ශ්‍රී ලංකා තුන් ඉරියව් ක්‍රීඩක වනිදු හසරංගට යළිත් තරග තහනමක් පැනවීමට ජාත්‍යන්තර ක්‍රිකට් කවුන්සලය පියවර ගෙන තිබෙනවා.
ඒ, බංග්ලාදේශය සමග පැවැති තෙවැනි එක්දින ක්‍රිකට් තරගයේ දී ඔහු අයි.සී.සී විනය නීති සංග්‍රහය උල්ලංඝනය කරමින් හැසිරීම හේතුවෙන්.
විනිසුරු තීරණයකට විරුද්ධත්වය ප්‍රකාශ කරමින් ඔහු විසින් අයි.සී.සී විනය නීති සංග්‍රහයේ 2.8 වගන්තිය උල්ලංඝනය කර ඇති බවයි ජාත්‍යන්තර ක්‍රිකට් කවුන්සලය නිවේදනය කළේ.
බංග්ලාදේශ ඉනිමේ 37 වැනි පන්දුවාරයේ දී හසරංග විසින් විනිසුරුවරයකුගෙන් සිය හිස්වැසුම උදුරා ගැනීමක් සිදු කළ බවත්, ඉන් විනිසුරුවරයා සමච්චලයට ලක් කිරීමක් සිදුව ඇති බවත් අයි.සී.සීය පෙන්වා දෙනවා.
මෙම වරද හේතුවෙන් ඔහුගේ විනය වාර්තාවට දඩුවම් ලකුණු 3ක් පනවා ඇති අතර, තරග ගාස්තුවෙන් සියයට 50ක දඩ මුදලක් ද ඔහුට නියම කර තිබෙනවා.
ඒ අනුව මාස 24 ක් තුළ ඔහුගේ දඩුවම් ලකුණු ප්‍රමාණය 8 ක් දක්වා ඉහළ ගොස් ඇති බැවින් ඔහුට එරෙහිව ටෙස්ට් තරග දෙකක හෝ එක්දින තරග 4ක හෝ විස්සයි 20 තරග 4ක තහනමක් පැනවීමට සිදු වනවා.
ඒ අනුව ඔහුට බංග්ලාදේශය සමග පැවැත්වීමට නියමිත තරග දෙකකින් යුත් ටෙස්ට් ක්‍රිකට් තරගාවලිය සදහා ක්‍රීඩා කිරීමේ අවස්ථාව අහිමි වන බවයි අයි.සී.සීය සදහන් කළේ.
මේ අතර ශ්‍රී ලංකා එක්දින ක්‍රිකට් කණ්ඩායමේ නායක කුසල් මෙන්ඩිස්ට ජාත්‍යන්තර ක්‍රිකට් කවුන්සලය විසින් දඩ නියම කිරීමක් සිදු කර තිබෙනවා.
ඒ, බංග්ලාදේශය සමග පැවැති තෙවැනි එක්දින ක්‍රිකට් තරගයේ දී අයි.සී.සී විනය නීති සංග්‍රහය උල්ලංඝනය කරමින් හැසිරීම හේතුවෙන්.
මෙන්ඩිස් විසින් විනය නීති සංග්‍රහයේ 2.13 වගන්තිය උල්ලංඝනය කරමින් දෙවැනි මට්ටමේ වරදක් සිදු කර ඇති බවයි අයි.සී.සීය නිවේදනය කළේ.
තරගයෙන් අනතුරුව විනිසුරුවරුන්ට අතට අත ලබා දීමේ දී මෙන්ඩිස් විසින් විනිසුරුවන්ට සිය අප්‍රසාදය පල කර ඇති බව සදහන්.
ඒ අනුව ඔහුට තරග ගාස්තුවෙන් සියයට 50ක දඩ මුදලක් හා ඔහුගේ විනය වාර්තාවට දඩුවම් ලකුණු 3ක් පනවා තිබෙනවා.
කුසල් මෙන්ඩිස් විසින් සිය වරද හා තරග තීරක ඇන්ඩි පයික්‍රොෆ්ට් ලබා දුන් දඩුවම පිළිගෙන ඇති බවයි අයි.සී.සීය සදහන් කළේ.
