2030 වසර වනවිට ශ්රී ලංකාවේ සමස්ත අපනයන ආදායම අමෙරිකානු ඩොලර් බිලියන 36 ඉක්මවා යාම සිය අරමුණ බව වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්ය වසන්ත සමරසිංහ මහතා පවසනවා. අමාත්යවරයා මේ බව සඳහන් කළේ, විදේශයන්හි පිහිටි ශ්රී ලංකා දූත මණ්ඩලවල සේවය කරන වාණිජ දෙපාර්තමේන්තුවේ වාණිජ නිලධාරීන් හමුවූ අවස්ථාවේදීයි. මෙරට වෙළෙඳ, ආයෝජන, සංචාරක සහ නිපුණ රැකියා අවස්ථා තවදුරටත් ශක්තිමත් ලෙස ප්රවර්ධනය සඳහා දැනට ක්රියාත්මක වැඩසටහන් සමාලෝචනය සහ උපායමාර්ගික ප්රමුඛතා පිළිබඳව සාකච්ඡා කිරීම මෙම රැස්වීමේ ප්රධාන අරමුණ වුනා. වාණිජමය වශයෙන් වැදගත් වෙළඳපොළවල් 23ක ස්ථාපිත ශ්රී ලංකා විදේශ දූත මණ්ඩලවල සේවය කරන වාණිජ නිලධාරීන් හා අමාත්යවරයා අතරයි මෙම හමුව පැවැත්වුනේ . ජාත්යන්තර වෙළඳපොළ තුළ ශ්රී ලංකාවේ වෙළඳ සහ පුළුල් ආර්ථික අවශ්යතා ඉදිරියට ගෙන යාම සඳහා ඔවුන්ගේ කාර්යභාරය අතිශය වැදගත් බව මෙහිදී අමාත්යවරයා අවධාරණය කළා. ජාතික අපනයන සංවර්ධන සැලැස්මේ ඉලක්කයන් සමඟ තම කටයුතු අනුගත කරන ලෙස ද අමාත්ය වසන්ත සමරසිංහ මහතා නිලධාරීන්ගෙන් වැඩිදුරටත් ඉල්ලා සිටියා.
