E-8 වීසා කාණ්ඩය යටතේ දකුණු කොරියාවේ කෙටි කාලීන රැකියා ලබාදෙන බව පවසා මුදල් වංචාකිරීම සම්බන්ධයෙන් ඊයේ දින (2024.11.26) අත්අඩංගුවට ගත් සැකකරුවන් තිදෙනා අද දින කඩුවෙල මහේස්ත්‍රාත් අධිකරණයට ඉදිරිපත් කිරීමට නියමිත බව ශ්‍රි ලංකා විදේශ සේවා නියුක්ති කාර්යාංශය සඳහන් කරයි.
දකුණු කොරියාවේ සෘතුමය රැකියා ලබාදෙන බව පවසා රුපියල් ලක්ෂ 10 ක් හා ලක්ෂ දෙක හමාර බැගින් මුදල් ලබාගෙන පොරොන්දු වූ පරිදි රැකියාව ලබානොදුන් බවට කාර්යාංශයේ විශේෂ විමර්ශන අංශයට ලද පැමිණිලි දෙකක් අනුව, මෙම විමර්ශනය ක්‍රියාත්මක කරන ලදී.
ඒ අනුව මෙම ජාවාරමට සම්බන්ධ වූ කඩවත හා ගලගෙදර ප්‍රදේශවල පදිංචි පුද්ගලයින් දෙදෙනෙකු ඊයේ දින බත්තරමුල්ල නගරයේදී අත්අඩංගුවට ගත් අතර, ඔවුන්ගෙන් ලද තොරතුරු අනුව ඊට සහාය වුණු කාන්තාවක්ද ඊයේ දින පොල්ගස්ඕවිට ප්‍රදේශයේදී අත්අඩංගුවට ගන්නා ලදී.
අත්අඩංගුවට ගත් පුද්ගලයින් සතුව තිබී, විදේශ ගමන් බලපත්‍රයක්, ව්‍යාජ රැකියා ගිවිසුම්, පොරොන්දු පත්‍ර ඇතුළු ලේඛන රැසක්ද නිළධාරීන් භාරයට ගෙන තිබේ. අත්අඩංගුවට ගත් සැකකරුවන්ගෙන් ප්‍රකාශ සටහන් කරගැනීමෙන් අනතුරුව ඊයේ රාත්‍රියේ තලංගම පොලිස් ස්ථානයේ රඳවා සිටි අතර, අද දින (11/27) කඩුවෙල මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
