මීගොඩ ප්‍රදේශයේ දන්සලක් අසල සිදු වූ මාරාන්තික රිය අනතුරෙන් පසුව පළාගොස් සැඟව සිටි කැබ් රථයේ හිමිකරු සහ තවත් පුද්ගලයෙකු මීගොඩ පොලිසිය විසින් අද(06) අත්අඩංගුවට ගෙන තිබෙනවා.
ඒ අදාළ සැකකරුවන් දෙදෙනා නීතිඥවරයකු මාර්ගයෙන් පොලිසියට භාරවීමෙන් අනතුරුවයි.
වෙසක් පොහොය යෙදී තිබූ පසුගිය 31 වනදා රාත්‍රී කාලයේදී මීගොඩ හන්දිය ආසන්න ප්‍රදේශයේ පැවැත්වූ රොටී දන්සලක පෝලිමේ සිටි පිරිසක් වෙත බීමත් රියදුරෙක් පැදවූ කැබ් රථයක් කඩා වැදීමෙන් අමෙම අනතුර සිදුවූවා.
එහිදී පුද්ගලයන් හය දෙනෙක් මියගොස් තවත් 7 දෙනෙකු තුවාල ලැබුවා.
මෙලෙස මරණයට පත්වූයේ එම දන්සලේ පෝලිමේ සිටි නවීෂා නිලක්ෂි(35), ලසිත ප්‍රියංකර(38), පී.බී. ඉන්ද්‍රාණි(56) යන එකම පවුලේ තිදෙනෙක් සහ ඥාති දියණියක් වූ මලීෂා සත්සරණි (15) සහ එකම පවුලේ සහෝදරයන් වූ 38 හැවිරිදි නිෂාන් ප්‍රියංකර සහ 35 හැවිරිදි ඉෂාන් ප්‍රියංකර යන දෙදෙනා ඇතුළු හය දෙනෙක් ජීවිතක්ෂයට පත්වූවා.
අනතුර සිදු කිරීමෙන් පසුව පලාගිය සැකකාර රියදුරා ලුහුබැඳ ගොස් ගොඩගම ප්‍රදේශයේදී කැබ් රථයද සමගින් අල්ලා ගනු ලැබුවා.
එලෙස අත්අඩංගුවට ගැනුණු සැකකාර රියදුරා ඒ වන විටත් අධික ලෙස බීමත්ව සිට ඇති බවයි පොලිසිය පවසන්නේ.
මනුෂ්‍ය ඝාතන සිදු කිරීම, රියදුරු බලපත්‍රයක් නොමැතිව රිය ධාවනය, බීමත්ව රිය ධාවනය, අනතුරක් වළක්වා නොගැනීම ඇතුළු චෝදනා 10ක් යටතේ සැකකාර රියදුරුවරයා හෝමාගම මහේස්ත්‍රාත් අධිකරණය වෙත ඉදිරිපත් කරනු ලැබුවා.
එහිදී රියදුරා එළැඹෙන 16 වනදා දක්වා රක්ෂිත බන්ධනාගාර ගත කරන ලෙසයි අධිකරණය නියෝග කළේ.
අනතුර සිදුවන අවස්ථාවේදී කැබ් රථයේ තවත් පුද්ගලයන් කිහිපදෙනෙක් සිට ඇති බවටත් ඔවුන් අනතුරෙන් පසුව පළාගොස් ඇති බවටත් පසුව අනාවරණ වී තිබෙනවා.
ඒ අනුව අදාළ සැකකරුවන් අත්අඩංගුවට ගැනීමට පොලිසිය මහජන සහය පතමින් ඔවුන්ගේ ඡායාරූප ප්‍රසිද්ධියට පත් කරනු ලැබුවා.
එලෙස ඡායාරූප ප්‍රසිද්ධියට පත් කිරීමෙන් පසුව කැබ් රථයේ හිමිකරු සහ තවත් පුද්ගලයෙක් අද(06) පෙරවරුවේ නීතිඥවරුන් මාර්ගයෙන් මීගොඩ පොලිස් ස්ථානය වෙත ඉදිරිපත් වී තිබෙනවා.
එලෙස ඉදිරිපත් වීමෙන් පසුව ඔවුන් දෙදෙනා මීගොඩ පොලිසිය විසින් අත්අඩංගුවට ගෙන තිබෙනවා.
