රන් ජාවාරමේ අලුත්ම ක්‍රමේ – 30 හැවිරිදි කත කොටු (PHOTOs)

නීතිවිරෝධී ලෙස රත්තරන් ශ්‍රී ලංකාවට ගෙන එන නවතම ක්‍රමයක් ලෙස සකස් කළ ක්‍රෙඩිට් කාඩ් පත් ( ණය පත් ) ( Credit Card) උපයෝගී කර ගනිමින් රුපියල් එකොළොස් කෝටි පහළොස් ලක්ෂ පනස් දහසක් වටිනා කැරට් 24 රත්තරන් තොගයක් සොයා ගනු ලැබුවා.

ඒ කටුනායක ගුවන් තොටුපළ පැමිණීමේ පර්යන්තයේ දී.

රේගු ආදායම් අධීක්ෂණ අංශයේ නිලධාරීන් පැවසුවේ මෙරට ගුවන් මගී කාන්තාවක සිද්ධිය සම්බන්ධයෙන් අත්අඩංගුවට ගෙන ඇති බවයි.

රේගු මාධ්‍ය ප්‍රකාශක නියෝජ්‍ය රේගු අධ්‍යක්ෂ (නීති කටයුතු ) සුදත්ත සිල්වා මහතා ද දැනුම් දුන්නේ විවිධ වානිජ බැංකු විසින් නිකුත් කල ක්‍රෙඩිට් කාඩ් ලෙස බැලූ බැල්මට හැගී යන ආකාරයටම මේවා සකස් කර ඇති බවයි.

මේ ආකාරයට රත්තරන් තොගයක් නීතිවිරෝධී ලෙස මෙරටට ගෙන ආ පළමු අවස්ථාව මෙයයි.

මේ ආකාරයේ නීතිවිරෝධී රත්තරන් ජාවාරම් මැඩලීමට – .කැරට් 24 රත්තරන් වලින් සකස් කරන ලද ස්වර්ණාභරණ ශ්‍රී ලංකාවට ගෙන ඒම තහනම් කරමින් මුදල් අමාත්‍යාංශය විසින් විශේෂ චක්‍රලේඛයක් ද නිකුත් කළා.

මෙම රත්තරන් තොගය නීතිවිරෝධී ලෙස ශ්‍රී ලංකාවට රැගෙන විත් ඇත්තේ ගම්පහ ප්‍රදේශයේ පදිංචි 30 හැවිරිදි නිතර නිතර ගුවන් ගමන් වල යෙදෙන කාන්තාවක්.

ඇය ඉන්දියාවේ චෙන්නායි සිට ඉන්දීය ගුවන් සේවයේ ඒ.අයි.- 273 දරන ගුවන් යානයෙන් කටුනායක ගුවන් තොටුපළ වෙත පැමිණ තිබුණා.

සැකකාරිය මුලින්ම ඩුබායි සිට ඉන්දියාවේ චෙන්නායි වෙත පැමිණ, එතැන් සිට ඉන්දීය ගුවන් සේවයේ ගුවන් යානයකින් මෙසේ කටුනායක ගුවන් තොටුපළ වෙත පැමිණ තිබුණේ රේගු නිලධාරීන්ගේ අවධානය වෙනතකට යොමු කිරීමටයි.

ඇය මේ වනවිට ශ්‍රී ලංකාව සහ ඉන්දියාව හරහා ඩුබායි වෙත ගුවන් ගමන් 04 වරක් පමණ සිදු කර ඇති බව ඇයගේ ගුවන් ගමන් බලපත්‍රයේ සඳහන්.

ගමන් මල්ලේ කිලෝ ග්රැම් 06 යි ග්රැම් 500 ක් බරැති මේ ආකාරයට කැරට් 24 රත්තරන් වලින් සකස් කළ ක්‍රෙඩිට් කාඩ් පත් 27 ක් ද , මාළ , වළලු සහ මුදු තොගයක් ද සගවා ගෙන තිබූ බවයි රේගු ආදායම් අධීක්ෂණ අංශය පවසන්නේ.

ඒවායේ වටිනාකම රුපියල් එකොළොස් කෝටි පහළොස් ලක්ෂ පනස් දහසක්.

මීට අමතරව මෙම ගමන් මල්ලේ කළු පැහැති සෙලෝ ටේප් වලින් ඔතන ලද කිලෝ ග්රැම් 02 ග්රැම් 200 ක් බරැති රත්තරන් ජෙල් (Gold Gel ) තොගයක් ද තිබී රේගු ආදායම් අධීක්ෂණ අංශයේ නිලධාරීන් භාරයට ගෙන තිබෙනවා.

මෙම අත් අඩංගුවට ගැනීම සදහා ඉන්දියාවේ ආදායම් බුද්ධි අංශයේ නිලධාරීන් විසින් ශ්‍රී ලංකා රේගුවේ ආදායම් අධීක්ෂණ අංශයේ නිලධාරීන් වෙත තොරතුරු සපයා දෙනු ලැබුවා.

( කටුනායක ටී.කේ.ජී.කපිල )