Author: Anura Premakumara

තිරසර හා තරගාකාරී ආර්ථිකයක් නිර්මාණය කිරීමට ශ්‍රී ලංකාව කැපවී සිටින බව ජනාධිපති රනිල් වික්‍රමසිංහ මහතා පවසනවා. බලශක්ති පරිවර්තනයේ ඉදිරි ගමන්මග මැයෙන් කොළඹදී පැවැති සාකච්ඡාවකට එක්වෙමින් ජනාධිපතිවරයා මේ බව ප්‍රකාශ කළා. මෙරට පුනර්ජනනීය බලශක්තිය ප්‍රයෝජනයට ගැනීම සහ හරිත හයිඩ්‍රජන් නිෂ්පාදනයේ ඉදිරි ප්‍රවණතා සොයා බැලෙන පුළුල් සැලැස්මක අවශ්‍යතාව ද ජනාධිපතිවරයා මෙහිදී පෙන්වා දුන්නා. එමෙන්ම හරිත බලශක්ති ක්ෂේත්‍රයේ ප්‍රගතිය වෙනුවෙන් ජාත්‍යන්තර විශේෂඥ දැනුම සහ ආයෝජන අපේක්ෂා කරන බව ද ජනාධිපති රනිල් වික්‍රමසිංහ මහතා මෙහිදී සදහන් කළා.

සංචාරක පාකිස්ථාන කණ්ඩායම සහ එංගලන්ත කණ්ඩායම අතර පැවැත්වීමට නියමිතව තිබූ තෙවැනි විස්සයි විස්ස ක්‍රිකට් තරඟය වර්ෂාව හේතුවෙන් අතහැර දැමීමට ඊයේ කටයුතු කරනු ලැබුවා. තරඟයට වර්ෂාවෙන් බාධා එල්ල වීමත් සමග කාසියේ වාසිය හෝ උරගා බැලීමට නොහැකි වුණා. දෙරට අතර පැවති පළමු තරඟයද වර්ෂාව හේතුවෙන් අතහැර දැමුණු අතර, දෙවැනි තරඟය එංගලන්ත කණ්ඩායම ජයග්‍රහණය කරනු ලැබුවා.

ජාඇල සමුපාකාර ග්‍රාමීය බැංකුව බිඳ රුපියල් කෝටි 02කට ආසන්න වටිනාකමකින් යුත් රන්භාණ්ඩ හා මුදල් සොරා ගැනීමේ සිද්ධියට ආධාර අනුබල දුන් පුද්ගලයන් දෙදෙනෙකු අත්අඩංගුවට ගෙන තිබෙනවා. මෙම පුද්ගලයන් අත්අඩංගුවට ගත් අවස්ථාවේ ඔවුන් සන්තකයේ තිබී අයිස් මත්ද්‍රව්‍ය ග්‍රෑම් 10යි මිලිග්‍රෑම් 210ක් සොයා ගත් බවයි පොලීසිය සඳහන් කළේ. මෙම සැකකරුවන් අවුරුදු 41 සහ 48 යන වයස් වල පසුවන පානදුර හා බොරලැස්ගමුව යන ප්‍රදේශ වල පදිංචිකරුවන් වන අතර, සිද්ධිය සම්බන්ධයෙන් බස්නාහිර උතුර අපරාධ කොට්ඨාසය වැඩිදුර විමර්ශන සිදු කරනු ලබනවා.

සමලිංගික පිරිමි පුද්ගලයන් සම්බන්ධයෙන් සිදු කළ ප්‍රකාශයක් පිළිබඳ සමාව අයැද සිටින බව අතිඋතුම් ෆ්‍රැන්සිස් පාප් වහන්සේ පවසනවා. ඒ අනුව මෙම ප්‍රකාශය කිසිවෙකුගේ සිත් රිදවීමේ අදහසින් පාප් වහන්සේ ප්‍රකාශ නොකල බවට වතිකානුව නිකුත් කළ නිවේදනයක සඳහන් බවයි විදෙස් මාධ්‍ය වාර්තා කර ඇත්තේ. ඉතාලි බිෂොප්වරුන්ගේ සමුළුවේදී සමලිංගික පිරිමින් පුද්ගලයන්ට පූජකත්වය සඳහා පුහුණුවීමට ඉඩ නොදිය යුතු බවට පාප් වහන්සේ සිදු කළ ප්‍රකාශය පිළිබඳ විවිධ අදහස් පළව තිබුණා. ඒ අනුව අතිඋතුම් ෆ්‍රැන්සිස් පාප් වහන්සේ මෙලෙස සමාව අයැද සිටින බවයි විදෙස් මාධ්‍ය වැඩිදුරටත් වාර්තා කර ඇත්තේ.

2024 පන්දුවාර විස්සයි විස්ස ලෝක කුසලානයට පෙර පැවැත්වෙන පුහුණු තරඟාවලියේ ශ්‍රී ලංකාව මුහුණදුන් පළමු තරඟයෙන් නෙදර්ලන්ත කණ්ඩායම හමුවේ ලකුණු 20ක පරාජයක් අත්කර ගැනීමට සිදු වුණා. තරඟයේ පළමුවෙන් පන්දුවට පහරදුන් නෙදර්ලන්ත කණ්ඩායම නියමිත පන්දුවාර 20 අවසානයේ කඩුලු 05ක් දැවී ලකුණු 181ක් රැස් කළා. ඒ අනුව පිළිතුරු ඉනිම ක්‍රීඩා කළ ශ්‍රී ලංකා කණ්ඩායමට පන්දුවාර 18යි පන්දු 5ක් අවසානයේ සියලුදෙනා දැවී රැස් කරගත හැකි වූයේ ලකුණු 161ක් පමණයි. පුහුණු තරග යටතේ ශ්‍රී ලංකාව ක්‍රීඩා කරන දෙවැනි පුහුණු තරගය අයර්ලන්තයට එරෙහිව ලබව 31 වැනිදා පැවැත්වීමට නියමිතව තිබෙනවා.

සක්‍රීය නිරිත දිග මෝසම් තත්ත්වය හේතුවෙන් දිවයිනේ දැනට පවතින වැසි සහ සුළං තත්ත්වය තවදුරටත් බලාපොරොත්තු විය හැකි බව කාලගුණ විද්‍යා දෙපාර්තමේන්තුව පවසනවා. අද දිනයේදී බස්නාහිර සහ සබරගමුව යන පළාත් වලත්, නුවරඑළිය දිස්ත්‍රික්කයෙත් ඇතැම් ස්ථාන වලට මිලිමීටර් 100ට වැඩි තද වැසි ඇති විය හැකි බවයි එම දෙපාර්තමේන්තුවේ අනාවැකි අංශයේ අධ්‍යක්ෂ අජිත් විජේමාන්න මහතා සඳහන් කළේ. මේ අතර අයහපත් කාලගුණයත් සමග ඇතිවන ආපදා තත්ත්වයන්ට මුහුණ දීම සම්බන්ධයෙන් ආරක්ෂ රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතාගේ ප්‍රධානත්වයෙන් සාකච්ඡාවත් පවත්වා තිබෙනවා. ඒ අනුව සියලු දිස්ත්‍රික් කමිටු යාවත්කාලීන කිරීමට කටයුතු කරන ලෙස මෙහිදී ඉල්ලීමක් කළ බවයි ඔහු සඳහන් කළේ.

ලබන මාසයේ 10 වැනිදා සිට වතු කම්කරුවන්ට දෛයිනික වැටුප ලෙස රුපියල් 1700ක මුදලක් ගෙවිය යුතු බව කම්කරු හා විදේශ රැකියා අමාත්‍ය මනූෂ නානායක්කාර මහතා පවසනවා. රජය මතු වතු සාමාගම් වලින් එම මුදල ගෙවීමට කටයුතු කරන බවයි ජනාධිපති මාධ්‍ය කේන්ද්‍රයේ පැවති මාධ්‍ය හමුවකට එක්වෙමින් ඔහු සඳහන් කළේ. කෙසේ වෙතත් ඉදිරි මැතිවරණයේදී ඡන්ද ලබා ගැනීමේ අරමුණින් වතු කම්කරුවන් විකිණීමට සූදානම් වීම නතර කරන ලෙස සමගි ජන බලවේගයේ පාර්ලිමේන්තු මන්ත්‍රී හෙක්ටර් අප්පුහාමි මහතා සඳහන් කළා.

ඉදිරි ජනාධිපතිවරණයේදී කිසිවෙකුත් අභියෝගයක් නොවන බව හිටපු ජනාධිපති මෛත්‍රීපාල සිරිසේන මහතා පවසනවා. ශ්‍රී ලංකා නිදහස් පක්ෂයේ මෛත්‍රී පාර්ශවය ඊයේ පැවැත්වූ සාකච්ඡාවකින් අනතුරුව මාධ්‍යවේදීන් යොමු කළ ප්‍රශ්න වලට පිළිතුරු ලබා දෙමින් හිටපු ජනාධිපතිවරයා මේ බව සඳහන් කළා.

මෙරට උද්දමණය ඉදිරියටත් ඉලක්ක ගත මට්ටමේ පවත්වාගෙන යා හැකි බව මහබැංකු අධිපති ආචාර්ය නන්දලාල් වීරසිංහ මහතා පවසනවා. කොළඹ ඊයෙ පැවති මාධ්‍ය හමුවකට එක්වෙමිනුයි ඔහු මේ බව සඳහන් කළේ. මේ අතර වාහන ආනයන සීමා ක්‍රමානුකූලව ලිහිල් කිරීමට රජය තීරණය කරන්නේ නම් ඒ සඳහා විදෙස් සංචිත කළමනාකරණය කිරීමට මහ බැංකුවට හැකියාව ඇති බවද මහබැංකු අධිපතිවරයා සඳහන් කළා.

ග්‍රාම නිලධාරී සේවයේ පවතින ගැටළු සඳහා ලබා දිය හැකි විසඳුම් ඉදිරිපත් කරන ලෙස ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක මහතා අදාළ නිලධාරීන්ට උපදෙස් දී තිබෙනවා. එහිදී රාජ්‍ය සේවයේ අනෙකුත් සේවාවන් සමඟ ගැටීමක් ඇති නොවන ආකාරයට මෙම තීරණ ගන්නා ලෙසයි ඔහු උපදෙස් ලබා දී ඇත්තේ. එමෙන්ම පවතින ගැටළු සාකච්ඡා කර පොදු එකඟතාවකට පැමිණීමට කටයුතු කරන ලෙසයි ඒ මහතා නිලධාරීන්ට වැඩිදුරටත් දැනුම් දුන්නේ. සාගල රත්නායක මහතා මෙම උපදෙස් ලබා දෙනු ලැබුවේ ග්‍රාම නිලධාරී සේවයේ පවතින ගැටලු පිළිබඳව ග්‍රාම නිලධාරී වෘත්තීය සමිති සම්මේලනය හා අදාළ රේඛීය ආයතනවල නිලධාරීන් සමඟ ජනාධිපති කාර්යාලයේදී පැවති සාකච්ඡාවකට එක්වෙමින්.