මහනුවර ඓතිහාසික ශ්‍රී දළදා මාළිගාවේ පවත්වන 2026 ඇසළ මහා පෙරහර අද සිට ආරම්භ වනවා . ඒ අනුව මෙවර ඇසළ මහා පෙරහරේ ප්‍රථම කුඹල් පෙරහර අද වීදි සංචාරය කිරීමට නියමිතයි. ශ්‍රී දළදා මාලිගාවෙන් අද සවස 6 යි 52 ට ,නැගෙනහිර දිශාභිමුඛව පෙරහර පිටත් වීමට නියමිතව තිබෙනවා. දළදා වීදීය , ඩී එස් සේනානායක වීදීය , පන්සල පාරේ ඉහළට ගමන් කර ,දේව වීදීය, කොළඹ වීදීය , යටිනුවර වීදීය ඔස්සේ රජ වීදීයට අවතීර්ණ වී ඉහළට විත් ශ්‍රී දළදා මාළිගාවට ගෙවදීමෙන් පළමු කුඹල් පෙරහැර අවසන් වනවා. ඓතිහාසික කන්ද උඩරට ඇසල මංගල්‍යයේ ප්‍රථම කුඹල් පෙරහර නැරඹීම සඳහා ඊයේ පෙරවරුවේ සිට ජනතාව නැරඹුම් ස්ථාන වෙන් කරගෙන සිටි බවයි අප වාර්තාකරු පැවසුවේ. මේ අතර පෙරහැර වෙනුවෙන් ශ්‍රී ලංකා පොලීසිය විසින් විශේෂ ආරක්ෂක වැඩපිළිවෙළක් සහ රථවාහන සැලැස්මක් ක්‍රියාත්මක කර තිබෙනවා . පෙරහැර ගමන් කරන කාලය තුළ රථවාහන ධාවනය සඳහා විකල්ප මාර්ග හඳුන්වා දීමටයි කටයුතු කර ඇත්තේ .
