පළාත් පාලන ඡන්ද විමසීම පැවැත්වීමට පියවර ගන්නා ලෙස මැතිවරණ කොමිසම වෙත නියෝගයක් නිකුත් කරන ලෙස ඉල්ලා විපක්ෂයේ පාර්ලිමේන්තු මන්ත්රීවරුන් පිරිසක් විසින් ශේෂ්ඨාධිකරණය වෙත රිට් පෙත්සම් දෙකක් ඉදිරිපත් කර තිබෙනවා.
මේ අනුව එම එක් පෙත්සමක් ඉදිරිපත් කළේ සමගි ජන බලවේගය පක්ෂයේ මහලේකම්, පාර්ලිමේන්තු මන්ත්රී රංජිත් මද්දුම බණ්ඩාර සහ පාර්ලිමේන්තු මන්ත්රී, මහාචාර්ය ජී.එල්. පීරිස් යන මහත්වරුන් විසින්.
ශ්රී ලංකා නිදහස් පක්ෂ මහ ලේකම්, පාර්ලිමේන්තු මන්ත්රී දයාසිරි ජයසේකර, විපක්ෂයේ ප්රධාන සංවිධායක, පාර්ලිමේන්තු මන්ත්රී, ලක්ෂ්මන් කිරිඇල්ල, දෙමළ ජාතික සන්ධානයේ පාර්ලිමේන්තු මන්ත්රී එම්. ඒ සුමන්දිරන්, පාර්ලිමේන්තු මන්ත්රී අනුර ප්රියදර්ශන යාපා යන මහත්වරුන් විසින් සෙසු පෙත්සම ඉදිරිපත් කර තිබෙනවා.
එහි වගඋත්තරකරුවන් ලෙස නම් කර ඇත්තේ මැතිවරණ කොමිසමේ සභාපති නිමල් පුංචිහේවා මහතා සහ එහි සාමාජිකයින් සහ අග්රාමාත්ය දිනේෂ් ගුණවර්ධන මහතායි.
පෙත්සම්කරුවන් පවසන්නේ පළාත් පාලන ආයතන 340 ක පමණ නිල කාලය ලබන වසරේ මාර්තු මස 19 වනදා අවසන්වීමට නියමිතව ඇති බවයි.
ඒ අතර මහ නගර සභා 24 ක් ද නගර සභා 41 ක් සහ ප්රාදේශීය සභා 275 ක් තිබෙන බවද එම පෙත්සම්වල සඳහන්.
නමුත් අදාළ පළාත් පාලන ආයතන සඳහා පළාත් පාලන ඡන්ද විමසීම් පනතේ ප්රතිපාදන ප්රකාරව ඡන්ද විමසීම් පැවැත්වීමට මැතිවරණ කොමිසම මෙතෙක් අවශ්ය ක්රියාමාර්ග ගෙන නොමැති බවයි පෙත්සම්කාර පාර්ශව පෙන්වා දෙන්නේ.
ජනමාධ්ය මගින් නිකුත් වන වාර්තා පිරික්සීමේදී අදාළ ඡන්ද විමසීම කල් දැමීමට මැතිවරණ බලධාරීන් මාන බලමින් සිටින බවක් පෙනී යන බවද එම පෙත්සම්වල දැක්වෙනවා.
පළාත් පාලන මැතිවරණ පනතේ ප්රතිපාදනවලට අනුව යම් පළාත් පාලන ආයතනයක නව නිල කාලය ආරම්භ වීමට මාස හයකට පෙර ඊට අදාළ මැතිවරණය පැවැත්වීමට මැතිවරණ බලධාරීන් විසින් අවශ්ය කටයුතු ආරම්භ කළ යුතු බව දක්වා ඇතැයිද අදාළ පෙත්සම් මඟින් පෙන්වා දී තිබෙනවා.
කෙසේ වෙතත් වග උත්තරකාර මැතිවරණ කොමිසමේ බලධාරීන් පළාත් පාලන ඡන්ද විමසීම පැවැත්වීමට අවශ්ය පියවර අනුගමනය නොකිරීම හේතුවෙන් ආණ්ඩුක්රම ව්යවස්ථාව යටතේ සහතික කර තිබෙන ජනතාවගේ සර්වජන ඡන්ද අයිතිය උල්ලංඝනය වීමක් සිදු වන බවයි පෙත්සම් මඟින් වැඩිදුරටත් පෙන්වා දී ඇත්තේ.
මේ අනුව ලබන වසරේ මාර්තු මස 20 වනදායින් ඇරඹෙන පළාත් පාලන ආයතන සඳහා වූ නව නිල කාලය උදෙසා වන ඡන්ද විමසීම පැවැත්වීමේ අභිලාෂය ප්රකාශයට පත්කරන ප්රකාශනයක් නිකුත් කරන ලෙස මැතිවරණ කොමිසමට නියෝගයක් නිකුත් කරන ලෙසයි පෙත්සම්කරුවන් අධිකරණයෙන් ඉල්ලා ඇත්තේ.
මීට අමතරව පළාත් පාලන ඡන්ද විමසීම පැවැත්වීමට අවශ්ය සියලු පියවර ගන්නා ලෙස මැතිවරණ කොමිසමට නියෝගයක් නිකුත් කරන ලෙසද අදාළ පෙත්සම් වලින් තවදුරටත් ඉල්ලා තිබෙනවා.
