ඉන්දියාවේ තවදුරටත් කුරුළු උණ වාර්තා වන බැවින් බිත්තර ආනයනය සදහා අවසර ලබාදිය නොහැකි බව සත්ත්ව නිෂ්පාදන සහ සෞඛ්‍ය දෙපාර්තමේන්තුවේ අධ්‍යක්ෂ ජනරාල් ආචාර්ය හේමාලි කොතලාවල මහත්මිය රාජ්‍ය වාණිජ විවිධ නීතිගත සංස්ථාවට දැනුම් දී තිබෙනවා .
ඇය පවසා ඇත්තේ සෞඛ්‍ය උපදේශන කමිටු වාර්තාව ඉදිරිපත් කර ඇති පර්යේෂණ දත්ත අනුව ඉන්දියාවෙන් බිත්තර ආනයනය කිරීමට තාක්ෂණික අනුමැතියක් ලබාදිය නොහැකි බවයි .
2022 වසරේ ඔක්තෝබර් 16 වැනිදා ඉන්දියාවේ කේරල ප්‍රාන්තයෙන් කුරුළු උණ වංසගතය වාර්තා වී ඇති අතර එය තවමත් සක්‍රීය තත්ත්වයේ පවතින බව එම වාර්තාවේ වැඩිදුරටත් සඳහන් .
මේ අතර වෙළඳසැල් තුනකට අධිකරණය විසින් රුපියල් ලක්ෂ 7 ක දඩ නියම කර තිබෙනවා .
ඒ පාලන මිල ඉක්මවා වැඩි මිලට බිත්තර අලෙවි කිරීම හේතුවෙන් .
පාරිභෝගික කටයුතු අධිකාරියේ කොළඹ දිස්ත්‍රික් ඒකකය සිදු කල වැටලීමකදී මෙම වෙළඳසැල් තුන ඔවුන්ට නිරීක්ෂණය වී ඇති බව වාර්තා වනවා .
ඵ් අනුව මස් හා ඒ ආශිත නිෂ්පාදන ජාලයක, දෙහිවල ප්‍රදේශයේ පිහිටි අලෙවිහලකට රුපියල් ලක්ෂ 5 දඩයක් නියම කිරීමටයි ගල්කිස්ස මහේස්ත්‍රාත් අධිකරණය විසින් පියවර ගනු ලැබුවේ .
බම්බලපිටිය ප්‍රදේශයේ පිහිටි ප්‍රධාන පෙළේ බිත්තර බෙදා හරින ව්‍යාපාරයෙකුට රුපියල් ලක්ෂයක දඩයක් ද, නාරාහේන්පිට ආර්ථික මධ්‍යස්ථානයේ බිත්තර තොග සහ සිල්ලර අලෙවිකරණ වෙළඳසැලකට රුපියල් ලක්ෂයක දඩයක් ද කොළඹ මහේස්ත්‍රාත් අධිකරණය විසින් මෙලෙස නියම කළා.
