ඩුබායිහිදී අත්අඩංගුවට ගත් සංවිධානාත්මක අපරාධ කල්ලි සාමාජිකයෙකු වන ලලිත් කන්නන්ගර නොහොත් ‘බස් ලලිත්‘ ලබන සතියේදී මෙරටට රැගෙන ඒමට නියමිත තිබෙනවා. ඒ අනුව ලබන සඳුදා රාත්‍රියේදී ඔහු මෙරටට රැගෙන එනු ඇති බවටයි තොරතුරු වාර්තා වන්නේ. බස් ලලිත් ඩුබායිහිදී අත්අඩංගුවට ගනු ලැබුවේ, පසුගිය වසරේ ඔක්තෝබර් මාසයේදීයි. රවිඳු සංඛ ද සිල්වා හෙවත් ”බූරුමූණා” නැමැත්තා ලවා 2022 වසරේ හංවැල්ලේදී මුස්ලිම් ව්‍යාපාරිකයෙකුත් , 2023 වසරේ සැප්තැම්බර් මස 30වනදා හංවැල්ල නෙළුවත්තුඩුව ප්‍රදේශයේදී තවත් ව්‍යාපාරිකයෙකුත් ඝාතනය කිරීම සම්බන්ධයෙන් මොහුට චෝදනා එල්ල වී තිබෙනවා.
එමෙන්ම 2023 වසරේදී මන්න රොෂාන් සහ ඔහුගේ මිතුරෙකු ඝාතනය කිරීම, 2024 වසරේදී හංවැල්ල ප්‍රදේශයේදී වජිර නිශාන්ත නැමැත්තා සහ මීට පෙර ඝාතනය කළ මන්න රොෂාන්ගේ සොහොයුරෙකු ඝාතනය කිරීම, 2025 වසරේ අගෝස්තු 12 වැනිදා හෝමාගම ප්‍රාදේශීය සභාවේ හිටපු මන්ත්‍රී ශාන්ත මුදුන්කොටුව හෙවත් බනා මන්ත්‍රී නැමැත්තා වෙඩි තබා ඝාතනය කිරීමද මොහු මෙහෙයවා ඇති බවයි පොලීසිය පැවසුවේ. එමෙන්ම 2025 වසරේ ජූලි 06 වැනිදා කොටහැර පොඩ්ඩා නැමැත්තා සහ දෙමටගොඩ රුවන් නැමැත්තා කොළඹ රාත්‍රී සමාජ ශාලාවකදී ඝාතනය කිරීමට උත්සාහ කිරීම සම්බන්ධයෙන්ද ”බස් ලලිත්” නැමැත්තාට චෝදනා එල්ල වී තිබෙනවා. මේ අතර ඩුබායිහි සැඟව සිටි අපරාධකරුවන් වන කොණ්ඩ රංජි, ඇල්ටෝ ධර්මේ, බස් ලලිත් හා වනාතේ චතූ අත්අඩංගුවට ගෙන ඇති බව එරට ආරක්ෂක අංශ නිලවශයෙන් මෙරට ආරක්ෂක අංශවෙත දැනුම්දී තිබෙනවා. ඒ අතරින් හිටපු අමාත්‍ය මංගල සමරවීර මහතාගේ පෞද්ගලික ලේකම්වරයා ඝාතනය කිරීමට උත්සහා දැරීමේ සිද්ධිය සම්බන්ධයෙන් චෝදනා එල්ලවී ඇති කොණ්ඩ රංජි, ටෙස්ට් ක්‍රිකට් නායක ධනංජයද සිල්වාගේ පියා ඝාතනය කිරීම සම්බන්ධයෙන් චෝදනා එල්ලවී සිටින ඇල්ටෝ ධර්මේ අත්අඩංගුවට ගෙන ඇති බවයි ඩුබායි ආරක්ෂක අංශ නිලවශයෙන් මෙරටට දැනුම්දී ඇත්තේ. එමෙන්ම බොරැල්ල වනාතමුල්ල ප්‍රදේශයේ පසුගිය කාලය පුරා ඝාතන රැසක් සිදුකළ බවට චෝදනා එල්ලවී සිටින වනාතේ චතූ නැමැත්තාද අත්අඩංගුවට ගෙන තිබෙනවා. පොලිස්පති ප්‍රියන්ත වීරසූරිය මහතාගේ ඍජු අධීක්ෂණයෙන් ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාගේ මෙහෙයවීමෙන් අදාළ මෙහෙයුම සිදු කරනු ලබනවා.
