දැවැන්ත වෘත්තීය සමිති ක්‍රියාමාර්ගයක් දියත් කිරීමට සාමූහික තීරණයක් ගත් බව ලංකා විදුලිබල මණ්ඩලයේ වෘත්තීය සමිති එකමුතුව ප්‍රකාශ කරනවා.
ඒ අනුව සහන මිලට විදුලිය ලබාදීම ඇතුළු ඉල්ලීම් කිහිපයක් මුල් කර ගනිමින් ලබන 27වන සඳුදා දිනයේදී එම වෘත්තීය සමිති ක්‍රියාමාර්ගය ආරම්භ කරන බවයි සභාපති මාලක වික්‍රමසිංහ මහතා කියා සිටියේ.
ලංවිම පාරිභෝගිකයින්ට සමතුලිතව සහ සහන ලබා දෙන වඩා හොඳ ක්‍රමයක් අනුව ගාස්තු ගණනය කිරීමේ ක්‍රමය සංශෝධනය කළ යුතු බවයි ඒ මහතා අවධාරණය කරන්නේ.
එමෙන්ම 2022 සහ 2021 වසරවලදී නොගෙවූ වාර්ෂික පාරිතෝෂිත මුදල සහ වෛද්‍ය ගෙවීම් ද ඉල්ලා සිටින බවයි ඒ මහතා කියා සිටියේ.
එබැවින් වෘත්තීය සමිති 12කට අනුයුක්ත සාමාජිකයින් 6,000කට අධික පිරිසක් සඳුදා පෙරවරු 10:30ට අසනීප නිවාඩු ඉල්ලා වෘත්තීය සමිති ක්‍රියාමාර්ගයේ නිරතවනු ඇති.
බලධාරීන් ප්‍රතිචාර නොදක්වන්නේ නම් තම වෘත්තීය ක්‍රියාමාර්ගය රට පුරා ව්‍යාප්ත කරන බව ද ලංකා විදුලිබල මණ්ඩලයේ වෘත්තීය සමිති එකමුතුව ප්‍රකාශ කළා.
