ප්‍රේම සම්බන්ධයක් මුල්කරගනිමින් අනුරාධපුර, ගලෙන්බිදුණුවැව කලාප කාර්යාලයට අයත් පාසල් දෙකක නවය ශ්‍රේණියේ ඉගෙනුම ලබන සිසුන් දෙදෙනෙකු අතර ගැටුමක් හටගෙන තිබෙනවා
ඇතිවු ගැටුම දුරදිග ගොස් එක් සිසුවෙකු අනෙක් සිසුවාට පිහි පහරක් එල්ල කර ඇති බවත් ඒ අනුව තුවාල ලැබූ සිසුවා රෝහල්ගත කර ඇති බවත් පොලිසිය පවසනවා.
දිවුල්වැව, කෝන්වැව හංදිය ප්‍රදේශයේදී ඊයේ(21) සවස 05.00ට පමණ මෙම ගැටුම සිදුව ඇති බවයි වාර්තා වන්නේ.
එහිදී එක් සිසුවෙකු විසින් අනෙක් සිසුවාගේ කොඳු නාරටිය ප්‍රදේශයට මෙම පිහිපහර එල්ලකර ඇත.
පිහි ඇණුම හේතුවෙන් තුවාල ලැබූ 14 හැවිරිදි පාසල් සිසුවා ප්‍රදේශවාසීන් විසින් කහටගස්දිගිලිය රජයේ රෝහල වෙත ඇතුලත් කර තිබෙනවා.
සිදුවීම සිදුවන අවස්ථාව වන විට මෙම ළමුන් දෙදෙනාම පාසල් නිල ඇඳුමින් සිට නොමැති අතර සිදුවීමෙන් පසු පිහි ඇණුම සිදුකළ 14 හැවිරිදි සිසුවා පොලිසිය විසින් අත්අඩංගුවට ගෙන තිබෙනවා.
මෙය දරුවන්ගේ වැරදි නොවන බවත් දරුවන් සෑම විටම අත්හදා බැලීම් සිදු කරන පිරිසක් බවත්, පාසල් දරුවන්ගේ විවිධ ක්‍රියා කලාපයන් පිළිබඳ දැඩි අවධානයකින් දෙමාපියන් සිටිය යුතු බවයි මැදවච්චිය ප්‍රාදේශීය ලේකම් බලප්‍රදේශයේ ළමා හිමිකම් ප්‍රවර්ධන නිලධාරී ජයම්පති විජේසිංහ මහතා කියා සිටියේ.
එසේම පාසල් දරුවන් තම වයසට වඩා වැඩි වයසකින් යුත් යහළුවන් ඇසුරු කිරීම තම වයසට වඩා එහා ගිය සිදුවීම් සිදු කිරීමට ප්‍රධානතම හේතුව බවද ජයම්පති විජේසිංහ මහත වැඩිදුරටත් කියා සිටියා.
