අධ්යයන පොදු සහතික පත්ර උසස් පෙළ විභාගය ආරම්භ වී අදට දින පහක කාලයක් ගත වුවද මේ වන තෙක් දරුවන්ට විභාගයට මුහුණ දීමට සිදුව ඇත්තේ දෛනික විදුලි කප්පාදුවක් සමඟයි.
උසස් පෙළ විභාගය අවසන් වන තෙක් විදුලිය කප්පාදු නොකිරීමට මහජන උපයෝගිතා කොමිසම සහ ශ්රී ලංකා මානව හිමිකම් කොමිසම විසින් පසුගිය දා ප්රකාශයට පත් කරනු ලැබුවා.
නමුත් මේ වන තෙක් රටේ බොහෝ ප්රදේශවල විදුලි කප්පාදුව සිදු වෙමින් පවතින බවයි අප වාර්තාකරුවන් පවසන්නේ.
විභාග ආරම්භ වීමට පෙර සිටම සිසුන් මෙන්ම වෘත්තිය සමිති හා සංවිධාන විසින් දිගින් දිගටම ඉල්ලා සිටියේ උසස් පෙළ සමයේදී විදුලිය කප්පාදු නොකරන ලෙසයි.
කෙසේ වෙතත් අවම වශයෙන් දෛනිකව දහවල් කාලයේදී හෝ රාත්රී කාලයේදී විදුලිය විසන්ධි වීම දැඩි පීඩනයක් බවයි අධ්යයන පොදු සහතික පත්ර උසස් පෙළ විභාගයට මුහුණ දෙන දරුවන් ප්රකාශ කරන්නේ.
ලංකා විදුලිබල මණ්ඩලයෙන් අප කළ විමසුමකදී ඔවුන් පවසන්නේ උසස් පෙළ විභාගය අවසන් වන තෙක් අඛණ්ඩව විදුලිය ලබා දීමට නොහැකි බවයි.
එසේ සිදු කරන්නේ නම් රුපියල් බිලියන 4.1ක් අවශ්ය බවත් එම මුදල ලබා ගැනීම අසීරු වී ඇති බවත් විදුලි බල මණ්ඩලයට වැඩි දුරටත් අවධාරණය කර සිටිනවා.
කෙසේ වෙතත් විදුලිබල මණ්ඩලය නව ගාස්තු අය කිරීමේ ක්රමය ක්රියාත්මක කළ පළමු මාස තුනක කාලයක් තුළ රුපියල් බිලියන 108ක පමණ ආදායමක් ලබා ඇති බව පාර්ලිමේන්තු මන්ත්රී පාඨලී චම්පික රණවක මහතා පවසනවා .
මන්ත්රීවරයා ප්රකාශ කළේ මූල්ය අර්බුදයක් හේතුවෙන් සහ පාඩු ලැබීම හේතුවෙන් අඛණ්ඩ විදුලි සැපයුමක් ලබාදීමට නොහැකි බවට සිදුකරන ප්රකාශ පිළිගත නොහැකි බවයි .
කොළඹ පැවැති සම්මන්ත්රණයට එක්වෙමින් පාර්ලිමේන්තු මන්ත්රී පාඨලී චම්පික රණවක මහතා මෙම අදහස් පළ කළා .
