එළඹෙන ලෝක දුම්වැටි විරෝධී දිනය (31) වෙනුවෙන් දඹුල්ල ප්රාදේශීය ලේකම් කාර්යාලයේ සමෘද්ධි සමාජ සංවර්ධන අංශය වෙළඳසැල් හිමියන්ගෙන් අද (30) දින ලිපියක් මඟින් ඉල්ලීමක් කරන්නට වුනා.
දඹුල්ල ප්රාදේශීය ලේකම් කාර්යාලයට අනුයුක්ත සමෘද්ධි සමාජ සංවර්ධන අංශයේ නිලධාරීහු දඹුල්ල නගරයේ වෙළඳසැලක් ගානේ ගොස් මෙම ඉල්ලීම සිදු කරන්නට වුනා.
මෙම ලිපි ලබා දීම සහ ඉල්ලීම් සිදුකිරීමට යෑමේ දී දඹුල්ල නගර මධ්යයේ පිහිටි තොග සහ සිල්ලර වෙළඳසැල් රැසක් දුම්වැටි අලෙවි කිරීම් සම්පූර්ණයෙන්ම නවතා දමා තිබෙන බව හෙළිදරව් වීම විශේෂත්වයක් වන අතර අනිකුත් වෙළඳසැල් සහ හෝටල් හිමියන් ලෝක දුම්වැටි විරෝධී දිනය වන මැයි මස 31 දින සම්පූර්ණයෙන්ම සියළු දුම්වැටි අලවියෙන් ඉවත්වීමට තමන්ගේ සහයෝගය ලබාදෙන බව සඳහන් කරන්නට වුනා.
තවත් පිරිසක් කියා සිටියේ දුම්වැටි අලෙවියෙන් විශේෂ ලාභයක් නොමැති නමුත් දුම්වැටි නොමැති වුවහොත් අඩුම තරමේ තේ එකක් බීමටවත් පාරිභෝගිකයන් පැමිණෙන්නේ නැති බවයි.
බහුතරයක් වෙළඳසැල් හිමියෝ සම්පූර්ණයෙන්ම දුම්වැටි ගෙන්වීම අලෙවි කිරීම් නවතා දැමීමට හැකි නම් ඒ සඳහා තමන්ගේ සහයෝගය ලබාදෙන බව කියා සිටියා.
සෑම වසරකම දුම්වැටි විරෝධී දිනය සැමරීම සඳහා දිවයිනේ විවිධ ප්රදේශ වල විවිධ වැඩසටහන් ක්රියාත්මක වෙද්දී දඹුල්ල නගරයේ සෑම වෙළෙඳ ව්යාපාරිකයෙක්ම දැනුවත් කොට දුම්වැටි විරෝධී දිනය දා දුම්වැටි අලෙවිය නවතා ගැනීමට උත්සාහයක නිරත වන බවත්, වෙළඳ සැල් බොහොමයක් මේ සඳහා තමන්ගේ දායකත්වය ලබාදෙන බවයි දඹුල්ල ප්රාදේශීය ලේකම් කාර්යාලයේ සමාජ සංවර්ධන නිලධාරි තිලක් පුෂ්පකුමාර මහතා පවසා සිටියේ.
