ශ්‍රි ලංකා විදේශ සේවා නියුක්ති කාර්යාංශය මගින් වතුකරයේ ජනතාව දැනුවත් කිරීම සඳහා හෙට දින සිට (2024.06.29) විශේෂ දැනුවත් කිරීමේ වැඩසටහන් මාලාවක් සංවිධානය කර තිබේ.
ඌව පළාත කේන්ද්‍ර කරගනිමින් මෙම වැඩසටහන ආරම්භ කර ඇති අතර, එහිදී දමිළ ජනතාව වැඩිවශයෙන් ජීවත්වන ප්‍රදේශයන් වන පස්සර, ලුණුගල, හාලිඇල, බදුල්ල, ඌව පරණගම, වැලිමඩ, හපුතලේ, බණ්ඩාරවෙල, හල්දුම්මුල්ල, මහියංගනය හා ඇල්ල යන ප්‍රදේශවල මෙම දැනුවත් කිරීමේ වැඩසටහන ක්‍රියාත්මක කරනු ලබයි.
කාර්යාංශයේ ඌව පළාත් කාර්යාලය මගින් බාහිර සම්පත්දායකයින්ගේ සහභාගිත්වයෙන් මෙම වැඩසටහන් මාලාව සංවිධානය කරනු ලබන අතර, මෙමගින් විදේශ රැකියා, විගමණික ශ්‍රමික සුභසාධන කටයුතු හා වංචනිකයින්ට හසුනොවී නිවැරදි මාර්ගයෙන් විදේශ ගතවීම ඇතුළු කරුණු සම්බන්ධයෙන් වතුකරයේ ජනතාව දැනුවත් කිරීමට බලාපොරොත්තු වේ.
කම්කරු හා විදේශ රැකියා අමාත්‍ය මනුෂ නානායක්කාර මහතාගේ උපදෙස් පරිදි විදේශ රැකියා ක්ෂේත්‍රය සම්බන්ධයෙන් බිම් මට්ටමෙන් මහජනතාව දැනුවත් කිරීම සඳහා දීප ව්‍යාප්තව වැඩසටහන් රැසක් කාර්යාංශය විසින් සංවිධානය කර තිබේ.
