන ඛාන් යුනිස් වෙත ඊශ්‍රායල හමුදා දැවැන්ත ප්‍රහාර එල්ල කිරීමත් සමග එම ප්‍රදේශය නටඹුන් බවට පත්වුණා. කෙසේ වෙතත් මේ වන විට එම ප්‍රදේශයෙන් ඊශ්‍රායල හමුදා ඉවත් කර ගැනීමත් සමග යළිත් පලස්තීන වැසියන් එම ප්‍රදේශයට පැමිණෙමින් සිටින බවයි විදෙස් වාර්තා සදහන් කරන්නේ. ඊශ්‍රායල ආරක්ෂක අමාත්‍ය යෝව් ගැලන්ට් පවසන්නේ ඊශ්‍රායල හමුදා එම ප්‍රදේශයෙන් ඉවත් වුව ද ඉදිරි මෙහෙයුම් සැලසුම් කරමින් සිටින බවයි. ගාසා තීරයේ නුසෙයිරාත්, රාෆා හා වෆා ප්‍රදේශවලට එල්ල වු ප්‍රහාරවලින් පලස්තීන වැසියන් 7 දෙනෙකු මිය ගොස් තිබෙනවා.

මොසැම්බික් හි උතුරු වෙරළට ඔබ්බෙන් වූ මුහුදේ යාත්‍රාවක් ගිලී යාමෙන් පුද්ගලයින් 90 කට වැඩි පිරිසක් මියගොස් ඇති බව විදෙස් මාධ්‍ය වාර්තා කළා. යාත්‍රාවේ සිටි බවට විශ්වාස කෙරෙන 130 දෙනෙකුගෙන් පස් දෙනෙකු පමණ මේ වන විට බේරාගෙන ඇති බවයි නාම්පුලා පළාතේ නිලධාරීන් පවසන්නේ. මියගිය අය අතර කුඩා දරුවන් රැසක් ද සිටින බවයි නාම්පුලා රාජ්‍ය ලේකම්වරයා මාධ්‍ය වෙත ප්‍රකාශ කළේ. එහිදී ඔහු සඳහන් කර සිටියේ තදබදය හේතුවෙන් යාත්‍රාව දියේ ගිලී ඇති බවයි.

උමා ඔය බහුකාර්ය සංවර්ධන ව්‍යපෘතිය යටතේ ජාතික විදුලි බල පද්ධතියට මෙගාවොට් 120 ක දායකත්වයක් මෙම මස අවසන් වන විට එක් කිරීමට නියමිත බව සඳහන් වනවා. මෙම ව්‍යපෘතිය අප්‍රේල් මස අවසන් වන විට විවෘත කිරීම සඳහා ජනාධිපතිවරයා උපදෙස් ලබා දී ඇති බව වාරිමාර්ග, වනජීවි හා වන සංරක්ෂණ අමාත්‍ය පවිත්‍රා වන්නිආරච්චි මහත්මිය ප්‍රකාශ කළා. පසුගියදා එම අමාත්‍යාංශයේ පැවති මෙම ව්‍යපෘතිය පිළිබඳ සාකච්ඡාවකට එක්වෙමින් අමාත්‍යවරිය මේ බව කියා සිටියා.

මෙම වසරේ පළමු මාස 03 ඇතුළත සංචාරකයින් 6 ලක්ෂ 35,784 දෙනෙකු මෙරටට පැමිණ ඇති බව සංචාරක අමාත්‍ය හරීන් ප්‍රනාන්දු මහතා පවසනවා. එමඟින් උපයා ඇති ආදායම ඇමරිකානු ඩොලර් මිලියන 1,025 ක් බව අමාත්‍යවරයා සඳහන් කළා. වසරක් තුළ මෙරටට පැමිණි වැඩිම සංචාරකයින්ගේ සංඛ්‍යාව මෙම වසරේ දී වාර්තා වීමට ඉඩ තිබෙන බව ද ඔහු කියා සිටියා. මේ වන විට වසරක දී වැඩිම සංචාරකයින් පිරිසක් මෙරටට පැමිණ ඇත්තේ 2018 වසරේ දී වන අතර එම සංඛ්‍යාව ලක්ෂ 23 ක් බවයි සඳහන් වන්නේ.

කොම්පඤ්ඤ වීදිය, විනිසුරු අග්බාර් මාවත හා උත්තරානන්ද මාවත සම්බන්ධ කරමින් දුම්රිය මාර්ගයට ඉහළින් ඉදිකරන ලද ගුවන් පාලම අද දින ජනාධිපති රනිල් වික්‍රමසිංහ මහතාගේ ප්‍රධානත්වයෙන් විවෘත කරනු ලැබුවා. මෙම ව්‍යාපෘතියේ සෙසු ඉදිකිරීම් කටයුතු නුදුරේදී අවසන් කිරීමට නියමිතව ඇති අතර සමස්ත ව්‍යාපෘතිය වෙනුවෙන් ඇස්තමේන්තුගත මුදල රුපියල් බිලියන 5 කට අධික බවයි ජනාධිපති මාධ්‍ය අංශය සදහන් කළේ.

අප්‍රේල් මස 15 වන දා රජයේ නිවාඩු දිනයක් බවට පත්කිරීමට රජයේ අවදානය යොමුව තිබෙනවා. ඒ සම්බන්ධයෙන් වන තීරණය ගැනීම සදහා මෙම යෝජනාව අද පස්වරුවේ පැවැත්වෙන කැබිනට් මණ්ඩල හමුවට දැනුම් දීමටයි නියමිතව ඇත්තේ. අප්‍රේල් මස 14 වන දිනයේ අලුත් අවුරුදු නැකත් පැවැත්වෙන අතර 15 වන සඳුදා සාමාන්‍ය රාජකාරි දිනයක් වීම හේතුවෙන් මෙම තීරණය ගැනීමට රජයේ අවදානය යොමුව තිබෙනවා.

ගාසා තීරයට ආධාර ලබාදීම සදහා වන නව මාර්ග දෙකක් විවෘත කිරීමට අනුමැතිය ලබාදුන් බව ඊශ්‍රායලය පවසනවා. ඒ හරහා මානූෂීය ආධාර ලබාදීමට හැකියාව පවතින බවට ඊශ්‍රායලය සදහන් කර ඇති බවයි විදෙස් මාධ්‍ය වාර්තා කර ඇත්තේ. ගාසා තීරයේ සිවිල් වැසියන්ට හානි කිරීම වැළැක්විය යුතු බවට අමෙරිකාව විසින් අනතුරු ඇඟවීමක් සිදු කළා. ඒ අනුව මෙම ක්‍රියාමාර්ග නොගන්නේ නම් ඊශ්‍රායලයට අමෙරිකානු සහය අඛණ්ඩව ලබානොදෙන බවයි ප්‍රකාශ කර තිබුණේ. එම අනතුරු ඇඟවීමෙන් පසුව කෙටි කාලයක් තුළ මෙම පියවර ගැනීමට ඊශ්‍රායලය කටයුතු කර තිබෙනවා.

විදේශයන් හි සේවයේ නියුතු ශ්‍රී ලාංකිකයන් සදහා විද්්‍යුත් වාහන ආනයනය කිරීම සදහා බලපත්‍ර ලබාදීම දීර්ඝ කිරීමේ ගැසට් පත්‍රය අත්හිටුවීමට තීරණය කර තිබෙනවා. ඒ, ක්‍රම සහ විධි පිළිබද කාරක සභාවෙන් ලබාදුන් නියෝගයකට අනුවයි. විදුලි වාහන ආනයනය කිරීම සදහා බලපත්‍ර ලබාදීමේදී සිදු වූ අක්‍රමිකතා සම්බන්ධයෙන් විගණකාධිපතිවරයා විසින් සිදුකරනු ලබන වෝහාරික විගණනය අවසන් වන තෙක් මෙම අත්හිටුවීම බලපැවැත්වෙන බවයි ක්‍රම සහා විධි පිළිබද කාරක සභාව සදහන් කළේ.

පොලිස්පති දේශබන්දු තෙන්නකෝන් මහතා අද පෙරවරුවේ ශ්‍රේෂ්ඨාධිකරණයට පැමිණ තිබෙනවා. ඒ, ශ්‍රේෂ්ඨාධිකරණය ලබාදුන් නියෝගයකට අනුවයි. අරගල සිද්ධීන්වලින් පසුව ස්ථාන මාරුවෙන් ලද පොලිස් ස්ථානාධිපතිවරුන් 5 දෙනෙකු විසින් ඉදිරිපත් කළ මූලික අයිතිවාසිකම් පෙත්සම් සම්බන්ධයෙන් කරුණු විමසීම සදහා මෙලෙස පොලිස්පතිවරයාව ශ්‍රේෂ්ඨාධිකරණය හමුවට කැඳවා තිබෙනවා.

ජාත්‍යන්තර මූල්‍ය අරමුදලේ දෙවැනි සමාලෝචනය සම්පූර්ණ වන විට වාණිජ ණය හිමියන් සමග එකඟතාවකට එළඹීමට ශ්‍රී ලංකාවට හැකිවනු ඇති බවට දැඩි විශ්වාසයක් පවතින බව ජාත්‍යන්තර මූල්‍ය අරමුදල ප්‍රකාශ කර තිබෙනවා. ශ්‍රී ලංකාව මේ වන විට බැඳුම්කරහිමියන් සමග ඩොලර් බිලියන 12 ක ණය ප්‍රතිව්‍යූහගතකරණය සදහා සාකච්ඡා කරමින් පවතින අතර එය ආර්ථික අර්බුදයෙන් මිදීම සදහා ශ්‍රී ලංකාවට අත්‍යාවශ්‍ය පියවරක් ලෙසයි සැලකෙන්නේ. ජාත්‍යන්තර මූල්‍ය අරමුදලේ ප්‍රකාශිකාවක් වන ජූලි කොසැක් ශ්‍රී ලංකාව සම්බන්ධයෙන් මෙම කරුණු සදහන් කර තිබුණා.