පසුගිය දිනවල මෙරටට බලපෑ හදිසි ආපදා තත්ත්වය හමුවේ නුවරඑළිය දිස්ත්රික් මහ රෝහලට ඇති වී තිබෙන හානි පිළිබඳවත් කාර්ය මණ්ඩලයට ඇතිවී තිබෙන දුෂ්කරතා පිළිබඳවත් සොයා බැලීමට මෙන්ම එම දුෂ්කතරාවලට කඩිනමින් විසඳුම් ලබාදීමේ අරමුණින් සෞඛ්ය හා ජනමාධ්ය අමාත්යංශයේ ලේකම් විශේෂඥ වෛද්ය අනිල් ජාසිංහ මහතා ඊයේ(09) නුවරඑළිය දිස්ත්රික් මහ රෝහලේ නිරීක්ෂණයක නිතරව තිබෙනවා.
එහිදී ආපදා තත්ත්වය හේතුවෙන් නුවරඑළිය නව රෝහලේ ප්රධාන ගොඩනැගිලි සංකීර්ණයට සිදුව ඇති යැයි සැලකෙන හානි සහ අවදානම් තත්ත්වය පිළිබඳත් අවදානමට ලක්වූ පැරණි රෝහලේ මාතෘ හා ළමා ඒකකය, පිලිකා සහ අනෙකුත් සායන ඒකක පිළිබඳත්, ජල ගැලීම්, නායයාම් සහ පස් කඩා වැටීම් හේතුවෙන් මහල් හතරකින් යුත් ගොඩනැගිලි සංකීර්ණ දෙක්ක ඇතුළුව විශේෂ වෛද්ය, වෛද්ය, හෙද නිල නිවාස අටක් පත්ව ඇති අවදානම් තත්ත්වයන් මෙන්ම සම්පූර්ණයෙන් විනාශයට පත්ව ඇති නේවාසිකාගාර පිළිබඳත් ලේකම්වරයාගේ අවධානය යොමුව තිබෙනවා.
එම සියලු ස්ථාන වොත ගොස් නිරීක්ෂණය කළ ලේකම්වරයා සියලු අභියෝගාත්මක තත්ත්වයන් කළමනාකරණය කර ගනිමින් ඉදිරි කටයුතු සැලසුම් සහගතව සිදු කිරීමට අවශ්ය උපදෙස් රෝහල් පාලන අධිකාරිය වෙත ලබාදුන් බවයි සෞඛ්ය අමාත්යංශය පවසන්නේ.
මෙම නිරීක්ෂණ අවස්ථාවට පේරාදෙණිය විශ්වවිද්යාලයේ ඉංජිනේරු පීඨයේ ව්යුහාත්මක ඉංජිනේරුවන් ද එක්ව තිබෙනවා.
නිරීක්ෂණයෙන් අනතුරුව රෝහල් පාලන අධිකාරිය, පේරාදෙණිය විශ්වවිද්යාලයේ ඉංජිනේරු පීඨයේ ව්යුහාත්මක ඉංජිනේරුවන් සහ විශේෂඥ වෛද්ය, වෛද්ය, හෙද කාර්ය මණ්ඩල සමග විශේෂ සාකච්ඡාවක්ද රෝහල් ශ්රවණාගාරයේදී පවත්වා තිබෙනවා.
මෙම හදිසි ආපදා තත්ත්වයට ප්රධාන වශයෙන් රෝහල් තුනක් ගොදුරු වූ බවත් ජල සැපයුම ප්රවාහනය සහ දුරකථන පහසුකම් දින හතරක් පමණ කාලයක් ඇණහිට තිබූ අවස්ථාවක නුවරඑළිය රෝහලේ රෝගී ජීවිත ආරක්ෂා කර ගනිමින් ව්යසනය හමුවේ විකල්ප ක්රමවේද අනුගමනය කරමින් අඛණ්ඩව රෝගී ප්රතිකාර සේවා පවත්වාගෙන යාමට අධ්යක්ෂවරයා ඇතුළු රෝහල් කාර්ය මණ්ඩලය කටයුතු කිරීම සම්බන්ධයෙන් සෞඛ්ය ලේකම්වරයා රෝහල් අධ්යක්ෂවරයා ඇතුළු සමස්ත කාර්ය මණ්ඩලයට මෙහිදී සිය ස්තුතියද පුද කර තිබෙනවා.
ආපදා තත්ත්වය හමුවෙි නේවාසිකාගාරවලට හානි සිදුවීම හේතුවෙන් නේවාසිකව සිටි රෝහල් කාර්ය මණ්ඩල මුහුණදෙන නේවාසික ගැටළුවට ඉදිරියේ දී කඩිනම් විකල්ප විසඳුම් ලබාදීමට පියවර ගන්නා බවත්, නේවාසිකව සිටි කාර්ය මණ්ඩල පිරිසක් රෝහල තුළ තවමත් රැදී සිටිමින් රාජකාරී සිදූ කරන බව ද අවධාරණය කර තිබෙනවා.
මෙම අභියෝගාත්මක කාලය තුළ රෝහලට සිදුව ඇති හානි ප්රතිස්ථාපනය කරන ආකාරය පිළිබඳත්, සෞඛ්ය අමාත්යංශය ඒ සඳහා ගනු ලබන තීන්දු තීරණ පිළිබඳවත් ඉදිරි කාලවකවානු තුළ මෙවැනි ව්යසනවලට මුහුණදීමට රෝහල ශක්තිමත් කිරීම පිළිබඳවත් වැඩි අවධානයක් යොමු කළ බව ද ලේකම්වරයා එහිදි පවසා තිබෙනවා.
රෝහල සඳහා අවශ්ය හදිසි මුල්ය අවශ්යතා සපුරාලීමට සෞඛ්ය අමාත්යංශය ප්රතිපාදන ලබාදීමට කටයුතු කරන බව ද ලෝක සෞඛ්ය සංවිධානය රුපියල් මිලියන 53 ක් මුල්යාධාර ලබා දී ඇති බව ද ලේකම්වරයා මෙහිදී වැඩිදුරටත් කියා සිටියා.
රෝහලේ විශේෂඥ වෛද්ය, වෛද්ය සහ හෙද නිලනිවාස තුළ නේවාසිකව සිටි කාර්ය මණ්ඩල එම නේවාසිකාගාර වලින් ඉවත් කිරීමට මේ වන විට පියවර ගෙන ඇති අතර, පේරාදෙණිය විශ්ව විද්යාලයේ ඉංජිනේරු පිඨයේ සහ සෞඛ්ය අමාත්යාංශයේ ඉංජිනේරු අංශයේ නිලධාරීන් ආපදාවෙන් පසු රෝහලේ වත්මන් තත්ත්වය පරික්ෂාවට ද ලක් කරමින් තිබෙනවා.
මෙම අවස්ථාවට සෞඛ්ය හා ජනමාධ්ය අමාත්යංශයේ අතිරේක ලේකම් (සැළසුම්) එස්. ශ්රීධරන්, නුවරඑළිය දිස්ත්රික් මහ රෝහලේ අධ්යක්ෂ වෛද්ය නිහාල් වීරසුරිය, පේරාදෙණිය විශ්ව විද්යාලයේ ඉංජිනේරු පිඨයේ ව්යූහාත්මක ඉංජිනේරු සුරංග කරුණානායක ඇතුළු නිලධාරීන්, විශේෂඥ, වෛද්ය, වෛද්ය, හෙද ඇතුළු කාර්ය මණ්ඩල එක්ව තිබෙනවා.
