අභිරහස් ලෙස මියගිය ව්‍යාපාරික දිනේෂ් ෂාෆ්ටර් මහතාගේ දේහය පිළිබද දෙවන පශ්චාත් මරණ පරීක්ෂණය අද (26) සිදුකිරීමට නියමිතව තිබෙනවා.
අධිකරණය නියෝගයක් මත ඔහුගේ දේහය දෙවන පශ්චාත් මරණ පරීක්ෂණය සදහා ඊයේ (25) යළි ගොඩගනු ලැබුවා.
ඒ කොළඹ අතිරේක මහේස්ත්‍රාත් රජීන්ද්‍රා ජයසුරිය මහත්මිය සහ දිනේෂ් ෂාෆ්ටර් මහතාගේ මරණයට හේතුව සෙවීම සදහා පත්කළ විශේෂ පංච පුද්ගල අධිකරණ වෛද්‍ය මණ්ඩලය ඉදිරියේදීයි.
ගොඩගනු ලැබු ෂාෆ්ටර් මහතාගේ දේහය වෝහාරික පශ්චාත් මරණ පරීක්ෂණය සදහා කරාපිටිය ශික්ෂණ රෝහල වෙත රැගෙනගොස් තිබුණා.
මේ සම්බන්ධයෙන් සොයා බැලීමට පත්කළ පංච පුද්ගල අධිකරණ වෛද්‍ය මණ්ඩලය මරණය සිදුවු දිනයේ දිනේෂ් ෂාෆ්ටර් මහතාගේ මෝටර් රථය නවතා තිබු ස්ථානය ද නිරීක්ෂණය කළා.
පොලිසිය පැවසුවේ දිනේෂ් ෂාෆ්ටර් මහතාගේ මරණය පිළිබද සිදුකරන විමර්ශන තවදුරටත් ක්‍රියාත්මක බවයි.
පොලිස් මාධ්‍ය ප්‍රකාශක , ජේ්‍යෂ්ඨ පොලිස් අධිකාරි නිහාල් තල්දුව මහතා කියා සිටියේ දෙවැනි පශ්චාත් මරණ පරීක්ෂණයෙන් පසු මරණයට හේතුව තහවුරු වනු ඇති බවයි.
