රුමේනියාවේ විදේශ රැකියා ලබාදෙන බව පවසා දිවයිනේ විවිධ පුද්ගලයින්ගෙන් රුපියල් මිලියන 900කට අධික මුදලක් හෙවත් රුපියල් කෝටි 90 කට අධික මුදලක් වංචා කළ බවට සැකකරන රේන්බෝ මෑන් පවර් ආයතනයේ හිමිකරු යළිත් වරක් ජනවාරි 30 දින දක්වා රක්ෂිත බන්ධනාගාර ගත කිරීමට නුගේගොඩ මහේස්ත්‍රාත්වරයා විසින් නියෝග කර තිබෙනවා.
ඒ ඔහු නුගේගොඩ මහේස්ත්‍රාත් අධිකරණයට ජනවාරි 20 වන දින ඉදිරිපත් කළ අවස්ථාවේදීයි.
මෙම සැකකරු හා ඔහුගේ බිරිඳ රේන්බෝ මෑන් පවර් නමින් විදේශ රැකියා ආයතනයක් පවත්වාගෙන යමින් රුමේනියාවේ රැකියා ලබාදෙන බව පවසා, දැවැන්ත මූල්‍ය වංචාවක් සිදුකර ඇති බවට මූලික පරීක්ෂණවලදී හෙළි වූ බව ශ්‍රී ලංකා විදේශ සේවා නියුක්ති කාර්යාංශය පවසනවා.
රුමේනියාවේ රැකියා ලබාදෙන බව පවසා මුදල් වංචා කළ බවට මෙම සැකකාර විදේශ රැකියා හිමිකරුට එරෙහිව පැමිණිලි 470 ක් පමණ ශ්‍රී ලංකා විදේශ සේවා නියුක්ති කාර්යාංශයට ලැබි තිබෙනවා.
පසුව මෙම පැමිණිලි සම්බන්ධව ඉදිරි විමර්ශනය සඳහා අපරාධ පරීක්ෂණ දෙපාර්තමේන්තුවට කාර්යාංශය විසින් එම පැමිණිලි භාරදී තිබුණා.
මෙයට අමතරව තවත් පැමිණිලි 400ට අධික ප්‍රමාණයක් අපරාධ පරීක්ෂණ දෙපාර්තමේන්තුවටද ලැබී ඇති බවයි විදේශ සේවා නියුක්ති කාර්යාංශය පවසන්නේ.
මෙම ඒජන්සියේ හිමිකරු පසුගිය වසරේ ඔක්තෝම්බර් 30 දින අත්අඩංගුවට පත්වීමෙන් අනතුරුව රක්ෂිත බන්ධනාගාර ගත කරනු ලැබුවා.
එදින සිට රක්ෂිත බන්ධනාගාර ගත කර සිටි ඔහු, නඩුව ජනවාරි 20 වන දින යළි කැඳවූ අවස්ථාවේ මෙම නියෝගය නිකුත් කර තිබෙනවා.
මෙම වංචාකරුවන්ට එරෙහිව නීතිය උපරිමයෙන් ක්‍රියාත්මක කිරීමටත්, වින්දිතයින්ට සාධාරණය ඉටුකිරීමටත් කාර්යාංශය හැකි සියළුම පියවර මේවන විටත් ගෙන ඇති බව කාර්යාංශයේ සභාපති කෝශල වික්‍රමසිංහ මහතා පවසනවා.
