Author: Anura Premakumara

අයහපත් කාලගුණ තත්ත්වය හමුවේ නිවිතිගල අධ්‍යාපන කලාපයේ, කොට්ඨාස කිහිපයක පාසල් අද දිනය තුළ වසා තැබීමට තීරණය තිබෙනවා. ඒ අනුව නිවිතිගල අධ්‍යාපන කලාපයේ ඇලපාත සහ අයගම කොට්ඨාසවලට අයත් සියලුම පාසල් අද දිනය තුළ ද වසා තැබෙනු ඇති. රජයේ පාසල්වලට ලබා දෙන විශේෂ නිවාඩුවක් ලෙස සලකා අදාළ පාසල්වලට මෙලෙස නිවාඩු ලබා දී තිබෙනවා. මේ අතර පවතින ආපදා තත්ත්වය හේතුවෙන් බස්නාහිර පළාතේ පාසල් 36ක් අද දිනය තුළ වසා තැබෙන බව පළාත් අධ්‍යාපන දෙපාර්තමේන්තුව නිවේදනය කළා. ඒ අනුව ශ්‍රී ජයවර්ධනපුර , හෝමාගම, හොරණ සහ මීගමුව අධ්‍යාපන කලාපවල පාසල් 36ක් මෙලෙස වසා තැබෙනවා.

දුම්රිය එන්ජින් රියදුරන්ගෙන් කොටසක් ඊයේ මධ්‍යම රාත්‍රියේ සිට සේවයෙන් ඉවත්ව වෘත්තීය ක්‍රියාමාර්ගයකට අවතීර්ණ වූ බව දුම්රිය ලොකොමොටිව් ඔපරේටිං ඉංජිනේරු සංගමය පවසනවා. දුම්රිය එන්ජින් රියදුරන්ගේ දෙවන පෙළ උසස්වීම් ලබා දීම ප්‍රමාධ කිරීම සහ වැටුප් කේතයක් නොමැතිව බඳව බඳවා ගැනීම ප්‍රමාධ කිරීමට එරෙහිව මෙලෙස දුම්රිය වර්ජනයක නිරතවන බවයි එම සංගමය සඳහන් කළේ. මෙම ගැටලුකාරී තත්ත්වය විසඳීම සඳහා මීට මාස 10ක සිට වැඩපිළිවෙලක් සකස් කළද එය නිසි පරිදි ක්‍රියාත්මක නොකිරීම ගැටලු වැඩි වීමට හේතු වී තිබෙනවා.

පල්ලේවෙල සහ ගනේගොඩ දුම්රිය ස්ථාන අතර සහ වේයන්ගොඩ සහ ගම්පහ දුම්රිය ස්ථාන අතර සංඥා පද්ධතියේ දෝෂයක් හේතුවෙන් ප්‍රධාන මාර්ගයේ දුම්රිය ප්‍රමාදයක් සිදුව තිබෙනවා. මේ අතර, අයහපත් කාලගුණික තත්ත්වය සමග ප්‍රධාන මාර්ගය, මුහුදුබඩ මාර්ගය සහ පුත්තලම මාර්ගය ස්ථාන කිහිපයක් ජලයෙන් යටවීම නිසා සංඥා පද්ධතියේ දෝෂ ඇතිවීම හේතුවෙන් දුම්රිය ප්‍රමාදයන් කිහිපයක් දක්නට ලැබෙන බවයි දුම්රිය දෙපාර්තමේන්තුවේ නියෝජ්‍ය සාමාන්‍යාධිකාරී එන්. ජේ. ඉඳිපොලගේ මහතා සඳහන් කළේ. එමෙන්ම වග සහ කොස්ගම දුම්රිය ස්ථාන අතර පාලමක් ජලයෙන් ගසාගෙන යාම හේතුවෙන් මේ වනවිට කැලණිවැලි මාර්ගයේ දුම්රිය ධාවනය වග දුම්රිය ස්ථානය දක්වා සීමා කර තිබෙනවා.

මෙම වසරේ ජනවාරි 01 වැනිදා සිට මැයි 31 වැනිදා දක්වා ගත වූ මාස 05ක කාලය තුළ ඩෙංගු රෝගීන් 24,920ක් වාර්තා වී ඇති බව සෞඛ්‍ය අංශ පවසනවා. පසුගිය මැයි මාසයේදී ඩෙංගු රෝගීන් 2,647 දෙනෙකු වාර්තා වී ඇති බවයි සෞඛ්‍ය අංශ පෙන්වා දෙන්නේ. මේ අතර ප්‍රකාශයට පත් කර තිබූ මදුරු මර්දන සතිය තවදුරටත් දීර්ඝ කරණ බවද සෞඛ්‍ය අංශ පවසනවා.

දිවයිනේ නිරිතදිග කොටසට නොනවත්වා ඇදහැලෙන ධාරාණිපාත වර්ෂාවත් සමඟ සිදුවූ ආපදා හේතුවෙන් ගතවූ පැය 24 දී පමණක් කුඩා දරුවන් ඇතුළු පුද්ගලයින් 8 දෙනෙකුට දිවි අහිමිව ඇති බව ආපදා කළමනාකරණ මධ්‍යස්ථානය පවසනවා. නිරිතදිග මෝසම් තත්ත්වය ස්ථාපිත වීමෙන් මේ වනවිට බොහෝ ප්‍රදේශවලට ඉතා තද වැසි සමඟ දැඩි බලපෑම් එල්ල වී තිබෙනවා. මේ අතර කාලගුණවිද්‍යා දෙපාර්තමේන්තුව විසින් තද වැසි පිළිබඳව රතු අනතුරු ඇඟවීමේ නිවේදනයක් නිකුත් කර තිබෙනවා . මේ අනුව ගෙවී ගිය පැය 24ක කාලය තුළ වැඩිම වර්ෂාපතනය වාර්තා වී ඇත්තේ, ඇහැළියගොඩ ප්‍රදේශයෙන් බව කාලගුණවිද්‍යා දෙපාර්තමේන්තුව නිවේදනය කරනවා . එහිදී ඇහැළියගොඩ ප්‍රදේශට ඇදහැලී ඇති වර්ෂාපතනය මිලිමීටර් 427.5ක් බවද සදහන් . තවද හල්වතුර වත්ත,…

වර්ජනයේ යෙදී සිටින විශ්වවිද්‍යාල අනධ්‍යයන කාර්ය මණ්ඩල වෘත්තීය සමිති සමඟ අද දින සාකච්ඡා කරන බව රාජ්‍ය අමාත්‍ය ආචාර්ය සුරේන් රාඝවන් මහතා පවසනවා. ඒ අනුව මේ සම්බන්ධයෙන් හොඳම විසඳුම ලබා දීමට ආණ්ඩුව බලාපොරොත්තු වන බවයි ඔහු සඳහන් කළේ. ඉල්ලීම් කිහිපයක් මුල් කර ගනිමින් විශ්වවිද්‍යාල අනධ්‍යයන කාර්ය මණ්ඩල වෘත්තීය සමිති වර්ජනයේ යෙදී සිටිනවා

අයහපත් කාලගුණික තත්ත්වයෙන් පීඩාවට පත් ජනතාවට සහන සැලසීම සඳහා පොලීසිය විශේෂ ආපදා සහන ඒකකයක් ස්ථාපිත කර තිබෙනවා. ඒ අනුව පැය 24ම ක්‍රියාත්මක වන පරිදි විශේෂ මෙහෙයුම් මැදිරියක් ස්ථාපිත කිරීමට කටයුතු කළ බවයි පොලීසිය සඳහන් කළේ. මෙහිදී 011- 242 1820 ක්ෂණික ඇමතුම් අංකයට මෙන්ම 011 -243 9212 , 011- 201 3036 සහ 011- 201 3039 යන දුරකතන අංක ඇමතීමෙන් ආපදා තත්ත්වයන් පිළිබඳ දැනුම් දිය හැකියි.

2024 විස්සයි විස්ස ලෝක කුසලාන ක්‍රිකට් තරඟාවලියේ ශ්‍රී ලංකාව මුහුණ දෙන පළමු තරඟය අද පැවැත්වෙනවා. එහිදී ශ්‍රී ලංකා කණ්ඩායම දකුණු අප්‍රිකා කණ්ඩායමට එරෙහිව තරඟවැදීමට නියමිතයි. අමෙරිකාවේ නිව්යෝක් හීදී පැවැත්වෙන මෙම තරඟය මෙරට වේලාවෙන් පස්වරු 08ට ආරම්භ කිරීමට කටයුතු යොදා තිබෙනවා.

මෙක්සිකෝවේ ඓතිහාසික ජනාධිපතිවරණ මැතිවරණයේ ඡන්දය ප්‍රකාශ කිරීම අවසන්ව තිබෙනවා. මෙහිදී ජනාධිපතිවරණය සඳහා ඉතිහාසයේ පළමුවරට කාන්තාවන් දෙදෙනෙක් ඉදිරිපත්ව ඇති බවයි විදෙස් මාධ්‍ය වාර්තා කර ඇත්තේ. ඒ අනුව වාමාංශිකක මොරීනා පක්ෂයෙන් ක්ලූඩියා ෂයින්බාම් සහ විරුද්ධ පඛ්ෂ සන්ධානය නියෝජනය කරමින් සොකයිටල් ගෝවස් ජනාධිපති ධුර අපේක්ෂිකාවන් වනවා. මීට අමතරව තුන්වන අපේක්ෂකයෙකු ලෙස මධ්‍ය වාම පුරවැසි ව්‍යාපාරය නියෝජනය කරන ජෝර්ජ් අල්වාරෙස් ඉදිරිපත්ව තිබෙනවා. මෙහිදී මෙක්සිකානු ඉතිහාසයේ පළමු ජනාධිපතිවරිය පත්වීමට වැඩි ඉඩකඩක් පවතින බවයි විදෙස් මාධ්‍ය වැඩිදුරටත් සඳහන් කර ඇත්තේ.

මෙරට ආර්ථික අර්බුදය විසඳීමට ආර්ථික පරිවර්තන පනත් කෙටුම්පතට සහාය දෙන ලෙස සියලු පක්ෂ වලින් ඉල්ලීමක් කරන බව ජනාධිපති රනිල් වික්‍රමසිංහ මහතා පවසනවා. ජනාධිපතිවරයා මේ බව සඳහන් කළේ එක්සත් ජාතික පක්ෂ මූලස්ථානයේ ඊයේ පැවති උත්සවයකට එක්වෙමින්.