ටයිටැනික් නෞකාවේ ඛේදවාචකය සිදුවී අදට වසර 111 ක් සපිරෙනවා.
එවකට ලොව තිබූ සුඛෝපභෝගීම සහ වේගවත්ම මගී නෞකාව වන ටයිටැනික් නෞකාව 1912 වසරේ අප්‍රේල් 15 වන දා අත්ලාන්තික් සාගරයේ ගිලී ගියේ මංගල ගමන යන අතරතුරදීයි.
දිගින් මීටර් 270 ක් සහ පළලින් මීටර් 28 ක් වූ ටයිටැනික් නෞකාව 1910 දශකයේ ලොව ඉදිකළ විශාලතම මගී නෞකාව වනවා.
1912 අප්‍රේල් 10 වන දින එක්සත් රාජධානියේ සවුත් හැම්ටන් වරායේ සිට ඇමෙරිකාවේ නිව්යෝර්ක් දක්වා ටයිටැනික් නෞකාව තම මංගල චාරිකාව ඇරඹූ අතර මෙම චාරිකාවට මගීන් 2224ක් සහභාගී වී සිටියා.
ටයිටැනික් නැව ගිලීයාම නිසා පුද්ගල මරණ 1514 ක් සිදු වූ අතර එය එකල ලොව විශාලතම සමුද්‍රීය ව්‍යසනය ලෙසයි සැළකෙන්නේ.
ටයිටැනික් නැව වචනයේ පරිසමාප්ත අර්ථයෙන්ම සුඛෝපභෝගී නෞකාවක් වූ අතර පිහිනුම් තටාකයක්, සුපිරි පන්තියේ භෝජන ශාලාවක්, සහ සුඛෝපභෝගී කාමර ද ඇතුළත් වුණා.
කෙසේ වෙතත් ටයිටැනික් ඛේදවාචකයෙන් විශාල පිරිසකට ජීවිත අහිමි වීමට හේතුවක් ලෙස දැක්වෙන්නේ පුද්ගලයින් 1178 දෙනකුට පමණක් වන තරම් ජීවිතාරක්ෂක බෝට්ටු සංඛාවක් නව සතුව තිබීමයි.
තම ගමනාන්තයට දින හතරක් තිබියදී 1912 අප්‍රේල් 14 වන දින ටයිටැනික් නැව අයිස් කන්දක ගැටුණු අතර ඒ හේතුවෙන් පැය දෙකක පමණ කාලයක් ඇතුළත නැව තුළට ජලය කාන්දු වී පසුව න් නැව දෙකට කැඩීම සිදු වුණා.
මෙම සිදුවීම් සියල්ල සිදුවන අතරතුර කාන්තාවන්ට හා දරුවන්ට ජීවිත රැක ගැනීමට මූලිකත්වය දෙමින් ඔවුන් ජීවිතාරක්ෂක බෝට්ටුවලට ගොඩ කෙරුණා.
එමෙන්ම සුපිරි ධනවතුන්ටද මෙහිදී ජීවිතාරක්ෂක බෝට්ටු හිමි වූ බවයි ඉතිහාසයේ දැක්වෙන්නේ.
මුහුදු බත් වූ ටයිටැනික් නෞකාව 1985 වසරේදී සොයා ගැනීමට හැකි වූ අතර ඒ වන විට එය අඩි දොළොස්දහස් හාරසිය පහළොවක් ගැඹුරු මුහුදේ තැන්පත්ව තිබුණා.
මෙම දැවැන්ත ඛේදවාචකය සිදුවීමෙන් පසු ටයිටැනික් අනතුර මුල්කරගනිමින් විවිධ කලා නිර්මාණ බිහි වූ අතර ඒ අතර චිත්‍රපට රැසක් පවතිනවා.
මේ අතර ටයිටැනික් නෞකාවේ සැලැස්ම 2011 වසරේදී දී පවුම් ලක්ෂ දෙකකට වෙන්දේසි කෙරුණා.
මුහුදු බත් වූ ටයිටැනික් නෞකාවේ එම සැලසුම ලබන 22 වනදා යළි වෙන්දේසි කිරීමටයි සැලසුම් කර ඇත්තේ.
