මත්ද්රව්ය ජාවාරම්කරුවෙකු විසින් නීති විරෝධී ලෙස උපයා ගන්නා ලද මුදලින් මිලදී ගන්නා ලද දේපළ සහ වත්කම් නීති විරෝධී වත්කම් විමර්ශන කොට්ඨාසය විසින් ක්රියා විරහිත කිරීමක් සිදු කර ඇති බව පොලිසිය පවසනවා.
පොලිස් මත්ද්රව්ය කාර්යාංශය විසින් කරන ලද පැමිණිල්ලකට අනුව අරඹේකෙම, හම්බෙගමුව, තණමල්විල ප්රදේශයේ පදිංචි වයස අවුරුදු 52ක් පමණ වන මත්ද්රව්ය ජාවාරම්කරුවෙකු විසින් මත්ද්රව්ය ජාවාරමෙන් උපයා ගන්නා ලද මුදලින් මිලදී ගන්නා ලද දේපළ හා වත්කම් සම්බන්ධයෙන් මුදල් විශුද්ධිකරණය වැළැක්වීමේ පනතෙහි ප්රතිපාදන ප්රකාරව එම කොට්ඨාසය විසින් විමර්ශන ආරම්භ කෙරුණු බවයි පොලිසිය පවසන්නේ.
ඒ අනුව මෙම සැකකාර පුද්ගලයා සම්බන්ධයෙන් පෙර වැරදි වාර්තා කැඳවා ඇති අතර මත්ද්රව්ය සන්තකයේ තබාගැනීම හා මත්ද්රව්ය ජාවාරම් කිරීම සම්බන්ධයෙන් දිවයිනේ ප්රදේශ කිහිපයක පොලිස් ස්ථාන විසින් සැකකරු අත්අඩංගුවට ගෙන අධිකරණයන් වෙත ඉදිරිපත් කර ඇති බව එහිදි අනාවරණ වී තිබෙනවා.
සැකකරු සම්බන්ධයෙන් සිදු කරන ලද වැඩිදුර විමර්ශනයේදී ඔහු විසින් නීති විරෝධී අන්දමින් උපයා ගන්නා ලද මුදලින් සැකකරුගේ බිරිඳගේ නමින් මිලදී ගෙන ඇති පහත සඳහන් දේපල හා වත්කම් මුදල් විශුද්ධිකරණය වැළැක්වීමේ පනත ප්රකාරව ඇඹිලිප්ිය සහ තංගල්ල මහාධිකරණ මගින් ක්රියාවිරහිත කිරීමේ නියෝගය ඊයේ(11) වන දින සිට දින 7ක කාලයක් සඳහා දීර්ඝ කර තිනෙවා.
- රුපියල් මිලියන 30ක වටිනාකමකින් යුතු ඇඹිලිපිටිය ප්රදේශයේ පිහිටි බෙහෙත් අලෙවි සැලක්.
- රුපියල් මිලියන 70ක වටිනාකමකින් යුතු ඇඹිලිපිටිය ප්රදේශයේ පිහිටි පර්චස් 39.5ක ඉඩමක් හා හෝටලය
- රුපියල් මිලියන 15ක වටිනාකමින් යුතු මිද්දෙණිය ප්රදේශයේ පිහිටි ඩම හා කඩ කාමර දෙකකින් යුතු ගොඩනැගිල්ල
- රුපියල් මිලියන 7.5ක වටිනාකමකින් යුතු මිද්දෙණිය ප්රදේශයේ පිහිටි ඉඩම හා කඩ කාමරයක් සහිත ගොඩනැගිල්ල
- රුපියල් මිලියන 7.5ක වටිනාකමකින් යුතු මිද්දෙණිය ප්රදේශයේ පිහිටි ඉඩම හා කඩ කාමරයක් සහිත ගොඩනැගිල්ල
- රුපියල් මිලියන 35ක වටිනාකමකින් යුතු කීරවැල්කටුව ඇඹිලිපිටිය ප්රදේශයේ පිහිටි පර්චස් 25ක ඉඩම හා දෙමහල් නිවස
- රුපියල් මිලියන 15ක වටිනාකමකින් යුතු පනාමුර පාර මිද්දෙණිය ප්රදේශයේ පිහිටි වෙළෙඳසැල පිහිටි ඉඩම හා දෙමහල් ගොඩනැගිල්ල එලෙස ක්රියාවිරහිත කරනලද දේපල වනවා.
මෙවැනි ආකාරයේ නීති විරෝධී ලෙස උපයාගන්නා ලද දේපළ හා වත්කම් රජය සතු කර ගැනීමට අවශ්ය නීතිමය කටයුතු සිදු කරමින් පවතින අතර මෙවැනි ආකාරයේ අනීතික ලෙස උපයා ගන්නා සියලු වත්කම් හා දේපළ ක්රියා විරහිත කිරීමට පොලිස්පතිවරයාගේ උපදෙස් සහ සෘජු අධීක්ෂණය යටතේ නීති විරෝධී වත්කම් විමර්ශන කොට්ඨාසය විසින් විමර්ශන සිදු කරනු ලබන බවයි පොලිසිය පවසන්නේ.
