ධීවර, ජලජ සහ සාගර සම්පත් අමාත්‍යාංශයට අදාළව 2026 වසරේ වෙන් කෙරුණු අයවැය ප්‍රතිපාදන මත ක්‍රියාත්මක ව්‍යාපෘතිවල ප්‍රගතිය සමාලෝචනය කිරීම සහ 2027 අයවැය යෝජනා පිළිබඳ සාකච්ඡා කිරීමේ විශේෂ හමුවක් ඊයේ පස්වරුවේ පැවැත්වුනා . මෙම හමුව ජනාධිපති අනුර කුමාර දිසානායක මහතාගේ ප්‍රධානත්වයෙන් පැවැත්වුනේ ජනාධිපති කාර්යාලයේදීයි. එහිදී ‘දිට්වා‘ ආපදාවෙන් විනාශ වූ ධීවර වරාය ඉදිකිරීම, ජීවනෝපාය මාර්ග යථාවත් කිරීම සහ පීඩාවට පත් ධීවර ජනතාවට බෝට්ටු හා දැල් ආම්පන්න ලබාදීම සඳහා රුපියල් මිලියන 189ක ප්‍රතිපාදන යටතේ ක්‍රියාත්මක ව්‍යාපෘතියේ ප්‍රගතිය ජනාධිපතිවරයාගේ විශේෂ නිරීක්ෂණයට ලක්ව තිබුනා. ජනාධිපති මාධ්‍ය අංශය සදහන් කලේ ක්ලීන් ශ්‍රී ලංකා වැඩසටහන යටතේ භාවිතයෙන් ඉවත් කළ බෝට්ටු සහ අනෙකුත් ෆයිබර් අපද්‍රව්‍ය ප්‍රතිචක්‍රීකරණය කිරීමේ වැඩසටහනේ ප්‍රගතිය පිළිබඳවද සාකච්ඡා කල බවයි. මෙරට මත්ස්‍ය නිෂ්පාදනය ඉහළ නැංවීම, අපනයනය වර්ධනය කිරීම, ජනතාවගේ ප්‍රෝටීන් අවශ්‍යතාව තහවුරු කිරීම සහ ධීවර ප්‍රජාවගේ ජීවන තත්ත්වය උසස් කිරීම ඉලක්ක කරගත් වැඩසටහන් වල ප්‍රගතිය සහ 2027 වසරේ සැලසුම් සම්බන්ධයෙන් මෙහිදී සාකච්ඡාවට ලක්ව තිබෙනවා.
