දකුණු කොරියානු ජනරජයේ තානාපතිනි මියෝන් ලී මහත්මිය හා ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා අතර හමුවක් සිදුව තිබෙනවා.
ඒ පැලවත්ත ජනතා විමුක්ති පෙරමුණ ප්‍රධාන කාර්යාලයේදීයි.
ජනාධිපති අනුර දිසානායක මහතා ප්‍රමුඛ ආණ්ඩුව පත්වීමෙන් පසුව ගෙන යන වැඩපිළිවෙලට කොරියානු ජනරජයේ තානාපතිනිය මෙහිදී සිය ප්‍රශංසාව පළ කර තිබෙනවා.
දකුණු කොරියාව හා ශ්‍රී ලංකාව අතර රාජ්‍යතාන්ත්‍රික සබඳතා 1977 වර්ෂයේ සිට මේ දක්වා අඛණ්ඩව පවත්වා ගෙන යන බවයි ඇය එහිදී සදහන් කළේ.
ශ්‍රී ලංකාවේ කර්මාන්ත හා කෘෂිකර්මාන්ත ක්ෂේත්‍රයේ සංවර්ධනය පිළිබදවද මෙහිදී දෙපාර්ශවයේ අවධානය යොමුව තිබුණා.
ඒ සදහා දකුණු කොරියාවේ අත්දැකීම් සහ තාක්ෂණික සහාය උපරිමයෙන් ලබා දීමටයි තානාපතිවරිය පොරොන්දු වී ඇත්තේ.
මෙරට කර්මාන්ත ක්ෂේත්‍රයේ ආයෝජනය කිරීමේ අවස්ථාවන් සඳහා කොරියානු ව්‍යවසායකයින් දිරිගැන්වීමටත් කටයුතු කරන බව තානාපතිනිය එහිදී වැඩි දුරටත් ප්‍රකාශ කර තිබෙනවා.
ජාතික ජන බලවේගයේ පාලනය යටතේ මෙරට වංචාව දූෂණය නැවැත්වීම වෙනුවෙන් උපරිම ක්‍රියාමාර්ග ගන්නා බවයි ටිල්වින් සිල්වා මහතා එහිදී අවධාරණය කර ඇත්තේ.
මෙතෙක් කල් පැවති දූෂිත දේශපාලන සංස්කෘතිය වත්මන් ආණ්ඩුව යටතේ අවසන් කර ඇති බවට සහතිකයක් ලබා දිය හැකි බවද ටිල්වින් සිල්වා මහතා වැඩි දුරටත් එහිදී සදහන් කළා.
