යෝජිත විදුලි ගාස්තු සංශෝධනය සම්බන්ධයෙන් මහජන උපයෝගිතා කොමිෂන් සභාව මහජන අදහස් විමසීමට තීරණය කර තිබෙනවා.
එම කොමිසම සඳහන් කරන්නේ, ලංකා විදුලිබල මණ්ඩලය ඉදිරිපත් කර ඇති යෝජනාව අනුව 66.2% ක ආදායම් ඉහළ දැමීමක් ඉලක්ක කෙරෙන බවයි.
ගාස්තු සංශෝධනය සම්බන්ධයෙන් සිය අදහස් හා යෝජනා ඉදිරිපත් කරන ලෙස ශ්‍රී ලංකා මහජන උපයෝගිතා කොමිෂන් සභාව මහජනතාව ඇතුළු සියලු පාර්ශ්වයන්ගෙන් ඉල්ලා සිටිනවා.
ඒ අනුව ලිඛිත අදහස් තැපෑලෙන්, ඊමේල් හෝ ෆැක්ස් මඟින් ඉදිරිපත් කල හැකියි.
ඒ අනුව මහජන අදහස් සභාපති, ශ්‍රී ලංකා මහජන උපයෝගීතා කොමිෂන් සභාව, 6 වන මහල, ලංකා වෙළඳ කුළුණ, අංක 28, සාන්ත මයිකල් පාර, කොළඹ 03 ලිපිනයට යොමු කිරීමේ හැකියාව පවතිනවා .
මේ අතර කැබිනට් මණ්ඩලයේ තීරණයට අනුව අද සිට විදුලිය ගාස්තු ඉහල දැමීමට තීරණය කර ඇතැයි ලංකා විදුලිබල මණ්ඩලය පසුගියදා ප්‍රකාශ කළා.
එහි සාමාන්‍යාධිකාරී ඉංජිනේරු රොහාන් සෙනෙවිරත්න මහතා පැවසුවේ, මාසයකින් මෙම වැඩි කළ ගාස්තු අයකිරීම පිළිබඳ දත්ත මහජන උපයෝගීතා කොමිසමට ලබාදීමට පියවර ගන්නා බවයි.
