මල්වතු අස්ගිරි මහ නාහිමිවරුන්ගෙන් ජනපතිට පැමිණිල්ලක්

ව්‍යාජ දළදා මාළිගාවක් නිර්මාණය කොට ගොඩනැගීම සහ ශ්‍රී දළදා මාළිගාවට අපහාස වන ආකාරයේ ප්‍රකාශ නිකුත් කිරීම සම්බන්ධයෙන් මල්වතු – අස්ගිරි මහනාහිමිවරුන් සහ දළදා මාළිගාවේ දියවඩන නිළමේවරයා විසින් ජනාධිපති රනිල් වික්‍රමසිංහ මහතා වෙත පැමිණිල්ලක් ඉදිරිපත් කර තිබෙනවා.

කුරුණෑගල, වදාකඩ පාර, පොතුහැර යන ප්‍රදේශයේ ජානක සේනාධිපති යන අයෙකු විසින් “ව්‍යාජ දළදා මාළිගාවක්” නිර්මාණය කොට ඉදිකරමින් පවතින බවටයි මල්වතු – අස්ගිරි මහ නාහිමිවරුන් විසින් පැමිණිලි කර තිබෙන්නේ.

එමෙන්ම මෙම ස්ථානයට දැනටමත් දේශීය සහ විදේශීයව ගිහි පැවිදි බොහෝ දෙනා මිථයාවට රැවටී මිල මුදල් මෙන්ම රන් ආදිය පරිත්‍යාග කොට ඇති බවද ජනපතිවරයාට කර ඇති පැමිණිල්ලේ ඳසහන්.

මේ අතර බෞද්ධ ජනතාවගේ සිත් පෑරෙන ආකාරයෙන් සේපාල් අමරසිංහ නමැත්තෙකු බුදු දහමට හා ශ්‍රී දළදා වහන්සේට අපහාස වන ආකාරයේ ප්‍රකාශයන් සමාජ මාධ්‍ය ඔස්සේ පළ කර ඇති බවද දක්නට ලැබෙන බවයි අදාළ පැමිණිල්ලෙන් මහනායක හිමිවරුන් සහ දළදා මාලිගාවේ දියවඩන නිළමේවරයා ජනාධිපතිවරයා වෙත ඉදිරිපත් කර ලද පැමිණිල්ලේ දැක්වෙන්නේ.

මල්වතු – අස්ගිරි මහ නාහිමිවරුන් සහ දියවඩන නිලමේවරයා විසින් ජනාධිපතිවරයා වෙත ගොනු කරන ලද පැමිණිල්ල පහතින් දැක්වෙයි.