ජල ගැලීම්වලින් විනාශ වූ කුඹුරු සහ බෝග සඳහා ගොවීන්ට වන්දි ගෙවන ලෙස ජනාධිපතිවරයා උපදෙස් දුන්නද මේවනතුරුත් ගොවීන්ට එය නොලැබී ඇති බව මැදවච්චිය, කැබිතිගොල්ලෑව සහ පදවිය ගොවීන් පවසනවා.
පැවැති අයහපත් කාලගුණික තත්ත්වය හේතුවෙන් එම ප්රදේශවල මේ වනවිට අහස් දියෙන් වගා කරන කුඹුරු, මිරිස් සහ බඩඉරුගු ඇතුලු වගාවන් රැසක් විවිධ රෝග බෝවීම හේතුවෙන් විනාශ වී ඇති බවද ගොවීන් සඳහන් කරනවා.
අනුරාධපුර දිස්ත්රිකයේ පදවිය, කැබිතිගොල්ලෑව සහ මැදවච්චිය යන ප්රාදේශීය ලේකම් බලප්රදේශයන්හි පවුල් 400ට ආසන්න පිරිසක් ජීවත් වනවා.
ගොවිතැන සිය ජීවනෝපාය කරගත් මෙම පිරිස සෑම වර්ෂයක් පාසාම මෙරට ජාතික ආර්ථිකයට විශාල මෙහෙවරක් කරමින් සිටින පිරිසකි.
එය බොහෝ බලධාරින් දැනගෙනත් නොදන්නා සේ සිටීමත් ගොවි ජනතාව ශක්තිමත් කිරීමට මෙරට ප්රධානීන්ගෙන් ලැබෙන උපදෙස් බිම් මට්ටමින් ක්රියාත්මක නොවීමත් ගොවි ජනතාවගේ අවාසනාවක් බවයි ගොවීන් පවසන්නේ.
ඒ අනුව ගොවීන් හට සිදුවන අසාධාරනය පිළිබද අප කළ සොයා බැලීමේදී ගොවීන් මෙලෙස මාධ්ය වෙත අදහස් දක්වා සිටියා.
අපේ කුඹුරු, මිරිස්, බඩඉරුගු වගාවන් වැස්සෙන් පස්සේ විනාශ වෙලා තියෙන්නේ.
විවිධ ලෙඩ රෝග බෝ වෙලා තියෙන්නේ මේ වගා බිම්වල. කහ රෝගය, දිලීර රෝග සෑම බෝගයකටම ඇවිත්.
ඒ පිළිබඳ අපි බලධාරින් දැණුවත් කළා.
කිසිදු බලධාරියෙක් නිසි විසඳුමක් එයට ලබා දුන්නේ නෑ.
මැදවච්චිය, කැබිතිගොල්ලෑව කෘෂාකර්මයට අදාල නිලධාරින් අපි අපේ වගාවන් විනාශ වුණා කියද්දි බලන්න ආවේ නෑ.
පොටෝ ගහලා එවන්න කියලා විතරයි කියන්නේ.
පොටෝ එකෙන් බලලා එයාලා තීන්දු තීරණ ගන්නේ.
මේවෙද්දි මෙම ප්රදේශවල අහස් දියෙන් වගාකළ කුඹුරු, බඩඉරුගු සහ මිරිස් වගාවන් අක්කර දහස් ගණන් විනාශ වෙලා තියෙන්නේ.
බලධාරින් කැරකෙන පුටුවල ඉදගෙන් කියනවා අහස් දියෙන් සිදු කරන කැකුලන් කුඹුරු නැවත වගා කරන්න කියලා.
හැබැයි අපිට ඒක කරන්න බෑ.
අහස් වැස්ස තව මාස තුනක් වහියි කියන ඒක අපිට විස්වාස නෑ.
නැවත වතාවක් අපිට පාඩු ලබන්න බෑ.
මිරිස් වගාවන් කොඩ වෙලා. දිලීර රෝග ඇවිත්. බඩ ඉරුගු වගාවන් කහ වෙලා.
මේවා බලලා නිලධාරින් සාධාරණය සිදු කරනවා වෙනුවට, අඩුම තරමේ ජනාධිපතිතුමා උපදෙස් ලබා දුන්න විදිහට විනාශ වූ කුඹුරු සඳහා හරි වන්දි ගෙව්වානම් අපිට යම්තාක් සාධාරණයක් වෙනවා.
නමුත් ගොවීන් අසරණ කරමින් බලධාරින් විවිධ කතා කිය කිය ඉන්නවා.
මේවගේ වැඩවලින් නැතිවෙන්නේ මෙරට ජාතික ආර්ථිකයට ශක්තියක් වූ ගොවීන්.
ඒ නිසා ජනාධිපතිවරයා වන්දි දෙනවා කිව්වානේ, ඉතින් බලධාරින් ගොවීන් තව තවත් අසරණ නොකර ගොවීන්ගේ වගා පාලු සඳහා ගෙවීම් කරන්න කියන ඉල්ලා සිටිනවා.
